Azərbaycan-Serbiya münasibətlərinin siyasi-iqtisadi perspektivləri

Bakı:

10 °C

66 %

7 m/s

Əlaqə

AZ RU EN

Ana səhifə / YAP xəbərləri / Azərbaycan-Serbiya münasibətlərinin siyasi-iqtisadi perspektivləri

Azərbaycan-Serbiya münasibətlərinin siyasi-iqtisadi perspektivləri

21.02.2026 [14:22]

Prezident İlham Əliyevin 15 fevral tarixində Serbiyaya səfəri iki dövlət arasında münasibətlərin inkişaf dinamikasını bir daha nümayiş etdirir. Bu səfər qarşılıqlı maraqlara əsaslanan strateji tərəfdaşlığın daha da möhkəmləndiyini göstərir. Keçirilən görüşlər, aparılan müzakirələr və səsləndirilən bəyanatlar iki dövlət arasında formalaşmış siyasi etimadın yüksək səviyyədə olduğunu təsdiqləyir. Müasir beynəlxalq münasibətlər sistemində etibarlı tərəfdaşlıq xüsusi əhəmiyyət daşıyır və rəsmi Bakı ilə Belqrad arasında əməkdaşlıq məhz belə bir model üzərində qurulub.

Səfər çərçivəsində dövlətimizin başçısı iki ölkə rəhbərləri arasında formalaşmış səmimi münasibətlərin əhəmiyyətinə diqqət çəkib. Tərəflər uzun illərdir ki, sıx təmaslar saxlayır, mütəmadi görüşlər keçirir və bir-birinin mövqeyini yaxşı anlayır. Bu cür münasibətlər beynəlxalq siyasətdə nadir hallarda formalaşır və strateji tərəfdaşlığın möhkəm təməlini təşkil edir.

Səfərin mühüm hadisələrindən biri Azərbaycan və Serbiya arasında Strateji Tərəfdaşlıq Şurasının 1-ci iclasının keçirilməsi olub. Bu iclas iki dövlət arasında əlaqələrin daha sistemli və planlı şəkildə inkişaf etdirilməsi baxımından xüsusi əhəmiyyət daşıyır. Strateji Tərəfdaşlıq Şurası formatı tərəflərə müxtəlif sahələr üzrə əməkdaşlığı daha geniş müstəvidə müzakirə etmək imkanı yaradır. İclas zamanı siyasi dialoqun davamlılığı, iqtisadi əlaqələrin genişləndirilməsi, energetika və nəqliyyat sahələrində əməkdaşlığın dərinləşdirilməsi kimi məsələlər geniş müzakirə olunub. Eyni zamanda beynəlxalq təşkilatlar çərçivəsində qarşılıqlı dəstəyin davam etdirilməsi də tərəflərin diqqət mərkəzində olub. Bu amil münasibətlərin yalnız iqtisadi maraqlara deyil, həm də siyasi həmrəyliyə əsaslandığını göstərir. Müasir dünyada belə əməkdaşlıq modeli dövlətlər arasında etimadın möhkəmlənməsinə mühüm töhfə verir.

Energetika sahəsi iki dövlət arasında əməkdaşlığın ən mühüm istiqamətlərindən biridir. Son illər qaz ixracı ilə bağlı əldə edilən razılaşmalar bu sahədə münasibətlərin strateji xarakter aldığını göstərir. Görüş zamanı qaz tədarükünün artırılması məsələsi müzakirə edilib və bu istiqamətdə konkret addımların atılacaqdır. Bundan başqa, elektrik enerjisi istehsalı ilə bağlı birgə layihələr də gündəmdədir. Elektrik stansiyasının tikintisi və mövcud enerji infrastrukturlarının modernləşdirilməsi planları iki dövlətin enerji təhlükəsizliyinə mühüm töhfə verəcəkdir. Enerji sahəsində əməkdaşlıq yalnız iqtisadi maraqlarla məhdudlaşmır. Bu sahə həm də regionda sabitliyin və qarşılıqlı asılılığın formalaşmasına təsir göstərir. Eyni zamanda bərpaolunan enerji sahəsində əməkdaşlıq imkanları da genişdir. Günəş və külək enerjisi layihələri gələcək dövrdə yeni investisiya imkanları yaradacaqdır. 2032-ci ilə qədər enerji gücünün ciddi şəkildə artırılması planları bu sahədə geniş layihələrin həyata keçiriləcəyindən xəbər verir. Bu isə Avropa bazarlarına enerji ixracının daha da genişlənməsi üçün əlverişli şərait yaradır. Dövlətimizin başçısı mətbuata bəyanatında bildirib ki, bütövlükdə energetika sahəsində bizim əlaqələrimiz indi çoxşaxəli formatda inkişaf edir: “Bir müddət bundan əvvəl biz Serbiyaya təbii qazın ixracına başlamışıq və bu gün qərara gəldik ki, ixracın həcmini artıracağıq. İndi Serbiya ixrac ediləcək qazı da elektrik enerjisinə çevirərək, artıq təmiz elektrikin əldə edilməsinə də nail olacaq. Bu, həm Serbiya bazarı üçün və gələcəkdə ixrac üçün də imkanlar yaradacaq. Bu gün Azərbaycanın energetika sahəsində ixrac potensialı 2 giqavata bərabərdir. Bu rəqəm artacaq. Çünki biz indi bir çox bərpaolunan enerji stansiyalarının tikintisi ilə məşğuluq və bu sahədə də Serbiya ilə əməkdaşlıq etməyə hazırıq”.

