Daşkənddən dünyaya verilən dostluq və qardaşlıq mesajı

Bakı:

25 °C

57 %

7 m/s

Əlaqə

AZ RU EN

Ana səhifə / YAP xəbərləri / Daşkənddən dünyaya verilən dostluq və qardaşlıq mesajı

Daşkənddən dünyaya verilən dostluq və qardaşlıq mesajı

25.08.2026 [13:23]

Azərbaycan və Özbəkistan prezidentlərinin qarşılıqlı təltif olunması iki
qardaş ölkə arasında münasibətlərin yüksək səviyyəsinin mühüm siyasi
rəmzinə çevrildi
Daşkənddə Azərbaycan və Özbəkistan prezidentlərinin qarşılıqlı təltif
olunması iki qardaş ölkə arasında formalaşmış dostluq, qardaşlıq və strateji
tərəfdaşlığın növbəti parlaq ifadəsi oldu. Özbəkistan Prezidenti Şavkat
Mirziyoyev Azərbaycanın dövlət başçısı İlham Əliyevi ölkəsinin ali dərəcəli
“Dostluq” ordeni ilə təltif etdi. Cənab Prezident İlham Əliyev isə
Özbəkistanın dövlət başçısına Azərbaycanın ən yüksək dövlət təltiflərindən
biri olan “Heydər Əliyev” ordenini təqdim etdi.
Bu mərasim ilk növbədə iki Liderin şəxsi münasibətlərinə verilən qiymət
olmaqla yanaşı, Azərbaycan və Özbəkistan dövlətləri arasında son illərdə
daha da möhkəmlənən siyasi etimadın, qarşılıqlı hörmətin və strateji
əməkdaşlığın göstəricisidir.
Bu gün Azərbaycan–Özbəkistan münasibətləri sadəcə diplomatik əlaqələr
çərçivəsində qiymətləndirilə bilməz. Bu münasibətlərin təməlində ortaq
tarix, türk dünyasına məxsusluq, dil və mədəni yaxınlıq, milli-mənəvi
dəyərlər və qarşılıqlı etimad dayanır. Məhz bu möhkəm təməl dövlətlərarası
əlaqələrin bütün istiqamətlərdə sürətlə inkişafına imkan yaradır.
Prezident İlham Əliyevin “Dostluq” ordeni ilə təltif olunması
Azərbaycan–Özbəkistan münasibətlərinin inkişafına verilən yüksək
qiymətin ifadəsidir. Prezident Şavkat Mirziyoyevə “Heydər Əliyev” ordeninin
təqdim edilməsi isə Özbəkistan liderinin iki ölkə arasında dostluq, qardaşlıq
və müttəfiqlik münasibətlərinin möhkəmləndirilməsində xidmətlərinin xüsusi
qiymətləndirilməsidir.
“Heydər Əliyev” ordeninin özü də böyük siyasi və mənəvi məna daşıyır. Bu
ordenin Özbəkistan Prezidentinə təqdim olunması Azərbaycan
dövlətçiliyinin banisi Heydər Əliyevin müəyyən etdiyi strateji baxışların bu
gün də dövlətlərarası münasibətlərdə öz əksini tapdığını göstərir. Heydər
Əliyevin siyasi irsində türk dünyası ilə əlaqələrin inkişafı mühüm yer
tuturdu. Bu gün Azərbaycan ilə Özbəkistan arasında münasibətlərin yüksək
səviyyəsi həmin siyasətin müasir mərhələdə davam etdirilməsinin
nümunələrindən biridir.

