Xocalı həqiqətlərinin beynəlxalq aləmdə tanıdılması

Bakı:

24 °C

42 %

3 m/s

Əlaqə

AZ RU EN

Ana səhifə / YAP xəbərləri / Xocalı həqiqətlərinin beynəlxalq aləmdə tanıdılması

Xocalı həqiqətlərinin beynəlxalq aləmdə tanıdılması

02.03.2026 [10:43]

Mansur Quliyev

YAP Ağdam rayon təşkilatının sədri

Prezident İlham Əliyevin Xocalı Soyqırımı Memorialının açılış mərasimində etdiyi çıxış bir daha göstərdi ki, Xocalı həqiqətlərinin beynəlxalq aləmdə tanıdılması Azərbaycan dövlətinin və xalqının dəyişməz prioritetidir. Dövlət başçısı vurğuladı ki, tarixi ədalətin bərpası istiqamətində həyata keçirilən siyasi, diplomatik və informasiya fəaliyyəti uzunmüddətli və sistemli strategiyaya əsaslanır.

Bu istiqamətdə mühüm rol oynayan qurumlardan biri də Heydər Əliyev Fondudur. Prezident çıxışında qeyd etdi ki, Fond yarandıqdan dərhal sonra “Xocalıya ədalət!” genişmiqyaslı hərəkatına start verdi və bu təşəbbüs qısa müddətdə beynəlxalq miqyas aldı. Bu kampaniya nəticəsində Xocalı faciəsi ilə bağlı həqiqətlər dünyanın müxtəlif ölkələrində ictimaiyyətə çatdırıldı, çoxsaylı tədbirlər, konfranslar, sərgilər keçirildi, sənədli materiallar yayımlandı.

“Xocalıya ədalət!” təşəbbüsü təkcə informasiya kampaniyası deyil, həm də beynəlxalq hüququn aliliyinə çağırış idi. Bu hərəkat çərçivəsində müxtəlif ölkələrin parlamentləri və beynəlxalq təşkilatlar Xocalı faciəsinə hüquqi-siyasi qiymət verilməsi istiqamətində addımlar atdılar. Beləliklə, həqiqətlərin dünyaya çatdırılması istiqamətində mühüm irəliləyiş əldə olundu.

Xocalı Soyqırımı Memorialının açılışı isə bu mübarizənin mənəvi-siyasi zirvəsi kimi qiymətləndirilə bilər. Memorial həm şəhidlərimizin əziz xatirəsinə ehtiramın ifadəsidir, həm də gələcək nəsillərə tarixi yaddaşın qorunması ilə bağlı mühüm mesajdır. Prezident İlham Əliyev çıxışında bildirdi ki, Azərbaycan xalqı heç vaxt Xocalı qurbanlarını unutmayacaq və bu faciənin beynəlxalq səviyyədə tanınması istiqamətində səylər davam etdiriləcək.

Bu gün Azərbaycan artıq öz ərazi bütövlüyünü və suverenliyini tam bərpa etmiş bir dövlətdir. Xocalı həqiqətlərinin dünya miqyasında tanıdılması isə milli birliyin, siyasi iradənin və məqsədyönlü fəaliyyətin nəticəsidir. Heydər Əliyev Fondunun təşəbbüsü ilə başlanan “Xocalıya ədalət!” hərəkatı sübut etdi ki, həqiqət gec-tez öz yerini tapır.

Tarixi ədalətin bərpası istiqamətində görülən işlər, memorial komplekslərin yaradılması və beynəlxalq kampaniyaların həyata keçirilməsi Azərbaycan dövlətinin prinsipial mövqeyinin bariz nümunəsidir. Xocalı Soyqırımı Memorialı həm də dünyaya ünvanlanan bir çağırışdır: ədalət gecikə bilər, lakin unudulmaz və itirilməzdir.

Paylaş:

Baxılıb: 524 dəfə