TARİXİ KÖKLƏRDƏN MÜTTƏFİQLİYƏ: QARDAŞLIQ VƏ HƏMRƏYLİYİN ZƏFƏRİ

Bakı:

23 °C

60 %

6 m/s

Əlaqə

AZ RU EN

Ana səhifə / YAP xəbərləri / TARİXİ KÖKLƏRDƏN MÜTTƏFİQLİYƏ: QARDAŞLIQ VƏ HƏMRƏYLİYİN ZƏFƏRİ

TARİXİ KÖKLƏRDƏN MÜTTƏFİQLİYƏ: QARDAŞLIQ VƏ HƏMRƏYLİYİN ZƏFƏRİ

25.08.2026 [13:28]

Türk dünyasının iki parlaq ulduzu, şanlı tarixin və zəngin mədəniyyətin varisləri
olan Azərbaycan və Özbəkistan bu gün öz münasibətlərində həqiqi mənada qızıl
dövrünü yaşayır. Əsrlər boyu eyni mənəvi bulaqdan su içən, eyni dili, dini və
adət-ənənələri bölüşən xalqlarımız arasındakı dərin qarşılıqlı rəğbət zamanın
bütün sınaqlarından keçərək bu gün sarsılmaz müttəfiqlik qalasına çevrilmişdir.
Bu gün Bakı ilə Daşkənd arasında ucalan dostluq körpüsü yalnız rəsmi protokol
və sazişlərə deyil, qardaş qəlbinin döyüntülərinə və sarsılmaz etimada söykənir.
Azərbaycan və Özbəkistan xalqlarını bir-birinə bağlayan tellər tarixin ən dərin
qatlarına gedib çıxır. Ulu babalarımızın bizə miras qoyduğu ortaq dəyərlər, eyni
kökdən bəhrələnən dilimiz və mədəniyyətimiz nəsildən-nəslə ötürülərək mənəvi
varlığımızın ayrılmaz hissəsinə çevrilmişdir. Nizami Gəncəvinin hikməti ilə
Əlişir Nəvainin kəlamları, Dədə Qorqud boyları ilə Özbək dastançılıq ənənəsi
eyni mənəvi irsin tərkib hissələridir. Bu tarixi və mənəvi bünövrə üzərində
ucalan dövlətlərarası münasibətlərimiz son illərdə misli görünməmiş inkişaf
dinamikası qazanaraq yeni məzmun kəsb etmişdir. Xalqlarımızın qəlbində
yaşayan dərin rəğbət və sevgiyə söykənən bu əlaqələr bu gün iki qardaş dövlətin
gücünü bir nöqtəyə cəmləyərək onları regionun və Türk dünyasının aparıcı
sütununa çevirmişdir.
Bu uca qardaşlıq sarayının ucaldılmasında hər iki ölkə rəhbərinin müstəsna
xidmətləri və tarixi rolu vardır. Azərbaycan Respublikasının Prezidenti İlham
Əliyev və Özbəkistan Respublikasının Prezidenti, əziz qardaşımız Şavkat
Mirziyoyev arasında mövcud olan səmimi dostluq, qarşılıqlı hörmət və yüksək
etimad Azərbaycan-Özbəkistan müttəfiqliyinin əsas hərəkətverici qüvvəsidir.
Prezident Şavkat Mirziyoyevin iki ölkə arasında birliyin, qardaşlığın və
müttəfiqliyin möhkəmlənməsi naminə nümayiş etdirdiyi yorulmaz və qətiyyətli
fəaliyyəti Azərbaycan xalqının qəlbində dərin rəğbət və ehtiram qazanmışdır.
Dövlət başçılarının müntəzəm xarakter alan görüşləri, son beş ildə həyata
keçirilən 15 qarşılıqlı səfər bu münasibətlərin nə qədər canlı, dinamik və səmimi
olduğunun bariz sübutudur.
Gözəl və bənzərsiz Özbəkistana hər bir səfər Azərbaycan xalqı üçün böyük
bayram və məmnunluq hissidir. Ənənəvi olaraq bu səfərlər müstəsna
qonaqpərvərlik, yüksək səmimiyyət və tam qarşılıqlı anlaşma mühitində baş
tutur. Qardaş Özbəkistana səfərlər zamanı şahid olduğumuz son illərin sürətli
inkişafı, modernləşmə və böyük quruculuq işləri hər bir azərbaycanlının qəlbini
qürurla doldurur. Müasir və möhtəşəm şəhərlərin salınması, iqtisadiyyatın
hərtərəfli şaxələndirilməsi, genişmiqyaslı infrastruktur layihələrinin uğurla

icrası Özbəkistanın qüdrətini və parlaq gələcəyini nümayiş etdirir. Bu böyük
intibah və tərəqqi qardaş ölkənin qlobal miqyasda nüfuzunu artırmaqla yanaşı,
bütün Türk dünyasının fəxr mənbəyinə çevrilmişdir.
Azərbaycan xalqı özünün ən çətin və şərəfli anlarında Özbəkistanın qardaşlıq
dəstəyini hər zaman hiss etmişdir. Vətən müharibəsində qazanılan tarixi
Zəfərdən sonra işğaldan azad edilmiş Qarabağda aparılan genişmiqyaslı bərpa
işlərində Özbəkistanın yaxından iştirak etməsi bu birliyin ən ali təzahürüdür.
Füzuli şəhərində Özbəkistan tərəfindən hədiyyə olaraq inşa edilən Mirzə
Uluqbəy adına tam orta məktəb iki xalqın əbədi dostluğunun, maarif və
mədəniyyət həmrəyliyinin parlaq abidəsidir.
Azərbaycan və Özbəkistanın bu gün nümayiş etdirdiyi birlik və müttəfiqlik
modeli regional sülhün, sabitliyin və tərəqqinin ən möhkəm zəmanətidir. Ortaya
qoyulan güclü siyasi iradə və xalqlarımızın bir-birinə olan dərin sevgisi gələcək
nəsillər üçün ən qiymətli irsdir. Bakı və Daşkənd əl-ələ verərək Türk dünyasının
parlaq gələcəyini inşa edir.
Asim Quliyev
YAP Şahbuz rayon təşkilatının mühasibi