Müstəqilliyimiz – Xalqımızın ən böyük sərvəti

Bakı:

27 °C

39 %

5 m/s

Əlaqə

AZ RU EN

Ana səhifə / YAP xəbərləri / Müstəqilliyimiz – Xalqımızın ən böyük sərvəti

Müstəqilliyimiz – Xalqımızın ən böyük sərvəti

26.05.2026 [10:29]

28 May Azərbaycan xalqının tarixində ən mühüm və qürurverici günlərdən biridir. 1918-ci il mayın 28-də Azərbaycan Xalq Cümhuriyyətinin yaradılması ilə xalqımız özünün müstəqil dövlətini quraraq tarixdə yeni bir səhifə açdı. Şərqdə ilk demokratik və parlamentli respublikanın məhz Azərbaycanda yaranması xalqımızın yüksək dövlətçilik təfəkkürünün və azadlıq ruhunun bariz nümunəsi idi. Azərbaycan xalqı bütün dövrlərdə müstəqillik uğrunda mübarizə aparmış, öz milli kimliyini və dövlətçilik ənənələrini qorumağa çalışmışdır.

Lakin tarix göstərir ki, müstəqilliyi qazanmaq qədər onu qorumaq da çətindir. Azərbaycan xalqı 1991-ci ildə dövlət müstəqilliyini yenidən bərpa etdikdən sonra çox ağır və mürəkkəb dövrlərlə üzləşdi. Ölkədə siyasi böhran, iqtisadi çətinliklər, hakimiyyət uğrunda mübarizə və Ermənistanın Azərbaycana qarşı işğalçılıq siyasəti dövlətimizin gələcəyini ciddi təhlükə altında qoymuşdu. Həmin dövrdə Azərbaycan parçalanmaq və müstəqilliyini itirmək təhlükəsi ilə qarşı-qarşıya idi.

Məhz belə bir ağır və taleyüklü zamanda xalqın tələbi ilə Ümummilli Lider Heydər Əliyev hakimiyyətə qayıtdı. Ulu Öndərin siyasi hakimiyyətə dönüşü Azərbaycan dövlətçiliyinin xilası oldu. Heydər Əliyevin uzaqgörən siyasəti, zəngin dövlətçilik təcrübəsi və qətiyyəti nəticəsində ölkədə sabitlik yaradıldı, xaosun qarşısı alındı və Azərbaycanın müstəqilliyi qorundu. Ulu Öndər hər zaman bildirirdi ki, “Müstəqilliyi əldə etmək nə qədər çətindirsə, onu qoruyub saxlamaq ondan da çətindir.” Bu fikir Azərbaycanın gələcək inkişaf strategiyasının əsasını təşkil edirdi.

Heydər Əliyev qısa müddət ərzində dövlət idarəçiliyini möhkəmləndirdi, hüquqi və demokratik dövlət quruculuğu istiqamətində mühüm addımlar atdı. Azərbaycan Ordusunun formalaşdırılması, iqtisadi islahatların həyata keçirilməsi və beynəlxalq əlaqələrin genişləndirilməsi məhz onun rəhbərliyi dövründə baş verdi. 1994-cü ildə imzalanan “Əsrin müqaviləsi” Azərbaycanın iqtisadi inkişafında yeni mərhələnin başlanğıcı oldu. Bu müqavilə ölkəmizin dünya iqtisadiyyatına inteqrasiyasını sürətləndirdi və Azərbaycanın beynəlxalq nüfuzunu artırdı.

Ulu Öndər Heydər Əliyev Azərbaycan gəncliyinə hər zaman böyük diqqət və qayğı göstərirdi. O, gəncləri xalqımızın gələcəyi hesab edir, onların milli ruhda və vətənpərvərlik hissi ilə böyüməsinin vacibliyini vurğulayırdı. Heydər Əliyevin müəyyən etdiyi siyasi kurs bu gün də uğurla davam etdirilir və Azərbaycan həmin siyasətin nəticəsində sürətlə inkişaf edir.

Cənab Prezident İlham Əliyevin rəhbərliyi ilə Azərbaycan daha da güclənmiş və dünya miqyasında böyük nüfuz qazanmışdır. Dövlət başçısının həyata keçirdiyi uğurlu daxili və xarici siyasət nəticəsində ölkəmiz regionun lider dövlətinə çevrilmişdir. İqtisadi inkişaf, müasir infrastruktur layihələri, sosial rifahın yüksəldilməsi və ordu quruculuğu sahəsində həyata keçirilən işlər Azərbaycanın qüdrətini daha da artırmışdır.

Prezident İlham Əliyevin ən böyük tarixi xidmətlərindən biri Azərbaycanın ərazi bütövlüyünün bərpa olunmasıdır. 2020-ci ildə Müzəffər Ali Baş Komandanın rəhbərliyi ilə Azərbaycan Ordusu Vətən müharibəsində böyük Qələbə qazandı. Otuz ilə yaxın işğal altında qalan torpaqlarımız azad edildi, Azərbaycanın suverenliyi və ərazi bütövlüyü təmin olundu. Bu tarixi Zəfər Azərbaycan xalqının milli birliyinin, güclü dövlət siyasətinin və ordumuzun qüdrətinin nəticəsi idi. Prezident İlham Əliyevin qətiyyəti və siyasi iradəsi sayəsində xalqımızın ən böyük arzusu gerçəkləşdi.

Bu gün azad olunmuş torpaqlarda geniş quruculuq işləri aparılır. Qarabağ və Şərqi Zəngəzur bölgələri yenidən dirçəldilir, yollar, məktəblər, xəstəxanalar və yaşayış kompleksləri inşa olunur. Prezident İlham Əliyevin rəhbərliyi ilə həyata keçirilən bu layihələr Azərbaycanın gələcək inkişafının və gücünün göstəricisidir.

28 May – Müstəqillik Günü bu gün hər bir azərbaycanlı üçün böyük qürur mənbəyidir. Bu əlamətdar tarix bizə müstəqilliyin necə böyük nemət olduğunu xatırladır. Müstəqillik xalqımızın milli sərvəti, dövlətimizin ən böyük dəyəridir. Azərbaycan xalqı bu gün müstəqil, güclü və qalib ölkənin vətəndaşı olmağın qürurunu yaşayır.

Qoy Azərbaycanın üçrəngli bayrağı daim yüksəklərdə dalğalansın. Qoy Ulu Öndər Heydər Əliyevin ideyaları və Prezident İlham Əliyevin həyata keçirdiyi uğurlu siyasət nəticəsində dövlətimiz daha da güclənsin və inkişaf etsin. Yaşasın müstəqil Azərbaycan!

Fərzalı Fərzalıyev

YAP Ağcabədi rayon təşkilatı üzrə Qaravəlli

Ərazi Partiya Təşkilatının sədri

Paylaş:

Baxılıb: 273 dəfə