Azərbaycan-Özbəkistan Çoxşaxəli İqtisadi Əlaqələrinin İnkişaf Perspektivləri

Bakı:

23 °C

60 %

5 m/s

Əlaqə

AZ RU EN

Ana səhifə / YAP xəbərləri / Azərbaycan-Özbəkistan Çoxşaxəli İqtisadi Əlaqələrinin İnkişaf Perspektivləri

Azərbaycan-Özbəkistan Çoxşaxəli İqtisadi Əlaqələrinin İnkişaf Perspektivləri

24.08.2026 [14:27]

Azərbaycan Respublikasının Prezidenti İlham Əliyevin 2026-cı il avqustun 23-də Özbəkistan
Respublikasına reallaşan növbəti tarixi dövlət səfəri iki qardaş ölkə arasında strateji tərəfdaşlıq
və müttəfiqlik münasibətlərinin keyfiyyətcə daha yüksək pilləyə ucalmasının əsasını qoydu.
Səfər çərçivəsində reallaşan Ali Dövlətlərarası Şuranın növbəti iclası, Ali Baş Komandanlar və
dövlət rəhbərlərinin təkbətək və heyətlərarası görüşləri, eləcə də dövlət başçılarının mətbuata
birgə bəyanatları Azərbaycan ilə Özbəkistanın çoxşaxəli əməkdaşlıq gündəliyinin nə qədər
zəngin, geniş və dərin məzmuna malik olduğunu bir daha sübut etdi. Mətbuat üçün verilən
bəyanatda vurğulanan əsas məqamlar göstərdi ki, iki ölkə arasında münasibətlər artıq adi
diplomatik və ya iqtisadi əlaqələr çərçivəsindən tamamilə çıxaraq, vahid geostrateji baxışa, dərin
tarixi köklərə və sarsılmaz qardaşlıq prinsiplərinə söykənən tammiqyaslı müttəfiqlik xarakteri
almışdır.
Prezident İlham Əliyev mətbuata bəyanatında xüsusi olaraq qeyd etdi ki, Özbəkistanda
həyata keçirilən irimiqyaslı islahatlar, sosial-iqtisadi inkişaf dinamikası və şəhərsalma
sahəsindəki möhtəşəm nailiyyətlər bütün Türk dünyası üçün qürur mənbəyidir. Daşkənddə
reallaşdırılan 'Yeni Daşkənd' şəhərsalma layihəsi ilə tanışlıq, burada 'Azərbaycan' parkının
təməlinin qoyulması və ikitərəfli birgə sənaye obyektlərinin istifadəyə verilməsi
tərəfdaşlığımızın yalnız rəsmi sənədlərdə deyil, real həyatda və konkret layihələrdə öz əksini
tapdığını nümayiş etdirir. Bu addımlar həm də xalqlarımız arasında əsrlərdən gələn mənəvi,
mədəni və tarixi bağlılığın müasir dövrün tələblərinə uyğun olaraq daha da
möhkəmləndirilməsinə xidmət edir.
İki ölkə arasında iqtisadi əməkdaşlığın cari vəziyyəti və gələcək perspektivləri mətbuat
bəyanatının mərkəzi mövzularından birini təşkil etmişdir. Son illər ərzində Azərbaycan və
Özbəkistan arasında ticarət dövriyyəsinin ardıcıl və sıçrayışlı şəkildə artması qarşıya qoyulmuş
strateji hədəflərin uğurla reallaşdığını göstərir. Qarşılıqlı ticarətin həcminin yaxın illərdə milyard
dollar həddinə çatdırılması və bu göstəricinin şaxələndirilmiş məhsul nomenklaturası hesabına
saxlanılması barədə əldə olunmuş razılıqlar hər iki ölkənin iqtisadi potensialının reallaşdırılması
üçün möhkəm zəmin yaradır. İki ölkənin biznes qurumları, ticarət palataları və özəl sektor

nümayəndələri arasında birbaşa təmasların intensivləşməsi bu dinamikanın aparıcı hərəkətverici
qüvvəsinə çevrilmişdir.
Sənaye kooperasiyası və birgə investisiya fəaliyyəti Azərbaycan-Özbəkistan iqtisadi
modelinin ən uğurlu tərkib hissələrindən biridir. Səfər çərçivəsində yaradılmış Azərbaycan-
Özbəkistan Birgə İnvestisiya Fondunun fəal iş mexanizmləri və maliyyə imkanları yüksək
qiymətləndirilmişdir. Bu fond vasitəsilə həm Özbəkistanda, həm də Azərbaycanda, eyni
zamanda üçüncü ölkələrdə perspektivli layihələrin maliyyələşdirilməsi nəzərdə tutulur. Sənaye,
maşınqayırma, avtomobil istehsalı, toxuculuq, pambıqçılıq, ipəkçilik və kimya sənayesi kimi
strateji sahələrdə birgə klasterlərin və müəssisələrin qurulması hər iki ölkədə əlavə dəyər
zəncirinin formalaşmasına, minlərlə yeni iş yerinin yaradılmasına və yerli istehsalın rəqabət
qabiliyyətinin yüksəldilməsinə birbaşa töhfə verir.
Mətbuat bəyanatında diqqət çəkən digər mühüm məqam isə işğaldan azad olunmuş
Qarabağ və Şərqi Zəngəzur iqtisadi rayonlarının bərpası və yeniden qurulması prosesində
Özbəkistan şirkətlərinin fəal iştirakıdır. Bölgədə həyata keçirilən mülki, infrastruktur və sənaye
layihələrində Özbəkistanın dəstəyi və sərmayələri azad edilmiş torpaqlarımızın tezliklə
dirçəlməsinə, keçmiş məcburi köçkünlərin öz doğma yurdlarına təhlükəsiz və ləyaqətli qaydışına
böyük töhfə verir. Bu, bir daha göstərir ki, Özbəkistan Azərbaycanın sevincli və çətin günlərində
daima onun yanında olan həqiqi qardaş dövlətdir.
Yekun olaraq qeyd etmək olar ki, Azərbaycan Respublikasının Prezidenti İlham Əliyevin
2026-cı il avqustun 23-də Özbəkistana reallaşan dövlət səfəri və mətbuata verdiyi bəyanat iki
ölkə arasında strateji münasibətlərin gələcək inkişaf magistralını müəyyənləşdirmişdir.
İqtisadiyyatın, sənayenin, energetikanın, nəqliyyatın, kənd təsərrüfatının və humanitar sahələrin
bütün spektri üzrə əldə olunmuş razılaşmalar və imzalanmış sənədlər Azərbaycan-Özbəkistan
müttəfiqliyinin sarsılmazlığını və uzunmüddətli xarakterini bir daha təsdiqləyir. Bu tarixi
əməkdaşlıq modeli təkcə iki ölkənin və xalqın rifahına deyil, bütövlükdə Cənubi Qafqaz və
Mərkəzi Asiya regionlarının dinc, təhlükəsiz, sabit və dayanıqlı inkişafına misilsiz xidmət
göstərir.
YAP Ordubad rayon təşkilatının məsləhətçisi Cəmilə Bağırova