Azərbaycan və Qırğızıstan – Müttəfiqlik və Qardaşlıq Münasibətlərinin Yeni Zirvəsi

Bakı:

23 °C

60 %

5 m/s

Əlaqə

AZ RU EN

Ana səhifə / YAP xəbərləri / Azərbaycan və Qırğızıstan – Müttəfiqlik və Qardaşlıq Münasibətlərinin Yeni Zirvəsi

Azərbaycan və Qırğızıstan – Müttəfiqlik və Qardaşlıq Münasibətlərinin Yeni Zirvəsi

05.08.2026 [10:00]

İyulun 31-də Azərbaycan Respublikasının Prezidenti İlham Əliyevin Qırğız Respublikasına reallaşdıran dövlət səfəri iki ölkə arasında ənənəvi dostluq və qardaşlıq münasibətlərində tamamilə yeni bir səhifə açdı. Qırğızıstan Prezidenti Sadır Japarovla baş tutan yüksək səviyyəli danışıqlar göstərdi ki, Bakı və Bişkek arasındakı siyasi dialoq hazırda özünün ən yüksək inkişaf dövrünü yaşayır.

Səfərin ən mühüm və tarixi hadisəsi heç şübhəsiz ki, iki qardaş dövlət arasında"Müttəfiqlik münasibətləri haqqında Müqavilə"nin imzalanması oldu. Bu sənəd sadəcə hüquqi bir çərçivə deyil, həm də ölkələrin bir-birinə olan qarşılıqlı inamının, gələcək inkişafla bağlı ortaq baxışlarının və regional təhlükəsizlik məsələlərində eyni mövqedən çıxış etmələrinin bariz təzahürüdür. Liderlərin mətbuat bəyanatlarında da xüsusi vurğulandığı kimi, müttəfiqlik böyük məsuliyyət tələb edir və hər iki tərəf bu məsuliyyəti məmnuniyyətlə öz üzərinə götürür.

Görüş çərçivəsində iqtisadi əlaqələrin möhkəmləndirilməsi istiqamətində atılan addımlar da diqqətəlayiqdir. Belə ki, birgə Azərbaycan-Qırğız İnvestisiya Fondunun nizamnamə kapitalının iki dəfə artırılaraq 200 milyon ABŞ dollarına çatdırılması qərara alındı. Fond vasitəsilə 8 yeni təşəbbüsə start verilməsi və layihələrin maliyyələşdirilməsi ölkələr arasında ticarət dövriyyəsinin artmasına, yeni iş yerlərinin yaradılmasına və müştərək istehsalın qurulmasına birbaşa təkan verəcəkdir.

Xalqlarımız arasındakı mədəni və tarixi bağlar birgə layihələrdə də öz əksini tapır. İssık-Kul gölünün sahilində Azərbaycan dövlətinin sərmayəsi ilə inşa edilən ilk beşulduzlu "Bakı" hotelinin açılışı bu əməkdaşlığın uğurlu nəticələrindəndir.

Digər tərəfdən, Azərbaycanın işğaldan azad edilmiş ərazilərinin bərpasında Qırğızıstanın mənəvi və əməli dəstəyi də yüksək qiymətləndirilir. Ağdam rayonunda qardaş ölkə tərəfindən "Manas" adını daşıyan məktəbin inşası və istifadəyə verilməsi Qırğız xalqının Qarabağın bərpası işinə verdiyi əvəzsiz bir töhfə kimi tarixə düşüb. Bakıda və Bişkekdə qarşılıqlı olaraq açılan mədəniyyət ocaqları, parklar və abidələr (o cümlədən Çingiz Aytmatovun abidəsi) hər iki xalqın bir-birinin tarixi irsinə bəslədiyi dərin hörmətin sübutudur.
Bütün bu faktlar sübut edir ki, Azərbaycan və Qırğızıstan əlaqələri yalnız diplomatik sənədlər üzərində deyil, real fəaliyyət, qarşılıqlı iqtisadi mənfəət və sarsılmaz mənəvi bağlar əsasında dinamik şəkildə inkişaf etməkdədir.

Azər SÜLEYMANOV,

Yeni Azərbaycan Partiyası Nəsimi rayon təşkilatının sədri

Paylaş:

Baxılıb: 335 dəfə