2 Fevral Azərbaycan gəncliyinin günüdür

Bakı:

20 °C

54 %

5 m/s

Əlaqə

AZ RU EN

Ana səhifə / YAP xəbərləri / 2 Fevral Azərbaycan gəncliyinin günüdür

2 Fevral Azərbaycan gəncliyinin günüdür

02.02.2026 [13:58]

Bu gün Azərbaycanda Gənclər Günüdür. Bu günün Azərbaycanda xüsusi olaraq qeyd edilməsi MDB məkanında, Şərqi Avropada ilk belə nümunə oldu. Sadəcə bir gün deyil, bu, dövlətin gələcəyə baxışı, xalqın sabahına qoyduğu ən böyük investisiyanın rəmzidir.

Gənclər – cəmiyyətin nəbzi, enerjisi, ümidi. Onlar nəinki keçmişi daşıyır, həm də gələcəyi yaradır. Bu gün Azərbaycan gəncliyi artıq sadəcə sözlə deyil, əməllərlə öz yerini göstərir: Qarabağda qələbələr, beynəlxalq arenada bayraq dalğalandırmaq, innovasiya, könüllülük, elm və idmanda yüksək nəticələr – bunların hamısı məhz bu nəslin əldə etdiyi uğurlardır.

Gənclər Günü sadəcə təbrik mərasimi deyil, həm də özünə baxmaq, nailiyyətləri qiymətləndirmək və qarşıdakı yolları müəyyənləşdirmək fürsətidir. Çünki gənclik hər xalqın ən qiymətli sərvətidir və bu sərvət nə qədər güclü, savadlı və vətənpərvər olarsa, ölkənin sabahı da bir o qədər parlaq olar.

Bu gün hər bir azərbaycanlı gəncə bir sual ünvanlanır: Sən sabahın Azərbaycanını necə görürsən və onun qurulmasında öz payını necə artırmaq istəyirsən? Cavab isə hərəkətdə, yaradıcılıqda və məsuliyyətdə gizlidir.

Tarix də bu günlə bağlı bizə nələr-nələr xatırladır.

Belə ki, 1996-ci ilin bu günündə Azərbaycan Respublikası gənclərinin I forumu keçirilib.

Respublikamızda Gənclər Gününün qeyd olunması isə 1997-ci ildə ümummilli lider Heydər Əliyevin sərəncamı ilə təsdiq olunub. 

Azərbaycanda Gənclər günü qeyd olunandan sonra digər MDB ölkələrində və Şərqi Avropa dövlətlərində də bu gün qeyd olunmağa başlayıb. Dünyada yalnız 1999-cu ildə BMT-nin qərarı ilə avqustun 12-si gənclər günü elan edilib.

Prezident İlham Əliyev isə 2005-ci il avqustun 30-da “Azərbaycan Gəncliyi Dövlət Proqramının (2005-2009-cu illər) təsdiq edilməsi haqqında” sərəncam imzalayıb. Proqram çərçivəsində görülən işlər gənclərin potensialından ölkənin mənafeyi naminə tam və düzgün istifadə olunması, onların faydalı məşğulluğunun təmin edilməsi, dövlət idarəçiliyi sistemində iştirakının gerçəkləşdirilməsi yönündə ciddi irəliləyişə gətirib çıxarıb.

Prezident İlham Əliyevin bu sahəyə olan diqqəti özünü ayrıca bir ilin (2007-ci il) “Gənclər ili” elan edilməsində də göstərib. 2007-ci ildə Prezident İlham Əliyev “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın təsdiq edilməsi barədə sərəncam imzalayıb.

Bundan başqa, 2011-ci ilin 6 aprel tarixində Prezident İlham Əliyev “Azərbaycan gəncliyi 2011-2015-ci illərdə” Dövlət Proqramı haqqında sərəncam imzalayıb. Proqramın əsas məqsədi ölkəmizdə gənclər siyasətini daha da inkişaf etdirmək, gənclərin menecment sahəsində fəal iştirakına şərait yaratmaq, gənc mütəxəssislərin işlə təminatı və digər sosial-iqtisadi problemlərinin həllini təmin etmək olub.

Gənclərin hərtərəfli inkişafını, cəmiyyətin həyatında fəal iştirakını bir qədər də stimullaşdırmaq məqsədilə dövlət başçısı 19 dekabr 2011-ci il tarixində Azərbaycan Prezidenti yanında Gənclər Fondunun yaradılması barədə sərəncam verib. Fondun qarşısında gənclər siyasəti ilə bağlı elm, təhsil, mədəniyyət və digər sosial sahələrə yönəlmiş ictimai və sosial əhəmiyyətli, o cümlədən beynəlxalq səviyyədə həyata keçirilən layihə və proqramları qrant şəklində maliyyələşdirmək məqsədi qoyulub. Prezident İlham Əliyevin gənclərə dəstək yönündə verdiyi mühüm və əlamətdar qərarlardan biri də ölkədə ilk dəfə “Gənclər üçün Prezident Mükafatı”nın təsis edilməsi olub.

Bir sözlə, bu gün hər bir gənc özündə Ulu Öndərin etimadını, qələbənin qürurunu və gələcəyin ümidini daşıyır.

Paylaşdığımız bu bayramda bir daha anlayırıq: biz tək deyilik – bir ailəyik, bir millətik, bir Vətənik.

Gənclər Günü münasibətilə hər bir gənci səmimi qəlbdən təbrik edirəm. Sağlam, uğurlu, qürurlu və həmişə irəliyə baxan olun. Çünki Azərbaycanın sabahı – sizin bu gününüzdən başlayır.

Asim Quliyev

YAP Şahbuz rayon təşkilatının mühasibi

Paylaş:

Baxılıb: 262 dəfə