Azərbaycan terrora qarşı qəti mövqeyini göstərdi

Bakı:

11 °C

82 %

8 m/s

Əlaqə

AZ RU EN

Ana səhifə / YAP xəbərləri / Azərbaycan terrora qarşı qəti mövqeyini göstərdi

Azərbaycan terrora qarşı qəti mövqeyini göstərdi

06.03.2026 [11:49]

Cənubi Qafqaz regionu son illərdə mürəkkəb geosiyasi proseslərin təsiri altında formalaşan yeni təhlükəsizlik reallıqları ilə üzləşir. Bu reallıqlar fonunda dövlətlərin suverenliyi və ərazi bütövlüyü məsələləri yalnız diplomatik müstəvidə deyil, həm də təhlükəsizlik siyasətinin əsas prioritetlərindən biri kimi ön plana çıxır. Martın 5-də Azərbaycan Respublikasının Prezidenti cənab İlham Əliyevin sədrliyi ilə keçirilən Təhlükəsizlik Şurasının iclası məhz bu kontekstdə mühüm siyasi hadisə kimi qiymətləndirilir. İclasda dövlət başçısı Naxçıvan Muxtar Respublikasına qarşı həyata keçirilən hücumu kəskin şəkildə pisləyərək onu açıq şəkildə terror aktı kimi xarakterizə etdi. Cənab Prezident İlham Əliyev çıxışında qeyd etdi: “Bu gün İran tərəfindən Azərbaycan ərazisinə qarşı, Azərbaycan dövlətinə qarşı terror aktı törədilmişdir. Naxçıvan Muxtar Respublikasının ərazisini İran dövləti pilotsuz uçuş aparatları ilə atəş altına salmışdır.” Dövlətimizin başçısının sözlərinə görə hücumun hədəfləri hərbi obyektlər deyil, məhz mülki infrastrukturlar olub. Bu isə hadisənin mahiyyətini daha da ağırlaşdırır. Dövlət başçısı xüsusi vurğuladı ki, hücum zamanı Naxçıvan Beynəlxalq Hava Limanı, onun terminal binası, məktəb və digər mülki obyektlər atəşə tutulub. Bu fakt beynəlxalq hüququn və humanitar prinsiplərin kobud şəkildə pozulması kimi qiymətləndirilə bilər.

Cənab Prezident İlham Əliyev çıxışında diqqəti bir vacib məqama yönəltdi: bu hadisə təsadüfi və ya lokal insident kimi qiymətləndirilə bilməz. Azərbaycanın son illərdə regional siyasətdə artan nüfuzu və müstəqil mövqeyi bəzi qüvvələri narahat edir. Dövlət başçısı vurğuladı ki, bu, İran tərəfindən Azərbaycana qarşı həyata keçirilən ilk təxribat deyil: “Birinci dəfə deyil ki, İran dövləti Azərbaycana və azərbaycanlılara qarşı terror aktları həyata keçirir.” Bu kontekstdə ölkə başçısı Azərbaycanın Tehrandakı səfirliyinə qarşı törədilmiş terror hücumunu xatırlatdı. Həmin hadisə regionda diplomatik təhlükəsizliyin təmin olunması baxımından ciddi suallar doğurmuşdu. Dövlət başçısının sözlərinə görə, hücumun uzun müddət davam etməsinə baxmayaraq təhlükəsizlik qurumlarının müdaxilə etməməsi bu hadisənin arxasında təşkilatlanmış qüvvələrin dayandığını göstərirdi. Prezident İlham Əliyev çıxışında Azərbaycanın regionda sülh və qarşılıqlı hörmət prinsiplərinə əsaslanan siyasət yürüdüyünü bir daha bəyan etdi. Dövlət başçısı qeyd etdi ki, Azərbaycan öz ərazisinin başqa dövlətlərə qarşı istifadə olunmasına heç vaxt imkan verməyib. “Azərbaycan nə o vaxt, nə də bu dəfə İrana qarşı olan əməliyyatlarda iştirak etmir və etməyəcək.” Bu mövqe Azərbaycanın beynəlxalq hüquqa və regional sabitliyə sadiqliyinin göstəricisi kimi qiymətləndirilir. Cənab Prezidentin sözlərinə görə, Azərbaycanın əsas məqsədi öz suverenliyini qorumaq və regionda sabitliyin möhkəmlənməsinə töhfə verməkdir.

