Azərbaycan əsgəri hər zaman Vətənə sədaqətin, mərdliyin və qəhrəmanlığın simvolu olub

Bakı:

25 °C

57 %

7 m/s

Əlaqə

AZ RU EN

Ana səhifə / YAP xəbərləri / Azərbaycan əsgəri hər zaman Vətənə sədaqətin, mərdliyin və qəhrəmanlığın simvolu olub

Azərbaycan əsgəri hər zaman Vətənə sədaqətin, mərdliyin və qəhrəmanlığın simvolu olub

23.06.2026 [17:36]

Vətənpərvərlik hər bir xalqın milli ruhunun təməl daşı, onun tarixinin, mədəniyyətinin və gələcəyinin qoruyucusudur. Azərbaycan xalqının əsrlər boyu qazandığı mübarizə ruhu, qəhrəmanlıq ənənəsi və torpağa bağlılığı, xüsusilə də Azərbaycan əsgərinin simasında öz parlaq təcəssümünü tapmışdır. Azərbaycanın müstəqilliyi və ərazi bütövlüyü uğrunda mübarizə aparan hər bir əsgər, vətənpərvərlik anlayışını yalnız şüarla deyil, konkret əməllə sübut etmişdir. Azərbaycan əsgərinin vətən sevgisi qədimdən bu günə uzanan bir tarixin mirasıdır.

Prezident İlham Əliyevin ordu quruculuğu siyasətində diqqət çəkən məqamlardan biri də Azərbaycan Ordusunun dünya hərb sənayesinin ən son nailiyyətləri ilə təchiz olunmasına, müasir hərbi texnikanın idxalına xüsusi diqqət yetirməsi ilə bağlıdır. Azərbaycanın iqtisadi gücündən maksimum faydalanaraq ordumuzu Türkiyə, İsrail, Rusiya, Belarus və digər dövlətlərin müasir hərbi texnikaları ilə təchiz edən, onun davamlı modernləşdirilməsi prosesini həyata keçirən dövlətimizin başçısı bununla Azərbaycan Silahlı Qüvvələrinin Ermənistan ordusu qarşısındakı üstünlüyünü daha da artırdı və peşəkar, ən müasir tələblərə cavab verən orduya çevirdi. Təkcə bir faktı qeyd etmək kifayət edər ki, 44 günlük Vətən müharibəsində Azərbaycanın Türkiyə və İsraildən aldığı kəşfiyyat və zərbə dronları düşmən hədəflərinin müəyyənləşdirilməsində və məhv edilməsində mühüm rol oynadı. Nəticədə işğalçı orduya məxsus milyonlarla dollar dəyərində hərbi texnika, hava hücumundan müdafiə sistemləri, artilleriya qurğuları məhv edildi.
Xarici dövlətlərdən Azərbaycan Ordusunun ehtiyacına uyğun olaraq alınan müasir hərbi texnika və raket sistemləri Vətən müharibəsi zamanı Ermənistanın hərbçilərimizə və mülki insanlarımıza qarşı tətbiq etdiyi ballistik raketlərin havadaca zərərsizləşdirilməsində uğurla istifadə edildi. Məhz bunun sayəsində yaşayış məntəqələrimizi və hərbçilərimizi hədəfə alan bir sıra raketlər, o cümlədən düşmənin Şuşaya atdığı “İsgəndər-M” raketlərinin bir çoxu havadaca vuruldu. Nəticədə təkcə artilleriya və raket sistemlərimizin deyil, mülki insanlarımızın, əsgər və zabitlərimizin təhlükəsizliyi təmin edildi.

Müzəffər Ali Baş Komandan bu şanlı Qələbənin qazanılmasının əsasında ən müasir silahların deyil, Azərbaycan Ordusunun qəhrəman hərbçilərinin dayandığını dəfələrlə vurğulayıb. Dövlətimizin başçısının çıxışlarının birində dediyi bu sözlər Azərbaycan Ordusunun qəhrəmanlığına və peşəkarlığına verilən yüksək qiymətin əyani təsdiqidir: "Bu, yeni nəsil müharibə üsuludur, hansı ki, planlaşdırma, texniki təchizat, texnologiyaların tətbiqi, əməliyyatların düzgün planlaşdırılması və həyata keçirilməsi, hərbçilərimizin döyüş qabiliyyəti və mənəvi ruh birləşir, vəhdət təşkil edir. Ancaq mən bunu artıq bir neçə dəfə demişəm, bu qələbəni qazanan bizim texniki vasitələr yox, əsgər və zabitlərimizdir. Onlar torpağımızı düşməndən qarış-qarış azad edə-edə bu Qələbəni, bu Zəfəri xalqımıza nəsib etdilər. Ona görə bu qələbənin birinci qəhrəmanı Azərbaycan əsgəridir, Azərbaycan zabitidir və hər kəs bunu bilməlidir".

Vətən müharibəsində şanlı Qələbə xalqımızın igid övladlarının qanı-canı bahasına qazanılıb. Müharibədə Silahlı Qüvvələrimizin 3000-dən çox hərbi qulluqçusu şəhid oldu. Şəhidlərimizin və qazilərimizin qəhrəmanlığı dövlətimiz və xalqımız tərəfindən yüksək qiymətləndirilir. Sentyabrın 27-si Prezidentin Sərəncamı ilə şəhidlərimizin xatirəsinə "Anım Günü" elan olunub.

Bu gün Azərbaycan əsgəri yalnız ölkəmizin sərhədlərini qoruyan hərbçi deyil. O, dövlətimizin müstəqilliyinin, xalqımızın qürurunun və gələcəyimizin keşiyində duran müqəddəs bir missiyanın daşıyıcısıdır. Azərbaycan Ordusunun hər bir uğurunun əsasında məhz bu vətənpərvərlik ruhu dayanır.

26 İyun – Silahlı Qüvvələr Günü münasibətilə Ordumuzun bütün şəxsi heyətini təbrik edir, şəhidlərimizin əziz xatirəsini dərin ehtiramla yad edir, qazilərimizə möhkəm can sağlığı arzulayırıq. Yaşasın qüdrətli Azərbaycan Ordusu!

Nurlana Yusifova

YAP Samux rayon təşkilatının əməkdaşı

Paylaş:

Baxılıb: 423 dəfə