İdman sahəsində daha böyük zirvələr fəth olunacaq

Bakı:

15 °C

82 %

0 m/s

Əlaqə

AZ RU EN

Ana səhifə / YAP xəbərləri / İdman sahəsində daha böyük zirvələr fəth olunacaq

İdman sahəsində daha böyük zirvələr fəth olunacaq

05.05.2026 [13:42]

Ümummilli Lider Heydər Əliyev hakimiyyətdə olduğu dövrlərdə bütün sahələrə, o cümlədən Azərbaycan idmanına da böyük diqqət və qayğı göstərmiş, bu vacib sahənin inkişafı ilə bağlı genişmiqyaslı tədbirlər həyata keçirmişdir. Ulu Öndər idmanın mühüm əhəmiyyəti barədə deyirdi: “Biz bu gün müstəqil dövlətimizi qurarkən gələcək nəsillərimiz barədə düşünməliyik. Bizdən sonra gələn nəsillər fiziki cəhətdən daha da möhkəm, əqli cəhətdən daha da sağlam olsunlar. Biz buna nail olmaq üçün idmana, bədən tərbiyəsinə çox ciddi fikir verməliyik. Hesab edirəm ki, bu sahədə çox işlər görməliyik, bir çox tədbirləri həyata keçirməliyik”.

Ümummilli Lider Heydər Əliyev siyasi kursunun layiqli davamçısı Möhtərəm prezidentimiz cənab İlham Əliyev 2003-cü ilin 15 oktyabrında Dövlət Başçısı seçildikdən sonra xalqın mənəvi və fiziki sağlamlığı baxımından strateji əhəmiyyət daşıyan bu sahəyə dövlət qayğısının gücləndirilməsini təmin etmiş, Azərbaycanın dünya idman ailəsinin bərabərhüquqlu üzvünə çevrilməsinə, kütləvi idman ölkəsi kimi məşhurlaşmasına nail olmuşdur. Dövlət Başçısı tərəfindən qalib komandalarla və idmançılarla keçirilən görüşlər bu sahəyə göstərilən diqqətin bariz nümunəsidir. Bu cür görüşlər təkcə idmançıların uğurlarının qiymətləndirilməsi deyil, həm də gələcək hədəflərin müəyyənləşdirilməsi baxımından mühüm əhəmiyyət kəsb edir.

Prezident İlham Əliyev Albaniyanın paytaxtı Tirana şəhərində keçirilmiş Avropa çempionatında komanda hesabında Avropa çempionu olmuş yunan-Roma və sərbəst güləş üzrə idmançıları, eləcə də qadın güləşi üzrə medal qazanan idmançıları qəbul edib. Dövlətimizin Başçısı idmançıların əldə etdikləri yüksək nəticələri və ölkənin idman uğurlarında oynadıqları rolu xüsusi qeyd edib. Ölkə rəhbəri bildirib ki, bizim bayrağımız qaldırılanda bütün Azərbaycan xalqı qürur hissi keçirir, sevinir. Bu qələbə sevincini idmançılarımız xalqımıza bəxş edir və bu da öz növbəsində gənc nəsli vətənpərvərlik ruhunda tərbiyə etmək üçün çox önəmli amildir. İdman, ümumiyyətlə, cəmiyyətimizin ayrılmaz hissəsidir və xüsusilə son illər ərzində idmanda gedən müsbət proseslər, əlbəttə ki, hamımızı sevindirir. Federasiyaya gəldikdə onu da qeyd etməliyəm ki, bizim tanınmış idmançılarımız, Olimpiya çempionları federasiya rəhbərliyində təmsil olunurlar. Məşqçilər arasında da tanınmış idmançılar təmsil olunur. Bu gün məşqçi kimi fəaliyyət göstərən idmançıların yarışlarını vaxtilə mən özüm izləmişəm, həm Bakıda, həm Olimpiya Oyunlarında onlara azarkeşlik etmişəm. İndi isə onların yetirmələri bizi sevindirir. Bax belə, nəsillər dəyişdikcə güləş və bütövlükdə idman Azərbaycanda nəinki yaşayır, hətta inkişaf edir və yeni zirvələrə çatır. Nəsillər dəyişir, amma bir şey dəyişmir, o da Azərbaycan idmanının uğurları. Əlbəttə, indi federasiya, xüsusilə bölgələrdə olan gənc idmançıları məşq, təlim toplanışlarına cəlb etmək üçün işini bundan sonra da təkmilləşdirəcək. Çünki bu gün hər bir bölgədə həm Olimpiya İdman kompleksləri var, eyni zamanda, güləş zalları. Ona görə bu seleksiya işi, əlbəttə ki, gələcək uğurlarımızın əsasını təşkil edəcək.

Azərbaycan idmanının ümumi inkişafı barədə Dövlət Başçısı qeyd edib ki, həm Olimpiya Oyunlarında, həm də dünya, Avropa çempionatlarında bizim idmançılarımız ölkəmizi ləyaqətlə təmsil edirlər. Əlbəttə ki, uğurlarla bərabər məğlubiyyətlər də olur. Amma idmanda hər şey mümkündür. Əsas odur ki, idmançılarımızda qələbə əzmi çox güclüdür və bir daha ölkəmizin ümumi inkişafını əks etdirir. Bu gün qalib dövlət və qalib xalq kimi yaşayan dövlətimiz, xalqımız, o cümlədən idman uğurları ilə fəxr edir. Mən sizi bu münasibətlə bir daha təbrik edirəm. Mənim idmançılarla görüşlərim müntəzəm xarakter daşıyır. 30 ilə yaxın müddət ərzində Azərbaycan Olimpiya Komitəsinə rəhbərlik edirəm. Bu 30 ilə yaxın müddət ərzində, əlbəttə ki, bir çox müsbət məqamlar olub. Əsas odur ki, idmanın dayanıqlı inkişafı, uğurlarımızın ardıcıl şəkildə davam etməsi və gənc nəslin yetişməsi – hər şey mənim gözümün önündə keçib. Görün, neçə nəsil dəyişib, amma bu gün biz yenə də uğurlarla fəxr edirik. Əsas budur və əminəm, həm Güləş Federasiyası, həm bizim digər federasiyalarımız gələcəkdə öz işlərini elə quracaqlar ki, Azərbaycan xalqı idman yarışlarına baxanda daim sevinc hissləri keçirsin.

Bəli, ölkəmizdə həyata keçirilən idman siyasəti strateji baxımdan düzgün qurulmuş və davamlı inkişaf prinsiplərinə əsaslanır. Bu sahəyə göstərdiyi diqqət və qayğı idmanın ölkədə vacib istiqamətlərdən olduğunu bir daha təsdiqləyir. Qələbələrin ardıcıl xarakter alması, beynəlxalq arenada əldə olunan nailiyyətlərin artması və gənc nəslin idmana artan marağı gələcəkdə Azərbaycanın idman sahəsində daha böyük zirvələr fəth edəcəyindən xəbər verir.

Babək Vələdov
YAP Qazax rayon təşkilatının məsləhətçisi

Paylaş:

Baxılıb: 155 dəfə