Xocalı soyqırımı – xalqın yaddaşında qanlı iz və Zəfərə aparan yol

Bakı:

25 °C

83 %

3 m/s

Əlaqə

AZ RU EN

Ana səhifə / YAP xəbərləri / Xocalı soyqırımı – xalqın yaddaşında qanlı iz və Zəfərə aparan yol

Xocalı soyqırımı – xalqın yaddaşında qanlı iz və Zəfərə aparan yol

25.02.2026 [10:48]

Xocalı soyqırımı Azərbaycan tarixinin ən dəhşətli və unudulmaz faciələrindən biridir. 1992-ci ilin fevralın 25-dən 26-na keçən gecə Xocalı şəhərində baş verən hadisələr nəticəsində yüzlərlə günahsız insan vəhşicəsinə qətlə yetirildi. O gecə təkcə bir şəhər yox, bütöv bir xalq sınağa çəkildi. Bu sınağın nəticələri çox ağrılı, çox acılı oldu. Ağıla sığmaz hadisələrin cərəyan etməsi insanlığa sağalmaz zərbə vurdu. Qarın ağlığına bürünmüş torpaq qan rənginə boyandı, anaların fəryadı göylərə yüksəldi, uşaqların yarımçıq qalan arzuları zamanın yaddaşına həkk olundu.

Xocalı hadisələri mənim üçün sadəcə tarixi dərs deyil. Bu, xalqımızın yaşadığı ağrının, ədalətsizliyin və eyni zamanda sınmayan iradəsinin göstəricisidir. Dinc əhalinin – qadınların, uşaqların, qocaların – hədəfə alınması insanlığa qarşı törədilmiş ağır cinayət idi. Bu faciə göstərdi ki, müharibənin ən böyük zərbəsini günahsız insanlar alır. Xocalı adı çəkiləndə insanın ürəyi sıxılır, çünki bu adın arxasında yarımçıq qalan həyat hekayələri dayanır.

İllər boyu Xocalı həsrəti ilə yaşayan Azərbaycan xalqı torpaqlarının azad olunacağı günü səbirlə gözlədi. Bu həsrət hər bir ailənin, hər bir vətəndaşın qəlbində dərin iz buraxmışdı. 2020-ci ildə başlayan Vətən müharibəsi isə xalqımızın birliyini, dövlətimizin gücünü və ordumuzun qüdrətini bütün dünyaya göstərdi. Azərbaycan Ordusu işğal altındakı torpaqları bir-bir azad edərək tarixi ədaləti bərpa etdi.

2023-cü ildə həyata keçirilən lokal antiterror tədbirlərindən sonra Qarabağ bölgəsində Azərbaycanın suverenliyi tam təmin olundu və Xocalı da daxil olmaqla bütün ərazilərimiz üzərində dövlət nəzarəti bərpa edildi. Bu hadisə yalnız hərbi uğur deyil, həm də mənəvi zəfər idi. Çünki Xocalının azad olunması şəhidlərimizin ruhuna verilən ən böyük dəyər, ədalətin gec də olsa bərqərar olması deməkdir.

Bu gün Xocalıda Azərbaycan bayrağının dalğalanması hər birimizin qəlbini qürurla doldurur. İndi həmin torpaqlarda yenidən həyat qurulur, yollar çəkilir, evlər tikilir, doğma yurd həsrəti ilə yaşayan insanlar geri qayıtmağa hazırlaşır. Dağıdılmış şəhər yenidən dirçəlir və bu dirçəliş xalqımızın gücünün, birliyinin nəticəsidir.

Xocalı soyqırımı bizim qan yaddaşımızdır. Biz o faciəni heç vaxt unutmayacağıq. Amma eyni zamanda biz yalnız kədər içində yaşamırıq – biz zəfərlə, ümidlə və gələcəyə inamla yaşayırıq. Xocalı həm ağrımızdır, həm də qürurumuz. Çünki bu şəhər artıq yalnız faciənin deyil, həm də qələbənin və ədalətin simvoluna çevrilmişdir. Artıq Xocalının hər bir qarışında Azərbaycan vətəndaşı, keşiyində məğrur Azərbaycan əsgəri durur. Müzəffər Ali Baş Komandan İlham Əliyevin polad iradəsi və əvəzolunmaz siyasəti ilə qəhrəman igidlərimizin şücaətinin vəhdətində bugün Xocanlının timsalında işğaldan azad edilmiş bütün ərazilərimiz bizim qürur simvolumuzdur!

Sona Əsədova

YAP Naxçıvan şəhər təşkilatının fəalı

Paylaş:

Baxılıb: 509 dəfə