Azərbaycan və Türkiyə arasındakı qardaşlıq münasibətləri tarixi küklərə söykənir

Bakı:

24 °C

57 %

4 m/s

Əlaqə

AZ RU EN

Ana səhifə / YAP xəbərləri / Azərbaycan və Türkiyə arasındakı qardaşlıq münasibətləri tarixi küklərə söykənir

Azərbaycan və Türkiyə arasındakı qardaşlıq münasibətləri tarixi küklərə söykənir

11.06.2026 [18:07]

2021-ci il 15 iyun tarixində Azərbaycan Respublikasının Prezidenti cənab İlham Əliyev və Türkiyə Respublikasının Prezidenti Rəcəb Tayyib Ərdoğan tərəfindən “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”nin imzalanması Azərbaycan-Türkiyə münasibətlərində yeni və mühüm mərhələnin başlanğıcı oldu. Şuşa şəhərində imzalanan bu tarixi sənəd iki qardaş ölkə arasında siyasi, iqtisadi, hərbi və humanitar sahələrdə əməkdaşlığın daha da gücləndirilməsinə xidmət edir.

Şuşa Bəyannaməsinin məhz Azərbaycanın mədəniyyət paytaxtı olan Şuşada imzalanması xüsusi rəmzi məna daşıyır. 2020-ci ildə Vətən müharibəsində əldə edilən möhtəşəm Qələbədən sonra azad edilmiş Şuşa şəhərində belə bir mühüm sənədin qəbul olunması Azərbaycanın ərazi bütövlüyünün bərpasının və regionda yeni reallıqların formalaşmasının göstəricisi idi. Bu addım həm də, Azərbaycan və Türkiyənin daim bir-birinin yanında olduğunu bir daha bütün dünyaya nümayiş etdirdi.

Bəyannamədə iki ölkə arasında qarşılıqlı yardım, təhlükəsizlik, müdafiə sənayesi, enerji, nəqliyyat və digər strateji sahələr üzrə əməkdaşlığın inkişaf etdirilməsi əsas istiqamətlər kimi müəyyən olunmuşdur. Xüsusilə, hərbi sahədə əməkdaşlığın daha da genişləndirilməsi regionda sülhün və təhlükəsizliyin təmin olunmasına mühüm töhfə verir. Şuşa Bəyannaməsi eyni zamanda iki dövlətin beynəlxalq məsələlərdə ortaq mövqedən çıxış etməsini və milli maraqların qorunmasında qarşılıqlı dəstəyi təsdiqləyir.

Azərbaycan və Türkiyə arasındakı münasibətlər tarixən dostluq və qardaşlıq prinsiplərinə əsaslanmışdır. Ümummilli lider Heydər Əliyev tərəfindən söylənilən “Bir millət, iki dövlət” ifadəsi bu münasibətlərin əsas fəlsəfəsini təşkil edir. Şuşa Bəyannaməsi də məhz bu ideyanın hüquqi və siyasi müstəvidə daha da möhkəmləndirilməsinə xidmət edir.

Bu sənəd yalnız iki ölkə üçün deyil, bütövlükdə region üçün də, böyük əhəmiyyət daşıyır. Şuşa Bəyannaməsi Cənubi Qafqazda sabitliyin, əməkdaşlığın və inkişafın təmin olunmasına yönəlmiş mühüm siyasi addım kimi qiymətləndirilir. Hazırda Azərbaycan-Türkiyə münasibətləri ən yüksək səviyyədə inkişaf edir və iki qardaş ölkə beynəlxalq arenada bir-birinə daim dəstək göstərir.

Nəticə etibarilə, Şuşa Bəyannaməsi Azərbaycan və Türkiyə arasında müttəfiqlik münasibətlərinin yeni mərhələsini müəyyən edən tarixi sənəddir. Bu bəyannamə iki dövlətin birliyini, həmrəyliyini və ortaq gələcəyə olan inamını bir daha təsdiq edir. Azərbaycan və Türkiyə qardaşlığı bundan sonra da regionda sülhün, təhlükəsizliyin və inkişafın əsas dayaqlarından biri olacaqdır.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 102 dəfə