Heydər Əliyev dühası – Uçurumun bir addımlığından Milli Qurtuluşa aparan dahi liderlik

Bakı:

28 °C

56 %

7 m/s

Əlaqə

AZ RU EN

Ana səhifə / YAP xəbərləri / Heydər Əliyev dühası – Uçurumun bir addımlığından Milli Qurtuluşa aparan dahi liderlik

Heydər Əliyev dühası – Uçurumun bir addımlığından Milli Qurtuluşa aparan dahi liderlik

11.06.2026 [12:00]

Tarixin ən çətin anlarında xalqların taleyini dəyişən şəxsiyyətlər ortaya çıxır. 33 il əvvəl Azərbaycan məhz belə bir məqamı yaşayırdı. Müstəqilliyini yenicə bərpa etmiş dövlət daxili çəkişmələr, siyasi böhran, iqtisadi tənəzzül və vətəndaş qarşıdurması təhlükəsi ilə üz-üzə qalmışdı. Ölkə faktiki olaraq idarəolunmaz vəziyyətə düşmüş, dövlətçiliyin özü belə sual altına düşmüşdü. Azərbaycan uçurumun bir addımlığında idi.

Belə bir taleyüklü anda xalqın ümidləri yalnız bir şəxsə — böyük dövlət xadimi, uzaqgörən siyasətçi Ulu Öndər Heydər Əliyevə yönəldi. Onun siyasi təcrübəsi, qətiyyəti və dövlətçilik təfəkkürü bu ağır vəziyyətdən çıxışın yeganə yolu kimi görülürdü. Xalqın təkidli tələbi ilə Heydər Əliyevin yenidən hakimiyyətə qayıdışı Azərbaycan tarixində xilasedici dönüş nöqtəsi oldu.

15 iyun 1993-cü ildə Heydər Əliyevin Azərbaycan Ali Sovetinin sədri seçilməsi sadəcə vəzifə dəyişikliyi deyildi. Bu, dövlətin dağılmaqdan xilas olunmasının başlanğıcı idi. Bu tarix Azərbaycanın siyasi həyatında sabitliyin, qanunun aliliyinin və milli birliyin bərpasının təməl daşı oldu. Məhz buna görə 15 iyun Milli Qurtuluş Günü kimi tarixə həkk olundu.

Ulu Öndər Heydər Əliyevin hakimiyyətə qayıdışı ilə ilk növbədə ölkədə xaos və anarxiyaya son qoyuldu. Dövlət idarəçiliyi bərpa edildi, qanunsuz silahlı dəstələrin qarşısı alındı, vətəndaş müharibəsi təhlükəsi aradan qaldırıldı. Onun qətiyyətli addımları nəticəsində Azərbaycan parçalanmaqdan xilas oldu və vahid dövlət kimi möhkəmləndi.

Ulu Öndərin fəaliyyətində əsas istiqamətlərdən biri güclü dövlət institutlarının formalaşdırılması idi. O, hüquqi dövlət quruculuğunun əsasını qoydu və müasir idarəetmə sistemini formalaşdırdı. Dövlətin dayaqları möhkəmləndikcə xalqın gələcəyə inamı da artdı.

Ulu Öndər Heydər Əliyev yalnız daxili sabitliyi təmin etməklə kifayətlənmədi, eyni zamanda Azərbaycanın beynəlxalq arenada layiqli yer tutması üçün mühüm addımlar atdı. Balanslaşdırılmış və müstəqil xarici siyasət kursu nəticəsində Azərbaycan dünya dövlətləri ilə etibarlı tərəfdaşlıqlar qurdu və regionda söz sahibi olan gücə çevrildi.

Onun rəhbərliyi ilə ordu quruculuğu istiqamətində də mühüm islahatlar həyata keçirildi. Milli təhlükəsizlik məsələləri prioritetə çevrildi və güclü, peşəkar ordu formalaşdırılmağa başlandı. Bu, gələcəkdə Azərbaycanın ərazi bütövlüyü uğrunda mübarizəsində həlledici rol oynayan əsas amillərdən biri oldu.

Bu gün güclü, sabit və müstəqil Azərbaycan məhz Ulu Öndər Heydər Əliyevin müəyyən etdiyi siyasi kursun nəticəsidir. Onun yaratdığı möhkəm təməl üzərində dövlət daha da inkişaf edərək regionun lider ölkəsinə çevrilib. Azərbaycanın əldə etdiyi uğurlar, beynəlxalq nüfuzu və milli birliyi Ulu Öndərin uzaqgörən siyasətinin bariz təcəssümüdür.

15 İyun – Milli Qurtuluş Günü təkcə keçmişin xatirəsi deyil. Bu tarix xalqın öz Liderinə olan inamının, dövlətçiliyin xilası uğrunda birliyin və qətiyyətin simvoludur. Bu günə nəzər saldıqda aydın görünür ki, əgər 1993-cü ildə Ulu Öndər Heydər Əliyev hakimiyyətə qayıtmasaydı, Azərbaycanın bugünkü gücündən və sabitliyindən danışmaq mümkün olmazdı.

Azərbaycanın uçurumdan zirvəyə uzanan yolu məhz bu dahi Liderin adı ilə bağlıdır. Bu yol qətiyyətin, siyasi müdrikliyin və xalqa bağlılığın yoludur. Tarix bir daha sübut etdi ki, böyük liderlər yalnız dövrünü deyil, bütöv bir xalqın gələcəyini dəyişir.

David Həsənov

YAP Naxçıvan şəhər təşkilatının əməkdaşı

Paylaş:

Baxılıb: 425 dəfə