"Qonşularla qarşılıqlı əlaqələr olmadan, heç zaman tranzit ölkəyə çevrilmək mümkün deyil"

Bakı:

24 °C

83 %

0 m/s

Əlaqə

AZ RU EN

Ana səhifə / YAP xəbərləri / "Qonşularla qarşılıqlı əlaqələr olmadan, heç zaman tranzit ölkəyə çevrilmək mümkün deyil"

"Qonşularla qarşılıqlı əlaqələr olmadan, heç zaman tranzit ölkəyə çevrilmək mümkün deyil"

15.07.2026 [12:34]

Mansur Quliyev

YAP Ağdam rayon təşkilatının sədri

Prezident İlham Əliyevin IV Şuşa Qlobal Media Forumunda səsləndirdiyi fikirlər bir daha göstərdi ki, Azərbaycanın uğurlarının əsasında uzaqgörən siyasi strategiya, etibarlı tərəfdaşlıq və qarşılıqlı hörmət prinsiplərinə əsaslanan xarici siyasət dayanır. Dövlətimizin başçısının qeyd etdiyi kimi, "Qonşularla qarşılıqlı əlaqələr olmadan, heç zaman tranzit ölkəyə çevrilmək mümkün deyil." Bu fikir Azərbaycanın son illərdə qazandığı iqtisadi və geosiyasi nailiyyətlərin mahiyyətini aydın şəkildə ifadə edir.

Azərbaycan yerləşdiyi strateji coğrafi mövqeyi düzgün qiymətləndirərək onu real üstünlüyə çevirə bilmişdir. Şərqlə Qərbi, Şimalla Cənubu birləşdirən nəqliyyat dəhlizlərinin əsas iştirakçısına çevrilən ölkəmiz Prezident İlham Əliyevin rəhbərliyi ilə müasir avtomobil yolları, dəmir yolu xətləri, dəniz limanları və logistika mərkəzləri yaratmışdır. Bu infrastruktur layihələri yalnız Azərbaycanın deyil, bütövlükdə Avrasiya məkanının iqtisadi inkişafına mühüm töhfə verir.

Azərbaycanın tranzit ölkə kimi formalaşması təsadüfi deyil. Bu, uzun illər ərzində həyata keçirilən düşünülmüş diplomatik fəaliyyətin, qonşu dövlətlərlə qarşılıqlı etimada əsaslanan münasibətlərin və regional əməkdaşlıq siyasətinin nəticəsidir. Məhz bu siyasət sayəsində ölkəmiz beynəlxalq nəqliyyat və enerji layihələrinin etibarlı iştirakçısı kimi böyük nüfuz qazanmışdır.

Bu gün Orta Dəhlizin əhəmiyyətinin artması fonunda Azərbaycanın rolu daha da yüksəlir. Avropa ilə Asiyanı birləşdirən əsas logistika marşrutlarından biri olan bu dəhlizin səmərəli fəaliyyəti ölkəmizin yaratdığı müasir infrastruktur və sabit siyasi mühit hesabına mümkün olur. Azərbaycan bütün tərəfdaşları üçün etibarlı və məsuliyyətli tərəfdaş olduğunu dəfələrlə sübut edib.

Prezident İlham Əliyevin vurğuladığı kimi, qonşularla sağlam münasibətlər olmadan regional layihələrin həyata keçirilməsi mümkün deyil. Qarşılıqlı etimad, siyasi dialoq və iqtisadi əməkdaşlıq regionda sabitliyin və inkişafın əsas təminatıdır. Azərbaycan məhz bu prinsiplərə sadiq qalaraq bölgədə əməkdaşlıq mühitinin möhkəmlənməsinə xidmət edir.

44 günlük Vətən müharibəsində əldə olunan tarixi Zəfərdən sonra regionda yeni reallıqlar yaranmışdır. Azərbaycanın təşəbbüsü ilə formalaşan əməkdaşlıq platformaları Cənubi Qafqazın gələcək inkişafı üçün yeni imkanlar açır. Azad edilmiş ərazilərdə həyata keçirilən genişmiqyaslı bərpa və quruculuq işləri, yeni nəqliyyat-kommunikasiya xətlərinin inşası ölkəmizin tranzit potensialını daha da gücləndirir.

Bu gün Azərbaycan yalnız enerji ixrac edən dövlət deyil, həm də beynəlxalq yükdaşımaların təhlükəsiz və etibarlı şəkildə həyata keçirildiyi mühüm logistika mərkəzidir. Dövlətimizin həyata keçirdiyi siyasət ölkəmizi qlobal iqtisadi əlaqələrin ayrılmaz hissəsinə çevirib.

Prezident İlham Əliyevin IV Şuşa Qlobal Media Forumunda səsləndirdiyi bu mühüm fikir Azərbaycanın gələcək inkişaf strategiyasının əsas istiqamətlərindən birini əks etdirir. Qonşularla mehriban münasibətlər, qarşılıqlı faydalı əməkdaşlıq və etibarlı tərəfdaşlıq siyasəti ölkəmizin beynəlxalq mövqeyini daha da möhkəmləndirəcək, Azərbaycanı Avrasiyanın aparıcı tranzit və logistika mərkəzlərindən biri kimi daha da gücləndirəcəkdir.

Paylaş:

Baxılıb: 357 dəfə