Milli maraqların keşiyində dayanan güclü Azərbaycan mətbuatı

Bakı:

25 °C

71 %

15 m/s

Əlaqə

AZ RU EN

Ana səhifə / YAP xəbərləri / Milli maraqların keşiyində dayanan güclü Azərbaycan mətbuatı

Milli maraqların keşiyində dayanan güclü Azərbaycan mətbuatı

23.07.2026 [11:24]

Azərbaycan mətbuatı cəmiyyətin maariflənməsində, ictimai fikrin formalaşmasında və dövlətçilik dəyərlərinin qorunmasında mühüm rol oynayan əsas institutlardan biridir. Prezident İlham Əliyevin qeyd etdiyi kimi: “Əlbəttə ki, mətbuatın fəaliyyəti hər bir insanı maraqlandırır. İnsanlar bütün məlumatı mətbuatdan alırlar. Ona görə, hər bir ölkədə, o cümlədən Azərbaycanda mətbuat qərəzsiz olmalıdır, çevik, operativ fəaliyyət göstərməlidir, insanları məlumatlarla tam şəkildə təmin etməlidir...” Bu fikirlər müasir Azərbaycan mediasının qarşısında duran əsas vəzifələri – obyektivlik, operativlik, peşəkarlıq və milli maraqların müdafiəsini aydın şəkildə ifadə edir. Mətbuat yalnız xəbərləri çatdıran vasitə deyil, həm də cəmiyyətin inkişafına istiqamət verən, dövlətlə vətəndaş arasında etibarlı informasiya körpüsü yaradan mühüm ictimai institutdur.

Azərbaycan milli mətbuatının əsası 1875-ci il iyulun 22-də Həsən bəy Zərdabinin nəşr etdirdiyi “Əkinçi” qəzeti ilə qoyulmuşdur. Həmin gündən etibarən milli mətbuatımız uzun və şərəfli inkişaf yolu keçərək xalqın maariflənməsinə, milli özünüdərkin formalaşmasına və azərbaycançılıq ideologiyasının möhkəmlənməsinə mühüm töhfələr vermişdir. Müxtəlif tarixi mərhələlərdə mətbuat xalqın haqq səsinin ifadəçisi olmuş, milli azadlıq ideyalarının yayılmasına və dövlətçilik ənənələrinin qorunmasına xidmət etmişdir.

Müstəqillik illərində Azərbaycan mediasının inkişafı yeni mərhələyə qədəm qoymuşdur. Ulu Öndər Heydər Əliyevin rəhbərliyi ilə söz və mətbuat azadlığının təmin olunması istiqamətində mühüm qərarlar qəbul edilmiş, 1998-ci ildə senzuranın ləğvi ilə milli mətbuatın inkişafı üçün geniş imkanlar yaradılmışdır. Bu siyasət Prezident İlham Əliyev tərəfindən uğurla davam etdirilərək media sahəsində ardıcıl islahatlar həyata keçirilmiş, jurnalistikanın inkişafı və informasiya mühitinin təkmilləşdirilməsi istiqamətində mühüm addımlar atılmışdır.

Bu gün Azərbaycan mediası rəqəmsal dövrün çağırışlarına uyğun fəaliyyət göstərərək operativ, dəqiq və obyektiv informasiya təqdim edir. Xüsusilə 44 günlük Vətən müharibəsi zamanı və sonrakı dövrdə jurnalistlər informasiya cəbhəsində böyük peşəkarlıq nümayiş etdirərək ölkəmizin haqq səsini beynəlxalq ictimaiyyətə çatdırmaqda mühüm rol oynadılar. Milli maraqların müdafiəsi, dezinformasiyaya qarşı mübarizə və həqiqətlərin dünya ictimaiyyətinə çatdırılması Azərbaycan mediasının əsas prioritetlərindən biri olaraq qalır.

Prezident İlham Əliyevin Azərbaycan mətbuatına verdiyi yüksək qiymət media nümayəndələrinin fəaliyyətinə göstərilən etimadın bariz nümunəsidir. Dövlət başçısının vurğuladığı kimi, bu gün Azərbaycan mətbuatı yüksək inkişaf mərhələsinə yüksəlib və həm operativliyi, həm də milli maraqları qətiyyətlə müdafiə etməsi ilə seçilir. Bu, ölkəmizdə həyata keçirilən uğurlu media siyasətinin nəticəsidir.

22 İyul – Milli Mətbuat Günü münasibətilə bütün jurnalistləri və media əməkdaşlarını ürəkdən təbrik edir, onlara möhkəm cansağlığı, tükənməz yaradıcılıq enerjisi, peşə fəaliyyətlərində yeni uğurlar arzulayırıq. İnanırıq ki, Azərbaycan mətbuatı bundan sonra da obyektivlik, qərəzsizlik və peşəkarlıq prinsiplərinə sadiq qalaraq dövlətimizin inkişafına, milli maraqlarımızın qorunmasına və cəmiyyətimizin düzgün məlumatlandırılmasına layiqli töhfələr verməyə davam edəcəkdir.

Rauf Nəcəfov

YAP Sədərək rayon təşkilatının məsləhətçisi

Paylaş:

Baxılıb: 216 dəfə