Azərbaycan və Özbəkistan arasında əməkdaşlığın əsas xüsusiyyətlərindən
biri onun yalnız siyasi bəyanatlarla məhdudlaşmamasıdır. İki ölkə arasında
iqtisadiyyat, investisiya, sənaye, enerji, nəqliyyat, logistika, təhsil, elm,
mədəniyyət və digər sahələrdə konkret layihələr həyata keçirilir. Qarşılıqlı
sərmayələrin artması və birgə layihələrin genişlənməsi siyasi
münasibətlərin iqtisadi dayaqlarını daha da möhkəmləndirir.
Xüsusilə Azərbaycan ilə Mərkəzi Asiya arasında əlaqələrin genişlənməsi
baxımından Özbəkistanla əməkdaşlıq mühüm əhəmiyyət daşıyır.
Azərbaycan Cənubi Qafqazın, Özbəkistan isə Mərkəzi Asiyanın mühüm
dövlətlərindən biridir. Bu iki coğrafiyanın əməkdaşlığının güclənməsi
nəqliyyat və logistika imkanlarının genişlənməsinə, ticarət əlaqələrinin
artmasına və Türk dünyası daxilində iqtisadi inteqrasiyanın dərinləşməsinə
xidmət edir.
Bu baxımdan Azərbaycan–Özbəkistan münasibətlərinə yalnız ikitərəfli
əlaqələr prizmasından baxmaq kifayət deyil. Bakı ilə Daşkənd arasında
möhkəmlənən əməkdaşlıq bütövlükdə Türk Dövlətləri Təşkilatı çərçivəsində
həmrəyliyin və əməkdaşlığın güclənməsi baxımından da əhəmiyyətlidir.
Azərbaycan və Özbəkistanın siyasi rəhbərlikləri arasında formalaşan
yüksək səviyyəli etimad bu prosesin əsas hərəkətverici qüvvələrindəndir.
Prezident İlham Əliyev və Prezident Şavkat Mirziyoyev arasında qarşılıqlı
hörmətə əsaslanan münasibətlər iki ölkə arasında əlaqələrin inkişafına
mühüm impuls verir.
Daşkənddə keçirilən qarşılıqlı təltif mərasimi də məhz bu siyasi etimadın
simvolik ifadəsi kimi yadda qalacaq. Çünki dövlət başçılarına təqdim olunan
ali ordenlər yalnız şəxslərə verilən mükafat deyil, onların rəhbərlik etdiyi
dövlətlərin münasibətlərinə verilən qiyməti də özündə ehtiva edir.
Bu gün Azərbaycan və Özbəkistan münasibətləri yeni mərhələyə qədəm
qoyur. Qarşılıqlı investisiyaların genişləndirilməsi, nəqliyyat dəhlizlərinin
inkişafı, sənaye kooperasiyasının artırılması, enerji və digər strateji
sahələrdə əməkdaşlığın dərinləşdirilməsi üçün böyük imkanlar mövcuddur.
Digər mühüm istiqamət humanitar əlaqələrdir. Xalqlar arasında mövcud
olan mənəvi yaxınlıq təhsil, mədəniyyət, elm və incəsənət sahələrində
əməkdaşlığın genişləndirilməsi üçün möhkəm zəmin yaradır. Belə layihələr

Azərbaycan və Özbəkistan arasında münasibətlərin yalnız dövlətlər
səviyyəsində deyil, xalqlar səviyyəsində də daha da möhkəmlənməsinə
xidmət edir.
Daşkənddə baş tutan mərasim bu baxımdan həm keçmişə verilən qiymət,
həm bu günə dair siyasi mesaj, həm də gələcəyə yönəlmiş mühüm bir
işarədir. Keçmişdən gələn qardaşlıq münasibətləri müasir dövrdə siyasi
iradə, iqtisadi əməkdaşlıq və strateji tərəfdaşlıqla daha da gücləndirilir.
Nəticə etibarilə, Prezident İlham Əliyevin “Dostluq” ordeni, Prezident
Şavkat Mirziyoyevin isə “Heydər Əliyev” ordeni ilə təltif olunması
Azərbaycan–Özbəkistan münasibətlərinin yüksək siyasi səviyyəsinin
rəmzidir.
Daşkənddə yaşanan bu tarixi an bir daha göstərdi ki, Azərbaycan və
Özbəkistan arasında dostluq möhkəm təmələ, qardaşlıq qarşılıqlı etimada,
strateji tərəfdaşlıq isə konkret nəticələrə əsaslanır.
Bu münasibətlər iki xalqın ortaq keçmişindən güc alaraq, müasir siyasi
iradə ilə gələcəyə doğru inamla irəliləyir. Daşkənddən dünyaya verilən əsas
mesaj isə birdir: Azərbaycan və Özbəkistanın dostluğu və qardaşlığı yalnız
iki dövlət üçün deyil, bütövlükdə Türk dünyasının güclənməsi üçün mühüm
əhəmiyyət daşıyır.