Aparılan iqtisadi islahatlar nəticəsində Serbiya xarici investorlar üçün cəlbedici məkana çevrilib. İnvestisiya mühitinin yaxşılaşması beynəlxalq şirkətlərin və tərəfdaş dövlətlərin marağını artırır. Bu kontekstdə Azərbaycanın Serbiyaya böyük həcmdə sərmayə yatırmaq niyyəti vurğulanıb. Energetika, sənaye, logistika və infrastruktur sahələrində birgə layihələrin həyata keçirilməsi gələcək əməkdaşlıq üçün geniş perspektivlər yaradır. Belə layihələr iki dövlət arasında qarşılıqlı etimadı daha da gücləndirir. İqtisadi əməkdaşlığın genişlənməsi region üçün də yeni imkanlar yaradır. Rəsmi Bakı ilə Belqrad arasında formalaşan iqtisadi tərəfdaşlıq Avropa və Asiya arasında ticarət və enerji layihələrinin inkişafına müsbət təsir göstərəcəkdir.

İki dövlət arasında münasibətlərin mühüm xüsusiyyətlərindən biri beynəlxalq müstəvidə nümayiş olunan qarşılıqlı dəstəkdir. Tərəflər beynəlxalq təşkilatlar çərçivəsində bir-birinin mövqeyini dəstəkləyir və strateji məsələlərdə ortaq mövqe nümayiş etdirirlər. Bu yanaşma müasir beynəlxalq münasibətlər sistemində böyük əhəmiyyət daşıyır. Çünki qlobal siyasətdə etibarlı tərəfdaşların olması dövlətlərin mövqeyini gücləndirir. Azərbaycan-Serbiya münasibətləri də məhz qarşılıqlı hörmət və etimada əsaslanır.

Dövlətimizin başçısı yaxın gələcəkdə yeni görüşlərin keçiriləcəyini diqqətə çatdırıb. Serbiya rəhbərliyinə edilən dəvət iki dövlət arasında siyasi dialoqun davamlı xarakter daşıdığını göstərir. Bu cür qarşılıqlı səfərlər əlaqələrin daha da inkişaf etməsinə, yeni layihələrin formalaşmasına və mövcud əməkdaşlığın genişlənməsinə imkan yaradır. Qarşıdakı dövrdə iqtisadi layihələrin icrası sürətlənəcəkdir.

Prezident İlham Əliyevin rəsmi səfər göstərir ki, iki dövlət arasında əlaqələr strateji xarakter daşıyır və bu əməkdaşlıq uzunmüddətli perspektivə hesablanıb. Siyasi dialoq, enerji layihələri, investisiya imkanları və beynəlxalq platformalarda qarşılıqlı dəstək münasibətlərin əsas istiqamətlərini təşkil edir. Rəsmi Bakı ilə Belqrad arasında formalaşmış tərəfdaşlıq modeli region üçün də mühüm nümunə hesab olunur. Qarşılıqlı etimad və ortaq maraqlara əsaslanan bu münasibətlər gələcək illərdə daha geniş əməkdaşlıq imkanlarının yaranmasına şərait yaradacaqdır.

Meydanəli Yolçiyev

YAP Daşkəsən rayon təşkilatının sədri

Paylaş:

Baxılıb: 58 dəfə