ABŞ Vitse-prezidentinin Azərbaycana səfəri strateji tərəfdaşlığın göstəricisidir

Bakı:

16 °C

72 %

8 m/s

Əlaqə

AZ RU EN

Ana səhifə / YAP xəbərləri / ABŞ Vitse-prezidentinin Azərbaycana səfəri strateji tərəfdaşlığın göstəricisidir

ABŞ Vitse-prezidentinin Azərbaycana səfəri strateji tərəfdaşlığın göstəricisidir

13.02.2026 [15:47]

Azərbaycanın son illərdə apardığı uğurlu və balanslaşdırılmış xarici siyasət kursu ölkəmizin beynəlxalq nüfuzunu əhəmiyyətli dərəcədə artırmış, onu regionda etibarlı tərəfdaş və qlobal dialoq platforması kimi möhkəmləndirmişdir. Şərqlə Qərb arasında körpü rolunu oynayan Azərbaycan həm siyasi, həm iqtisadi, həm də enerji təhlükəsizliyi sahələrində təşəbbüskar mövqeyi ilə seçilir. Məhz bu ardıcıl və praqmatik siyasətin nəticəsidir ki, dünyanın aparıcı dövlətləri ölkəmizlə əməkdaşlığa xüsusi önəm verir və yüksək səviyyəli qarşılıqlı səfərlər intensiv xarakter alır.

ABŞ-ın Vitse-prezidenti Cey. Di. Vensin Azərbaycana səfəri də iki ölkə arasında strateji tərəfdaşlığın yeni mərhələyə qədəm qoyduğunu nümayiş etdirən mühüm hadisə kimi yadda qaldı. Səfər çərçivəsində keçirilən görüşlərdə regional təhlükəsizlik, enerji əməkdaşlığı, nəqliyyat-logistika layihələri, eləcə də innovasiya və yüksək texnologiyalar sahəsində tərəfdaşlıq məsələləri geniş müzakirə olundu.

Cənab Prezident İlham Əliyev mətbuata verdiyi bəyanatda Azərbaycan–ABŞ münasibətlərinin möhkəm təməllər üzərində qurulduğunu vurğulayaraq bildirdi ki, iki ölkə arasında əməkdaşlıq qarşılıqlı hörmət, suverenliyə dəstək və ortaq maraqlara əsaslanır. Dövlət başçısı qeyd etdi ki, Azərbaycan regionda sülhün və sabitliyin təmin olunması istiqamətində ardıcıl addımlar atır və bu prosesdə beynəlxalq tərəfdaşların konstruktiv mövqeyi mühüm əhəmiyyət daşıyır.

Enerji sahəsində əməkdaşlıq xüsusi diqqət mərkəzində oldu. Dövlətimizin Başçısı Azərbaycanın Avropanın enerji təhlükəsizliyinin təmin olunmasında oynadığı rolu xatırladaraq, Cənub Qaz Dəhlizinin genişləndirilməsi, bərpaolunan enerji layihələrinin inkişafı və “yaşıl enerji”nin ixracı istiqamətində atılan addımlar barədə məlumat verdi. O, ABŞ şirkətlərinin Azərbaycanda həyata keçirilən enerji və infrastruktur layihələrində fəal iştirak etdiyini və bu əməkdaşlığın daha da genişləndirilməsi üçün əlverişli şəraitin mövcud olduğunu bildirdi.

Bəyanatda regional nəqliyyat-kommunikasiya layihələri də xüsusi yer tutdu. Prezident vurğuladı ki, Azərbaycan Orta Dəhlizin əsas iştirakçılarından biri kimi Avrasiya məkanında yükdaşımaların təhlükəsiz və səmərəli şəkildə həyata keçirilməsinə töhfə verir. Bu kontekstdə ABŞ-la logistika, rəqəmsal ticarət və innovativ həllər sahəsində əməkdaşlığın geniş perspektivlər açdığı qeyd olundu.

Cənab Prezident İlham Əliyev çıxışında humanitar və təhsil sahəsində əlaqələrin də əhəmiyyətini qeyd edərək, tələbə mübadiləsi proqramlarının, elmi-tədqiqat əməkdaşlığının və mədəni əlaqələrin xalqlar arasında qarşılıqlı anlaşmanın dərinləşməsinə xidmət etdiyini bildirdi.

Dövlət başçısı sonda vurğuladı ki, Azərbaycan ABŞ ilə münasibətlərin inkişafına böyük önəm verir və bu səfər iki ölkə arasında strateji tərəfdaşlığın daha da möhkəmlənməsinə xidmət edəcək. Prezident İlham Əliyevin mətbuata verdiyi bəyanat bir daha göstərdi ki, Azərbaycan müstəqil siyasət yürüdən, milli maraqlarını qətiyyətlə müdafiə edən və eyni zamanda beynəlxalq əməkdaşlığa açıq olan güclü dövlətdir.

Nəticə etibarilə, ABŞ-ın Vitse-prezidentinin Azərbaycana səfəri və Prezident İlham Əliyevin mətbuata verdiyi bəyanat iki ölkə arasında münasibətlərin yeni mərhələsinin başlanğıcı kimi qiymətləndirilə bilər. Bu səfər həm regional, həm də qlobal miqyasda əməkdaşlığın genişlənməsi baxımından mühüm siyasi hadisə kimi tarixə düşdü.

Radə Qafarova

Qərbi Azərbaycan İcmasının Ağcabədi rayonu üzrə nümayəndəsi

Paylaş:

Baxılıb: 286 dəfə