Son illər Azərbaycanın hərbi və siyasi potensialının artması regionda yeni güc balansının formalaşmasına səbəb olub. Cənab Prezident İlham Əliyev çıxışında bu amilə də xüsusi diqqət yetirdi və Azərbaycanın öz təhlükəsizliyini təmin etmək üçün bütün imkanlara malik olduğunu bildirdi. “Biz Azərbaycana qarşı törədilmiş bu əsassız terror aktı ilə, təcavüzlə barışmayacağıq.” Dövlət başçısı eyni zamanda Azərbaycanın son illərdə göstərdiyi qətiyyətli mövqeni xatırladaraq bildirdi ki, ölkənin gücünü sınamağa çalışan qüvvələr artıq bunun nəticələrini görüb. “Bizim gücümüzü sınamaq istəyənlərin başı Dəmir yumruq vasitəsilə yarıldı.” Bu ifadə yalnız hərbi gücə deyil, həm də dövlətin siyasi iradəsinə və milli birlik prinsipinə işarə edən mühüm mesajdır. Təhlükəsizlik Şurasının iclasında cənab Prezident İlham Əliyev hadisə ilə bağlı diplomatik və təhlükəsizlik tədbirlərinin artıq başladığını açıqladı. İranın Azərbaycandakı səfiri Xarici İşlər Nazirliyinə çağırılıb və etiraz notası təqdim ediləcək. Eyni zamanda, ölkənin təhlükəsizlik strukturlarına xüsusi göstərişlər verilib. “Silahlı Qüvvələrimizə təlimat verildi ki, cavab tədbirləri hazırlansın və həyata keçirilsin.” Dövlətimizin başçısı qeyd etdi ki, Azərbaycan beynəlxalq hüquqa əsaslanaraq həm diplomatik, həm də təhlükəsizlik müstəvisində bütün zəruri addımları atacaq. Cənab Prezidentin çıxışında diqqət çəkən məqamlardan biri də Azərbaycanın humanitar prinsiplərə sadiqliyi ilə bağlı idi. Dövlət başçısı bildirdi ki, İran tərəfi Livanda qalmış diplomatik əməkdaşlarının təxliyəsi üçün Azərbaycandan kömək istəyib və Azərbaycan bu müraciəti qəbul edib. “Dedim ki, lazım deyil, indi dar gündə biz kömək göstərməsək, bəs nə vaxt kömək göstərməliyik?” Bu addım Azərbaycanın beynəlxalq münasibətlərdə humanitar və etik dəyərlərə sadiqliyinin göstəricisi kimi qiymətləndirilə bilər.
Təhlükəsizlik Şurasının iclası bir daha göstərdi ki, Azərbaycan öz milli təhlükəsizliyinə qarşı yönəlmiş hər hansı təhdidə qarşı qətiyyətli və prinsipial mövqe nümayiş etdirir. Dövlət başçısının çıxışı həm ictimaiyyətə, həm də regionda prosesləri diqqətlə izləyən beynəlxalq aktorlara ünvanlanan ciddi siyasi mesaj idi. Cənab Prezident İlham Əliyevin vurğuladığı kimi: “Azərbaycan xalqı əmin olmalıdır ki, istənilən bəd qüvvə onlara qarşı bizim Dəmir yumruğumuzu görəcək.” Bu mesaj Azərbaycanın müstəqil siyasət kursunun, milli təhlükəsizlik strategiyasının və dövlət iradəsinin dəyişməz olduğunu bir daha təsdiqləyir.

David İbramxəlilov,
YAP Qusar rayon təşkilatının sədri

Paylaş:

Baxılıb: 262 dəfə