Milli inkişafın aparıcı qüvvəsi

Bakı:

11 °C

87 %

1 m/s

Əlaqə

AZ RU EN

Ana səhifə / YAP xəbərləri / Milli inkişafın aparıcı qüvvəsi

Milli inkişafın aparıcı qüvvəsi

02.02.2026 [20:25]

Hər bir xalqın gələcəyini formalaşdıran əsas amil onun gənc nəslidir. Gənclərin dünyagörüşü, fəallığı və vətənə bağlılığı dövlətin sabitliyini və davamlı inkişafını təmin edir. Azərbaycanda gənclərə yönəlmiş dövlət siyasəti uzun illərdir ardıcıl şəkildə həyata keçirilir və bu siyasətin mühüm nəticələrindən biri də Azərbaycan Gəncləri Gününün təsis olunmasıdır.

1997-ci ildə keçirilən Azərbaycan gənclərinin birinci ümumrespublika toplantısı ölkənin gənclər hərəkatında yeni mərhələnin başlanğıcı olmuşdur. Həmin tarixi hadisə gənclərin cəmiyyət həyatında rolunun artırılması baxımından mühüm əhəmiyyət kəsb etmişdir. Bu təşəbbüsün davamı olaraq Ümummilli Lider Heydər Əliyev tərəfindən 2 fevral tarixi rəsmi olaraq Azərbaycan Gəncləri Günü elan edilmişdir. Bu qərar gənclərin dövlət səviyyəsində tanınmasının bariz nümunəsidir.

Ulu öndər Heydər Əliyev gəncləri milli ideologiyanın daşıyıcısı və dövlətçiliyin davamçıları kimi qiymətləndirmişdir. Onun fikrincə, güclü və müstəqil Azərbaycanın qorunması savadlı, mənəviyyatlı və vətənpərvər gənclərdən asılıdır. Bu baxımdan gənclərin təhsili, sosial təminatı və ictimai fəallığı hər zaman prioritet olmuşdur.

Prezident İlham Əliyev müasir çağırışlara cavab verən gənclər siyasəti həyata keçirir. Onun təşəbbüsü ilə gənclərin beynəlxalq təhsil proqramlarında iştirakı genişlənmiş, innovasiya, sahibkarlıq və rəqəmsal bacarıqların inkişafı üçün yeni imkanlar yaradılmışdır. Prezident çıxışlarında tez-tez vurğulayır ki, dövlətin gələcək uğurları məhz bugünkü gənclərin hazırlıq səviyyəsindən asılıdır.

44 günlük Vətən müharibəsi Azərbaycan gənclərinin tarixə yazdığı şərəfli səhifədir. Gənc əsgər və zabitlər yüksək döyüş əzmi, nizam-intizam və vətənə sonsuz sədaqət nümayiş etdirmişlər. Onların qəhrəmanlığı nəticəsində Azərbaycan öz ərazi bütövlüyünü bərpa etmişdir.

Prezident İlham Əliyev bu tarixi Zəfəri gənclərin vətənpərvərlik ruhunun və dövlət gənclər siyasətinin real nəticəsi kimi dəyərləndirmişdir. Dövlət başçısı dəfələrlə vurğulamışdır ki, Azərbaycan gəncliyi döyüş meydanında öz sözünü qətiyyətlə demişdir.

2025-ci il ərzində gənclərin ictimai həyatda rolu daha da artmışdır. Könüllülük hərəkatı, sosial təşəbbüslər, gənclər təşkilatlarının fəaliyyəti və regionlarda yaradılan inkişaf platformaları gənclərin potensialının üzə çıxarılmasına xidmət etmişdir. Dövlət tərəfindən gənclərin sosial müdafiəsi və şəxsi inkişafı üçün yeni layihələr həyata keçirilmişdir.

Azərbaycan gəncliyi bu gün yalnız ölkənin gələcəyi deyil, həm də onun bu günü və güc mənbəyidir. Ulu öndər Heydər Əliyevin müəyyən etdiyi strateji xətt və Prezident İlham Əliyevin apardığı məqsədyönlü siyasət nəticəsində gənclər ölkənin inkişafında aparıcı mövqedədir. Vətən müharibəsində əldə olunan Qələbə isə Azərbaycan gənclərinin gücünü, birliyini və əzmini bütün dünyaya nümayiş etdirmişdir.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 232 dəfə