Kənd təsərrüfatının inkişafı dövlət siyasətinin prioritetidir

Bakı:

25 °C

52 %

2 m/s

Əlaqə

AZ RU EN

Ana səhifə / YAP xəbərləri / Kənd təsərrüfatının inkişafı dövlət siyasətinin prioritetidir

Kənd təsərrüfatının inkişafı dövlət siyasətinin prioritetidir

26.05.2026 [16:15]

Mayın 25-də Azərbaycan Respublikasının Prezidenti İlham Əliyevin sədrliyi ilə kənd təsərrüfatı məsələlərinə həsr olunmuş geniş müşavirə keçirilib. Müşavirədə aqrar sektorun mövcud vəziyyəti, qarşıda duran əsas vəzifələr, ərzaq təhlükəsizliyi, su təminatı, fermerlərin problemləri və kənd təsərrüfatının dayanıqlı inkişafı məsələləri geniş müzakirə olunub. Dövlət başçısının çıxışı kənd təsərrüfatının ölkə iqtisadiyyatında strateji sahə olduğunu bir daha nümayiş etdirib.

Prezident İlham Əliyev müşavirədə bildirib ki, kənd təsərrüfatının inkişafı Azərbaycan üçün yalnız iqtisadi məsələ deyil, həm də sosial sabitlik, məşğulluq və ərzaq təhlükəsizliyi baxımından mühüm əhəmiyyət daşıyır. Dövlət başçısı vurğulayıb ki, son illərdə aqrar sahənin inkişafı istiqamətində böyük addımlar atılıb, fermerlərə subsidiyalar verilib, texnika təminatı yaxşılaşdırılıb və kənd yerlərində infrastruktur layihələri həyata keçirilib.

Prezident İlham Əliyev qeyd edib ki, regionların sosial-iqtisadi inkişaf proqramları çərçivəsində kəndlərdə yollar çəkilib, suvarma sistemləri yenilənib, elektrik və qaz təchizatı yaxşılaşdırılıb. Bütün bunlar kənd təsərrüfatının inkişafına müsbət təsir göstərib və kənd əhalisinin rifahının yüksəlməsinə xidmət edib.

Müşavirədə ərzaq təhlükəsizliyi məsələsinə xüsusi diqqət ayrılıb. Prezident İlham Əliyev bildirib ki, dünyada baş verən geosiyasi proseslər, iqlim dəyişiklikləri və qlobal iqtisadi böhranlar hər bir ölkəni daxili istehsal imkanlarını artırmağa vadar edir. Azərbaycan da, bu istiqamətdə məqsədyönlü siyasət həyata keçirir.

Dövlət başçısı yerli istehsalın artırılmasının vacibliyini vurğulayaraq bildirib ki, idxaldan asılılığın minimuma endirilməsi əsas məqsədlərdən biridir. Xüsusilə taxılçılıq, heyvandarlıq, meyvəçilik və tərəvəzçilik sahələrində məhsuldarlığın artırılması üçün yeni proqramların hazırlanmasının vacibliyi qeyd olunub.

Müşavirədə su ehtiyatlarının idarə olunması və suvarma məsələləri də geniş müzakirə edilib. Prezident İlham Əliyev qeyd edib ki, iqlim dəyişiklikləri nəticəsində regionda su qıtlığı problemi daha da aktuallaşıb. Buna görə də yeni su anbarlarının tikintisi, kanalların yenidən qurulması və müasir suvarma texnologiyalarının tətbiqi mühüm əhəmiyyət daşıyır.

Dövlət başçısı damcılı suvarma və digər müasir metodların tətbiqinin genişləndirilməsinin vacibliyini bildirib. Onun sözlərinə görə, su ehtiyatlarından səmərəli istifadə həm məhsuldarlığın artırılmasına, həm də ekoloji tarazlığın qorunmasına xidmət edir.

Prezident İlham Əliyev müşavirədə fermerlərin sosial müdafiəsinin və maliyyə imkanlarının gücləndirilməsinin dövlət siyasətinin əsas istiqamətlərindən biri olduğunu bildirib. Subsidiyaların verilməsi, güzəştli kreditlərin ayrılması və kənd təsərrüfatı texnikasının lizinq yolu ilə təqdim olunması fermerlər üçün mühüm dəstək mexanizmləridir.

Qeyd olunub ki, aqrar sahədə çalışan insanların rifahının yüksəldilməsi kəndlərdən şəhərlərə miqrasiyanın qarşısının alınmasına da müsbət təsir edir. Dövlət başçısı aidiyyəti qurumlara fermerlərin müraciətlərinə daha həssas yanaşılması və mövcud problemlərin operativ həll edilməsi ilə bağlı tapşırıqlar verib.

Müşavirədə işğaldan azad olunmuş ərazilərin kənd təsərrüfatı potensialı da xüsusi vurğulanıb. Prezident İlham Əliyev bildirib ki, Qarabağ və Şərqi Zəngəzur bölgələri münbit torpaqlara və geniş su ehtiyatlarına malikdir. Həmin ərazilərdə müasir aqrar komplekslərin yaradılması, ağıllı kənd layihələrinin həyata keçirilməsi və innovativ texnologiyaların tətbiqi nəzərdə tutulur. Dövlət başçısı qeyd edib ki, bu ərazilərin kənd təsərrüfatı dövriyyəsinə qaytarılması Azərbaycanın ümumi aqrar istehsal gücünü əhəmiyyətli dərəcədə artıracaq.

Mayın 25-də Prezident İlham Əliyevin sədrliyi ilə keçirilən müşavirə Azərbaycan kənd təsərrüfatının gələcək inkişaf strategiyasının müəyyənləşdirilməsi baxımından mühüm əhəmiyyət daşıyır. Müşavirədə səsləndirilən fikirlər və verilən tapşırıqlar göstərir ki, dövlət aqrar sektorun inkişafını prioritet məsələ kimi diqqət mərkəzində saxlayır.

Sahib Şükürov

YAP Göyçay rayon təşkilatının sədri

Paylaş:

Baxılıb: 178 dəfə