Azərbaycan – Avropa Şurası münasibətləri: strateji tərəfdaşlıq və yeni əməkdaşlıq mərhələsi

Bakı:

26 °C

73 %

7 m/s

AZ RU EN

Ana səhifə / YAP xəbərləri / Azərbaycan – Avropa Şurası münasibətləri: strateji tərəfdaşlıq və yeni əməkdaşlıq mərhələsi

Azərbaycan – Avropa Şurası münasibətləri: strateji tərəfdaşlıq və yeni əməkdaşlıq mərhələsi

13.03.2026 [14:03]

Müasir beynəlxalq münasibətlər sistemində dövlətlərin nüfuzu yalnız onların iqtisadi və siyasi gücü ilə deyil, həm də beynəlxalq təşkilatlarla qurduğu səmərəli əməkdaşlıqla müəyyən olunur. Azərbaycan Respublikasının Avropa məkanı ilə münasibətləri bu baxımdan xüsusi əhəmiyyət daşıyır. Bu münasibətlər içərisində Avropa Şurası və ümumilikdə Avropa institutları ilə əməkdaşlıq ölkəmizin xarici siyasətinin mühüm istiqamətlərindən biridir.

Azərbaycan müstəqilliyini bərpa etdikdən sonra Avropa məkanına inteqrasiya kursunu ardıcıl şəkildə həyata keçirməyə başladı. 2001-ci ildə ölkəmizin Avropa Şurası-na üzv qəbul edilməsi bu siyasətin mühüm nəticəsi idi. Bu hadisə Azərbaycanın beynəlxalq nüfuzunun artmasına, hüquqi dövlət quruculuğunun güclənməsinə və demokratik institutların inkişafına yeni imkanlar yaratdı.

Bu gün Azərbaycan ilə Avropa İttifaqı arasında əməkdaşlıq siyasi dialoq, enerji təhlükəsizliyi, nəqliyyat, iqtisadi əlaqələr və regional sabitlik kimi mühüm istiqamətləri əhatə edir. Bu münasibətlərin inkişafında yüksək səviyyəli görüşlər xüsusi rol oynayır. Məhz bu baxımdan 2026-cı il martın 11-də Bakıda Prezident İlham Əliyev ilə Avropa İttifaqı Şurasının Prezidenti Antonio Koşta arasında keçirilən görüş Azərbaycan–Avropa münasibətlərinin inkişafında mühüm mərhələ kimi qiymətləndirilir. Görüş zamanı tərəflər siyasi dialoqun genişləndirilməsi, enerji əməkdaşlığının dərinləşdirilməsi, nəqliyyat və təhlükəsizlik sahələrində yeni əməkdaşlıq imkanlarını müzakirə etdilər.

Prezident İlham Əliyev birgə bəyanat zamanı Azərbaycanın Avropa ilə əməkdaşlığa böyük önəm verdiyini vurğulayaraq qeyd etdi: “Biz Sizin səfərinizə böyük əhəmiyyət veririk və əminəm ki, bu səfər son dövrlər çox uğurla inkişaf edən münasibətlərimizin daha da möhkəmlənməsinə mühüm töhfə verəcək.” Dövlət başçısı həmçinin vurğuladı ki, Azərbaycan ilə Avropa arasında dialoq son illər xüsusilə fəal mərhələyə daxil olub və tərəflər arasında qarşılıqlı etimada əsaslanan əməkdaşlıq formalaşıb.

Birgə mətbuat bəyanatında enerji əməkdaşlığı xüsusi yer tutdu. Prezident İlham Əliyev qeyd etdi ki, enerji sahəsi Azərbaycan ilə Avropa arasında tərəfdaşlığın əsas sütunlarından biridir və ölkəmiz Avropanın enerji təhlükəsizliyində mühüm rol oynayır. Bu gün Azərbaycan qazı artıq onlarla Avropa ölkəsinə ixrac olunur və bu əməkdaşlığın genişlənməsi üçün böyük potensial mövcuddur. Tərəflər eyni zamanda təhlükəsizlik, nəqliyyat və regional əməkdaşlıq məsələlərinə də toxundular. Xüsusilə Orta Dəhliz layihəsinin inkişafı, Avropa ilə Asiya arasında yeni nəqliyyat imkanlarının yaradılması kimi məsələlər gələcək əməkdaşlığın prioritet istiqamətləri kimi qeyd edildi.

Bütün bunlar göstərir ki, Azərbaycan bu gün yalnız regionun deyil, həm də Avropa məkanının mühüm tərəfdaşlarından birinə çevrilib. Azərbaycanın enerji təhlükəsizliyinə verdiyi töhfələr, nəqliyyat layihələri və regional sabitlik naminə həyata keçirdiyi siyasət Avropa dövlətləri tərəfindən də yüksək qiymətləndirilir. Azərbaycan ilə Avropa Şurası və ümumilikdə Avropa institutları arasında münasibətlər qarşılıqlı hörmət, bərabərhüquqlu tərəfdaşlıq və konstruktiv dialoq prinsiplərinə əsaslanır.

2026-cı il martın 11-də Bakıda keçirilən görüş isə bir daha göstərdi ki, Azərbaycan ilə Avropa arasında əməkdaşlıq yalnız siyasi münasibətlər deyil, həm də enerji təhlükəsizliyi, iqtisadi inkişaf və regional sabitlik baxımından strateji əhəmiyyət daşıyır.

Sevinc Xəlilova

YAP Samux rayon təşkilatının sədr müavini

Paylaş:

Baxılıb: 470 dəfə