Bütün regionlar canlandı, regionlarda məşğulluq artdı və böyük infrastruktur layihələri icra edildi

Bakı:

16 °C

67 %

9 m/s

AZ RU EN

Ana səhifə / YAP xəbərləri / Bütün regionlar canlandı, regionlarda məşğulluq artdı və böyük infrastruktur layihələri icra edildi

Bütün regionlar canlandı, regionlarda məşğulluq artdı və böyük infrastruktur layihələri icra edildi

02.06.2026 [10:58]

Göyüş Göyüşov

YAP Nərimanov rayon təşkilatının gənc fəalı

Mayın 25-də Prezident İlham Əliyevin sədrliyi ilə keçirilən kənd təsərrüfatı məsələlərinə həsr olunmuş müşavirədə səsləndirilən fikirlər bir daha göstərdi ki, aqrar sahənin inkişafı dövlət siyasətinin əsas istiqamətlərindən biri olaraq qalır. Müşavirədə yalnız kənd təsərrüfatının mövcud vəziyyəti deyil, eyni zamanda ölkənin regional inkişafı, ərzaq təhlükəsizliyi, su ehtiyatlarından səmərəli istifadə və gələcək inkişaf hədəfləri geniş şəkildə müzakirə edildi.

Çıxış zamanı Prezident İlham Əliyev son illər ərzində regionların inkişafı istiqamətində həyata keçirilən proqramların nəticələrinə toxunaraq qeyd etdi ki, vaxtilə qarşıda duran əsas məqsəd bölgələrin iqtisadi potensialını gücləndirmək, yeni iş yerləri yaratmaq və infrastruktur problemlərini aradan qaldırmaq idi. Bu istiqamətdə həyata keçirilən ardıcıl siyasət nəticəsində ölkənin bütün bölgələrində böyük dəyişikliklər baş verdi.

Dövlət başçısının “Bütün regionlar canlandı, regionlarda məşğulluq artdı və böyük infrastruktur layihələri icra edildi” fikri əslində son iyirmi ildən artıq dövrdə həyata keçirilən siyasətin qısa yekunu kimi qiymətləndirilə bilər. Bu gün Azərbaycanın istənilən bölgəsinə səfər edən hər kəs həyata keçirilən dəyişiklikləri aydın şəkildə görə bilir. Yeni yollar, körpülər, elektrik və qaz xətləri, su layihələri, sosial obyektlər və istehsal müəssisələri regionların simasını tamamilə dəyişib.

Prezident çıxışında xüsusilə vurğuladı ki, regional inkişaf proqramları qəbul olunarkən əsas məqsədlərdən biri kənd təsərrüfatının inkişafına təkan vermək idi. Çünki kənd təsərrüfatı yalnız iqtisadi sahə deyil, eyni zamanda məşğulluğun təmin olunmasında mühüm rol oynayan istiqamətdir. Bu gün minlərlə insanın işlə təmin olunması, kənd yerlərində iqtisadi fəallığın artması və sahibkarlığın genişlənməsi həyata keçirilən siyasətin nəticəsidir.

Müşavirədə diqqət çəkən məqamlardan biri də dövlət başçısının kənd təsərrüfatında son illər müşahidə olunan dinamika ilə bağlı fikirləri oldu. Prezident İlham Əliyev açıq şəkildə bildirdi ki, son dövrlərdə aqrar sahədə inkişaf tempi onu tam qane etmir. Bu yanaşma göstərir ki, əldə olunan uğurlara baxmayaraq, qarşıda duran vəzifələr daha böyükdür və yeni mərhələdə daha ciddi nəticələr tələb olunur. Məhz bu səbəbdən kənd təsərrüfatının inkişafına dair yeni Dövlət Proqramı hazırlanır.

Prezidentin çıxışından aydın görünürdü ki, qarşıdakı dövrdə əsas diqqət yalnız istehsalın artırılmasına deyil, eyni zamanda məhsuldarlığın yüksəldilməsinə yönəldiləcək. Çünki müasir dövrdə kənd təsərrüfatının inkişafı sadəcə əkin sahələrinin genişləndirilməsi ilə deyil, innovativ texnologiyaların tətbiqi, səmərəli idarəetmə və elmi yanaşmalar vasitəsilə mümkün olur.

Müşavirədə su məsələsi xüsusi yer tutdu. Dövlət başçısı qeyd etdi ki, iqlim dəyişiklikləri fonunda su ehtiyatlarının qorunması və düzgün idarə olunması strateji əhəmiyyət daşıyır. Son illərdə ölkədə böyük su anbarlarının tikilməsi, kanalların yenidən qurulması və meliorasiya tədbirlərinin həyata keçirilməsi məhz bu məqsədə xidmət edib. Bununla belə, mövcud çağırışlar yeni yanaşmalar tələb edir.

Prezident İlham Əliyev vurğuladı ki, gələcəkdə əkin strukturu mövcud su ehtiyatlarına uyğun formalaşdırılmalıdır. Bu fikir kənd təsərrüfatında yeni yanaşmanın əsas istiqamətlərindən biri kimi diqqət çəkir. Çünki su resurslarının məhdud olduğu şəraitdə daha səmərəli istehsal modelinin qurulması vacib məsələdir.

Çıxış zamanı subsidiya mexanizmlərinə də toxunuldu. Prezident qeyd etdi ki, Azərbaycan bu sahədə dünyanın nadir ölkələrindən biridir və fermerlərə geniş dəstək mexanizmləri tətbiq olunur. Yanacaq, gübrə və digər güzəştlər kənd təsərrüfatının inkişafına mühüm dəstək verir. Bununla yanaşı, dövlət başçısı bu istiqamətdə təkmilləşdirmə imkanlarının da mövcud olduğunu bildirdi.

Müşavirədə kənd təsərrüfatının gələcək inkişaf modelinin əsas istiqamətləri də müəyyənləşdirildi. Burada resurslardan səmərəli istifadə, yüksək əlavə dəyər yaradan istehsalın artırılması, bazar inteqrasiyasının genişləndirilməsi və texnologiyaya əsaslanan aqrar sistemin qurulması əsas hədəflər kimi göstərildi. Bu yanaşma onu göstərir ki, qarşıdakı illərdə kənd təsərrüfatında keyfiyyət baxımından yeni mərhələyə keçid nəzərdə tutulur.

Bu gün Azərbaycan ərzaq təhlükəsizliyinin təmin olunmasını milli təhlükəsizlik məsələsi kimi qiymətləndirir. Dünyada baş verən iqtisadi və siyasi proseslər fonunda daxili istehsalın gücləndirilməsi xüsusi əhəmiyyət daşıyır. Prezident İlham Əliyevin müşavirədə səsləndirdiyi fikirlər də göstərir ki, bu istiqamətdə məqsədyönlü siyasət davam etdiriləcək və aqrar sektorun inkişafı dövlətin əsas prioritetlərindən biri olaraq qalacaq.

Mayın 25-də keçirilən müşavirə bir daha göstərdi ki, regionların inkişafı, kənd təsərrüfatının modernləşdirilməsi və yeni iqtisadi imkanların yaradılması Azərbaycanın gələcək inkişaf strategiyasında mühüm yer tutur. Son illərdə əldə olunan nəticələr mühüm uğurlar sayılsa da, qarşıda duran hədəflər daha böyükdür. Dövlət başçısının müşavirədə verdiyi mesajlar da məhz Azərbaycanın növbəti inkişaf mərhələsinə hazırlıq prosesinin tərkib hissəsi kimi qiymətləndirilə bilər.

Paylaş:

Baxılıb: 91 dəfə