Azərbaycan–Almaniya münasibətlərində yeni strateji mərhələ

Bakı:

27 °C

41 %

5 m/s

Əlaqə

AZ RU EN

Ana səhifə / YAP xəbərləri / Azərbaycan–Almaniya münasibətlərində yeni strateji mərhələ

Azərbaycan–Almaniya münasibətlərində yeni strateji mərhələ

24.07.2026 [09:40]

Azərbaycan Respublikasının Prezidenti İlham Əliyevin 21 iyul 2026-cı il tarixində Almaniya Federativ Respublikasına rəsmi səfəri iki ölkə arasında münasibətlərin inkişafında mühüm mərhələ kimi qiymətləndirilir. Səfər çərçivəsində keçirilən görüşlər, imzalanan sənədlər və verilən bəyanatlar Azərbaycan–Almaniya əməkdaşlığının gələcək istiqamətlərini müəyyənləşdirən mühüm siyasi və iqtisadi əhəmiyyət daşıyır.

Prezident İlham Əliyev bəyanatında vurğuladı ki, imzalanmış sənədlər iki ölkə arasında münasibətləri keyfiyyətcə yeni səviyyəyə yüksəldəcək. Dövlət başçısı bildirdi ki, uzun müddətdir arzulanan strateji dialoqun başlanmasına nail olunub və imzalanmış "Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə" gələcək əməkdaşlığın əsas yol xəritəsi olacaq. Prezident qeyd etdi ki, Azərbaycan və Almaniya arasında geniş ikitərəfli gündəlik mövcuddur və Almaniyanın Avropa İttifaqının aparıcı dövləti kimi Cənubi Qafqazda artan rolu regional sabitlik və əməkdaşlıq baxımından mühüm əhəmiyyət kəsb edir.

İqtisadi əməkdaşlıq səfərin əsas mövzularından biri oldu. Prezident İlham Əliyev bildirdi ki, hazırda Azərbaycanda 200-dən çox Almaniya şirkəti uğurla fəaliyyət göstərir və bu göstəricinin yaxın gələcəkdə daha da artacağına əminliyini ifadə etdi. Qarşılıqlı investisiyaların artırılması, Almaniya şirkətlərinin Azərbaycanda fəaliyyətinin genişləndirilməsi və yeni biznes imkanlarının yaradılması istiqamətində konkret təkliflərin irəli sürüldüyü diqqətə çatdırıldı. Bu məqsədlə Azərbaycan–Almaniya Biznes Şurasının yaradılmasına dair Birgə Bəyannamənin imzalanması da xüsusi əhəmiyyət daşıyır.

Enerji sahəsində əməkdaşlıq da görüşlərin əsas istiqamətlərindən biri oldu. Dövlət başçısı qeyd etdi ki, bu ildən etibarən Azərbaycan təbii qazının Almaniyaya ixracına başlanılıb və bununla da Azərbaycan qazı artıq Avropa İttifaqının 10 üzv dövlətinə çatdırılır. Prezident vurğuladı ki, Azərbaycan Almaniyaya neft də ixrac edir və gələcəkdə yaşıl enerji layihələri vasitəsilə Avropanın enerji təhlükəsizliyinə daha böyük töhfə vermək niyyətindədir. Bu istiqamətdə əməkdaşlığın uzunmüddətli və genişmiqyaslı olacağı bildirildi.

Nəqliyyat və tranzit imkanları da danışıqların mühüm hissəsini təşkil etdi. Prezident İlham Əliyev Azərbaycanın Orta Asiya ilə Avropa arasında etibarlı körpü rolunu daha da gücləndirdiyini vurğulayaraq, ölkəmizin nəqliyyat infrastrukturunun sürətlə inkişaf etdiyini qeyd etdi. Almaniya şirkətlərinin bu sahədə böyük təcrübəyə malik olduğu bildirildi və imzalanmış sənədlərin icrası məqsədilə bir neçə işçi qrupunun yaradılacağı açıqlanaraq konkret fəaliyyət planlarının hazırlanacağı diqqətə çatdırıldı.

Prezident İlham Əliyev çıxışında Ermənistan–Azərbaycan münasibətlərinin normallaşması prosesinə də toxundu. Dövlət başçısı bildirdi ki, Vaşinqtonda ABŞ Prezidenti Donald Trampın iştirakı ilə imzalanmış Birgə Bəyannamə uzun illər davam edən münaqişənin başa çatmasına mühüm töhfə verib. Azərbaycanın sülh razılaşmasından dərhal sonra praktik addımlar atdığı, Ermənistanın enerji təhlükəsizliyinə dəstək məqsədilə benzin və dizel yanacağı tədarük etdiyi, eyni zamanda Azərbaycan ərazisindən Ermənistana 40 min tondan artıq tranzit yükün daşındığı qeyd edildi.

Prezident Almaniya hökumətinin sülh prosesində oynadığı rolu yüksək qiymətləndirərək bildirdi ki, Almaniyada xarici işlər nazirləri səviyyəsində keçirilən görüşlər etimad mühitinin formalaşmasına töhfə verib. Dövlət başçısı vurğuladı ki, Azərbaycan öz gücü hesabına ərazi bütövlüyünü və suverenliyini bərpa edib, BMT Təhlükəsizlik Şurasının qətnamələrini özü icra edib və daha sonra Ermənistana sülh təklif edərək müsbət cavab alıb.

Çıxışında Prezident İlham Əliyev Avropa İttifaqı ilə münasibətlərə də xüsusi yer ayırdı. O qeyd etdi ki, bu il Avropa İttifaqı Şurasının Prezidenti Antonio Koşta və Avropa Komissiyasının Prezidenti Ursula fon der Lyayenin Azərbaycana səfərləri əlaqələrin inkişafında mühüm siyasi hadisələrdir. Almaniyanın Avropa İttifaqının aparıcı üzvlərindən biri kimi bu münasibətlərin daha da inkişafında mühüm rol oynayacağına əminlik ifadə olundu.

Beləliklə, Prezident İlham Əliyevin Almaniyaya rəsmi səfəri çərçivəsində imzalanmış sənədlər və səsləndirilən bəyanatlar Azərbaycan–Almaniya münasibətlərinin strateji tərəfdaşlıq mərhələsinə yüksəldiyini nümayiş etdirir. Siyasi dialoq, iqtisadi əməkdaşlıq, enerji təhlükəsizliyi, nəqliyyat, biznes əlaqələri və regional sülh istiqamətlərində əldə olunmuş razılaşmalar iki ölkə arasında uzunmüddətli və qarşılıqlı faydalı əməkdaşlığın daha da genişlənməsinə möhkəm zəmin yaradır.

Anar Alışov

Yeni Azərbaycan Partiyası Yardımlı rayon təşkilatının sədri

Paylaş:

Baxılıb: 386 dəfə