Enerji siyasətində prioritet istiqamət: “Yaşıl keçid”

Bakı:

27 °C

39 %

5 m/s

Əlaqə

AZ RU EN

Ana səhifə / YAP xəbərləri / Enerji siyasətində prioritet istiqamət: “Yaşıl keçid”

Enerji siyasətində prioritet istiqamət: “Yaşıl keçid”

02.06.2026 [14:43]

Enerji təhlükəsizliyi milli təhlükəsizliyin ən mühüm və ayrılmaz tərkib hissələrindən biri hesab edilir. Ölkəmizin enerji siyasəti 1994-cü ildə “Əsrin müqaviləsi”nin imzalanması ilə başladı. Həyata keçirilən düzgün strategiya nəticəsində Azərbaycan böhrandan və iqtisadi tənəzzüldən xilas olaraq davamlı inkişaf yoluna qədəm qoydu. Neft və qazdan əldə edilən gəlir, müstəqilliyin bərpasından sonrakı illərdə demək olar ki, yeganə gəlir mənbəyi idi.

Ulu Öndər Heydər Əliyevin düşünülmüş enerji siyasəti və sonradan bu siyasətin Prezident İlham Əliyev tərəfindən zamanın tələblərinə uyğun olaraq qətiyyətlə davam etdirilməsi nəticəsində Azərbaycan çox böyük uğurlar əldə etdi. Bir zamanlar enerji böhranı ilə üz-üzə qalan Azərbaycan bu gün regional və beynəlxalq əhəmiyyətli enerji layihələrinin təşəbbüskarı və fəal iştirakçısıdır. Aydın məsələdir ki, neft və qaz tükənən təbii sərvətlərdir, lakin Azərbaycan dövləti gələcək enerji təhlükəsizliyini düşünərək “yaşıl keçidi” enerji siyasətində prioritet istiqamət kimi götürür. Bu istiqamətdə mühüm layihələr icra edilir, xarici investorlar cəlb olunur, eyni zamanda, dövlət tərəfindən də böyük investisiyalar yatırılır. Zəngin ənənəvi enerji mənbələrinə malik olan Azərbaycanın, həmçinin çox böyük həcmdə bərpaolunan enerji potensialı mövcuddur.

Azərbaycanın neft-qaz hasil edən ölkə olaraq tanınması və bu sahədə əldə etdiyi uğurlar bəzi dairələr ilə ölkələr tərəfindən narahatlıqla qarşılanır. Azərbaycan da daxil olmaqla, digər neft-qaz istehsal edən dövlətlər əsassız yerə qınaq obyektinə çevrilirlər. “Bakı Enerji Həftəsi”ndəki çıxışı zamanı Prezident İlham Əliyev haqlı olaraq bu məsələyə diqqət çəkərək bildirdi ki, ölkələr neftin olub-olmaması ilə deyil, bu gəlirlərdən necə istifadə etdiklərinə görə mühakimə edilməlidir.

Prezident İlham Əliyev çıxışında Azərbaycanın enerji siyasətinin əsasının qoyulmasından, həyata keçirilən enerji layihələrindən, eləcə də enerji siyasətinin diversifikasiyasından geniş bəhs etdi. Ölkə başçısı həmçinin vurğuladı ki, Azərbaycan bir çox dövlətin enerji təhlükəsizliyində mühüm rol oynayır. Hazırda 16 ölkə Azərbaycandan qaz idxal edir. Bundan başqa, Azərbaycan etibarlı neft və neft məhsulları təchizatçısıdır. Yaxın gələcəkdə ölkəmiz xaricə “yaşıl enerji” də ixrac edəcəkdir. Bir çox ölkənin enerji təhlükəsizliyini təmin etməsi, eyni zamanda, Prezident İlham Əliyevin həyata keçirdiyi uğurlu xarici siyasət Azərbaycanı artıq dünyada orta gücə çevirmişdir. Bu gün Azərbaycan regional və beynəlxalq layihələrdə həlledici çəkiyə malikdir və etibarlı tərəfdaş olaraq qəbul edilir.

Anar Şahmuradov

YAP Ağdaş rayon təşkilatı Aparatının ideoloji işlər üzrə məsləhətçisi

Paylaş:

Baxılıb: 388 dəfə