MÜTTƏFİQLİYİN ZİRVƏSİ: AZƏRBAYCAN-ÖZBƏKİSTAN ƏLAQƏLƏRİNDƏ YENİ STRATEJİ MƏRHƏLƏ

Bakı:

26 °C

69 %

12 m/s

Əlaqə

AZ RU EN

Ana səhifə / YAP xəbərləri / MÜTTƏFİQLİYİN ZİRVƏSİ: AZƏRBAYCAN-ÖZBƏKİSTAN ƏLAQƏLƏRİNDƏ YENİ STRATEJİ MƏRHƏLƏ

MÜTTƏFİQLİYİN ZİRVƏSİ: AZƏRBAYCAN-ÖZBƏKİSTAN ƏLAQƏLƏRİNDƏ YENİ STRATEJİ MƏRHƏLƏ

25.08.2026 [13:27]

Azərbaycan və Özbəkistan arasındakı münasibətlər iki müstəqil dövlət
çərçivəsində adi diplomatik əlaqələri çoxdan aşaraq strateji tərəfdaşlığın və
müttəfiqliyin ən yüksək pilləsinə yüksəlmişdir. Əsrlərdən bəri sınaqdan çıxmış
ortaq tarix, zəngin mədəniyyət, dil birliyi və eyni mənəvi dəyərlər bu
münasibətlərin sarsılmaz bünövrəsini təşkil edir. Bu möhkəm təməl üzərində
qurulan dövlətlərarası münasibətlər son illərdə keyfiyyətcə yeni məzmun kəsb
edərək Türk dünyasının inteqrasiyasında aparıcı qüvvəyə çevrilmişdir.
Azərbaycan və Özbəkistan xalqları əsrlər boyu vahid mədəni və mənəvi
məkanda yaşamış, bir-birinin kədərinə və sevincinə şərik olmuşlar. Şərq
intibahının parlaq nümayəndələrinin irsi, Böyük İpək Yolu üzərində formalaşan
ticari və mədəni əlaqələr, ədəbiyyat və incəsənət sahəsindəki qarşılıqlı təsirlər
xalqlarımızı bir-birinə qırılmaz tellərlə bağlamışdır. Nizami Gəncəvinin və
Əlişir Nəvainin ədəbi irsi Bakı və Daşkənd arasında mənəvi körpü rolunu
oynamış, nəsildən-nəslə ötürülən dərin rəğbət hissini formalaşdırmışdır. Müasir
dövrdə bu tarixi irs dövlətlərarası münasibətlərin inkişafında müstəsna rol
oynayır. Hər iki ölkə müstəqilliyini bərpa etdikdən sonra tarixi köklərə
söykənərək diplomatik münasibətləri qısa müddətdə strateji səviyyəyə
qaldırmağı bacarmışdır. Xalqlarımızın bir-birinə olan dərin hörməti və sevgisi
siyasi iradə ilə birləşərək müasir dövlətlərarası modelin ən uğurlu nümunəsini
yaratmışdır.
Dövlətlərarası əlaqələrin belə sürətlə inkişaf etməsində və müttəfiqlik
səviyyəsinə yüksəlməsində hər iki ölkə rəhbərinin şəxsi münasibətləri xüsusi
çəkiyə malikdir. Azərbaycan Respublikasının Prezidenti İlham Əliyev və
Özbəkistan Respublikasının Prezidenti Şavkat Mirziyoyev arasında mövcud
olan səmimi dostluq, qarşılıqlı hörmət və etimad ikitərəfli gündəliyin müəyyən
olunmasında həlledici rol oynayır. Prezident Şavkat Mirziyoyevin ölkələrimiz
arasında qardaşlıq, birlik və müttəfiqlik naminə yorulmaz və qətiyyətli
fəaliyyəti Azərbaycanda dərin hörmətlə qarşılanır. Liderlərin müntəzəm
təmasları və siyasi iradəsi sayəsində iki ölkə arasında aparılan danışıqlar real
nəticələrlə yekunlaşır. Son beş ildə ən yüksək səviyyədə reallaşan 15 qarşılıqlı
səfər siyasi dialoqun necə müntəzəm və dinamik olduğunu nümayiş etdirir.
Prezident İlham Əliyevin Özbəkistana həyata keçirdiyi dövlət və rəsmi səfərləri
hər zaman yüksək qonaqpərvərlik, səmimiyyət və strateji razılaşmalarla yadda
qalır.
Siyasi sahədəki yüksək anlaşma iqtisadi-ticari əlaqələrin də sürətli artımına
təkan verir. Azərbaycan və Özbəkistan birgə investisiya fondlarının yaradılması,

sənaye kooperasiyası, energetika, kənd təsərrüfatı və nəqliyyat-logistika
sahələrində nəhəng proqramlar icra edir. Özbəkistanda həyata keçirilən
genişmiqyaslı iqtisadi islahatlar, iqtisadiyyatın şaxələndirilməsi, müasir
şəhərlərin salınması və infrastrukturun yenilənməsi Azərbaycan tərəfindən
böyük rəğbətlə izlənilir. Xüsusilə "Orta Dəhliz" (Transxəzər Beynəlxalq
Nəqliyyat Marşrutu) çərçivəsində Bakı və Daşkəndin birgə fəaliyyəti Mərkəzi
Asiya və Qafqaz regionlarının geosiyasi əhəmiyyətini artırır. Hər iki dövlət
geoiqtisadi imkanlarını birləşdirərək Avrasiya məkanında mühüm nəqliyyat və
tranzit qovşağına çevrilməkdədir. Birgə müəssisələrin sayının artması, ticarət
dövriyyəsinin dəfələrlə çoxalması bu əməkdaşlığın praktiki nəticəsidir.
Azərbaycan-Özbəkistan müttəfiqliyi təkcə iki ölkənin çərçivəsində
məhdudlaşmır, eyni zamanda Türk Dövlətləri Təşkilatı (TDT) daxilində
inteqrasiya proseslərinə güclü təkan verir. Hər iki ölkə Türk dünyasının birliyi,
mənəvi-mədəni həmrəyliyi və iqtisadi gücünün artırılması istiqamətində vahid
mövqedən çıxış edir. Beynəlxalq platformalarda qarşılıqlı dəstək prinsipi ardıcıl
olaraq qorunub saxlanılır. İşğaldan azad edilmiş Qarabağın bərpa olunması
prosesində Özbəkistanın göstərdiyi qardaşlıq dəstəyi – Füzulidə Mirzə Uluqbəy
adına məktəbin tikilib istifadəyə verilməsi bu həmrəyliyin ən parlaq
rəmzlərindən biridir. Bu addım iki xalqın bir-birinə olan sevgisinin və dərin
mənəvi bağlarının əbədi göstəricisidir.
Azərbaycan və Özbəkistan münasibətləri bu gün özünün qızıl dövrünü
yaşamaqdadır. Sağlam bünövrə, yüksək siyasi iradə, səmimi dostluq və strateji
baxış ölkələrimizi parlaq gələcəyə aparır. Müttəfiqlik müqaviləsi ilə rəsmiləşən
bu sarsılmaz bağlar regional sabitliyin, təhlükəsizliyin və tərəqqinin ən etibarlı
təminatçısı kimi çıxış edir.
Aynur Quliyeva
YAP Şahbuz rayon Ayrınc ərazi partiya təşkilatının müavini,
Ayrınc kənd tam orta məktəbində müəllim