Azərbaycanın qlobal gündəliyi Şuşadan təqdim olundu

Bakı:

25 °C

53 %

8 m/s

Əlaqə

AZ RU EN

Ana səhifə / YAP xəbərləri / Azərbaycanın qlobal gündəliyi Şuşadan təqdim olundu

Azərbaycanın qlobal gündəliyi Şuşadan təqdim olundu

20.07.2026 [12:24]

Azərbaycanın müasir dövrdə həyata keçirdiyi müstəqil xarici siyasət, beynəlxalq hüquqa əsaslanan prinsipial mövqeyi və qlobal əməkdaşlığa verdiyi töhfələr ölkəmizin dünya miqyasında nüfuzunu daha da möhkəmləndirib. Regional və beynəlxalq məsələlərdə fəal iştirak edən Azərbaycan siyasi dialoqun təşviqi, etibarlı tərəfdaşlıq münasibətlərinin qurulması və dayanıqlı inkişafın təmin olunması istiqamətində ardıcıl siyasət yürüdür. Bu siyasətin mühüm tərkib hissələrindən biri də media, informasiya təhlükəsizliyi və beynəlxalq kommunikasiya sahəsində əməkdaşlığın genişləndirilməsidir. Məhz bu baxımdan Şuşa Qlobal Media Forumu artıq dünyanın müxtəlif ölkələrindən media nümayəndələrini, ekspertləri və siyasətçiləri bir araya gətirən nüfuzlu beynəlxalq platformaya çevrilib.

IV Şuşa Qlobal Media Forumunda Azərbaycan Respublikasının Prezidenti cənab İlham Əliyevin çıxışı iştirakçılar tərəfindən böyük maraqla qarşılandı. Dövlət başçısı çıxışında həm regional, həm də qlobal gündəmdə duran mühüm məsələlərə toxunaraq Azərbaycanın mövqeyini ətraflı şəkildə izah etdi. Prezident cənab İlham Əliyev vurğuladı ki, informasiya məkanı sürətlə dəyişir və bu dəyişikliklər fonunda medianın məsuliyyəti daha da artır. O qeyd etdi ki, dezinformasiya, saxta xəbərlər və informasiya manipulyasiyaları beynəlxalq münasibətlərə ciddi təsir göstərir və bu çağırışlara qarşı peşəkar jurnalistika mühüm rol oynayır.

Dövlət başçısı Forumun Şuşada keçirilməsinin xüsusi rəmzi məna daşıdığını bildirdi. O qeyd etdi ki, uzun illər işğal altında qalmış Şuşa bu gün yenidən Azərbaycanın mədəniyyət, dialoq və beynəlxalq əməkdaşlıq mərkəzlərindən birinə çevrilib. Prezident cənab İlham Əliyev vurğuladı ki, azad edilmiş ərazilərdə aparılan genişmiqyaslı bərpa və yenidənqurma işləri qısa müddətdə bölgənin simasını tamamilə dəyişib və bu proses beynəlxalq ictimaiyyət tərəfindən də yüksək qiymətləndirilir.

Çıxış zamanı Prezident cənab İlham Əliyev regional təhlükəsizlik məsələlərinə də geniş yer ayırdı. O bildirdi ki, Azərbaycan Cənubi Qafqazda davamlı sülhün və sabitliyin təmin olunmasının tərəfdarıdır. Dövlət başçısı vurğuladı ki, bölgədə uzunmüddətli inkişaf yalnız qarşılıqlı hörmətə, beynəlxalq hüquqa və dövlətlərin suverenliyinin tanınmasına əsaslanan münasibətlər şəraitində mümkündür. Bu baxımdan Azərbaycan sülh gündəliyinə sadiqdir və regionda yeni əməkdaşlıq imkanlarının yaranmasını dəstəkləyir.

Prezident cənab İlham Əliyev Azərbaycanın enerji təhlükəsizliyi sahəsində oynadığı roldan da bəhs etdi. Bildirildi ki, ölkəmiz uzun illərdir Avropanın və digər tərəfdaş ölkələrin etibarlı enerji təchizatçısı kimi çıxış edir. Eyni zamanda yaşıl enerji istiqamətində həyata keçirilən layihələr Azərbaycanın enerji strategiyasının yeni mərhələsini təşkil edir. Qarabağ və Şərqi Zəngəzurun “yaşıl enerji zonası” elan olunması, bərpaolunan enerji layihələrinin genişləndirilməsi ölkənin dayanıqlı inkişaf siyasətinin mühüm istiqamətlərindəndir.

Forum çərçivəsində Prezident cənab İlham Əliyev media nümayəndələrinin çoxsaylı suallarını da cavablandırdı. O, Azərbaycanın xarici siyasət prioritetləri, beynəlxalq təşkilatlarla əməkdaşlığı, regional layihələr, iqtisadi inkişaf, nəqliyyat marşrutları və digər aktual məsələlərlə bağlı fikirlərini bölüşdü. Dövlət başçısı vurğuladı ki, Azərbaycan milli maraqlarını qətiyyətlə müdafiə etməklə yanaşı, beynəlxalq əməkdaşlığın inkişafına da mühüm töhfələr verir.

Prezident cənab İlham Əliyev çıxışında rəqəmsal transformasiya və süni intellekt dövründə medianın qarşısında duran yeni vəzifələrə də toxundu. O qeyd etdi ki, informasiya texnologiyalarının sürətli inkişafı jurnalistikanın imkanlarını genişləndirsə də, eyni zamanda yeni risklər də yaradır. Buna görə peşəkar etikaya sadiqlik, faktların dəqiq yoxlanılması və obyektiv informasiya təqdim olunması əvvəlkindən daha böyük əhəmiyyət daşıyır.

Dövlət başçısı Azərbaycanın beynəlxalq media nümayəndələri üçün açıq ölkə olduğunu vurğulayaraq qeyd etdi ki, xarici jurnalistlərin ölkəmizə səfərləri həqiqətlərin dünya ictimaiyyətinə çatdırılması baxımından mühüm rol oynayır. O bildirdi ki, Qarabağda həyata keçirilən genişmiqyaslı quruculuq işləri, keçmiş məcburi köçkünlərin doğma yurdlarına qayıdışı və regionun inkişafı beynəlxalq medianın diqqət mərkəzində olmalıdır.

IV Şuşa Qlobal Media Forumu bir daha göstərdi ki, Şuşa artıq yalnız Azərbaycanın deyil, bütövlükdə regionun mühüm beynəlxalq dialoq platformalarından birinə çevrilib. Prezident cənab İlham Əliyevin Forumdakı çıxışı Azərbaycanın qlobal proseslərə baxışını, regional əməkdaşlığa verdiyi önəmi, informasiya təhlükəsizliyi və məsuliyyətli jurnalistika ilə bağlı mövqeyini bir daha beynəlxalq ictimaiyyətə çatdırdı. Dövlət başçısının səsləndirdiyi fikirlər Azərbaycanın müstəqil siyasətinin, beynəlxalq nüfuzunun və gələcəyə hesablanmış inkişaf strategiyasının aydın ifadəsi olmaqla yanaşı, qlobal informasiya mühitində etibarlı dialoqun və qarşılıqlı anlaşmanın vacibliyini də bir daha ön plana çıxardı.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 270 dəfə