Gənclər sabahın taleyidir

Bakı:

18 °C

82 %

0 m/s

Əlaqə

AZ RU EN

Ana səhifə / YAP xəbərləri / Gənclər sabahın taleyidir

Gənclər sabahın taleyidir

02.02.2026 [11:07]

Bu gün ölkəmizdə Gənclər Günü qeyd olunur. Bu tarix həm təqvimdə qeyd olunan rəsmi gün, həm də düşünən, axtaran, sorğulayan, yaradan, bəzən səhv edən, amma heç vaxt dayanmaq istəməyən bir nəslin günüdür. Bu gün Azərbaycanın gəncliyinə diqqət yetirmək, onun səsinə qulaq vermək, potensialına inanmaq günüdür. Azərbaycan gənci bu gün məsuliyyət daşıyan, qərar verən, mövqe ortaya qoyan bir obrazdır. O, Vətən anlayışını şüarlarla deyil, əməli ilə sübut etmiş bir nəslin davamçısıdır. Son illərin taleyüklü hadisələri açıq şəkildə göstərdi ki, gənclərimiz təkcə auditoriyalarda, elmi layihələrdə, sosial təşəbbüslərdə, startap platformalarında deyil, lazım gəldikdə səngərdə də ön sırada dayanmağı bacarırlar. Bu, təsadüfi deyil. Bu, illər ərzində ardıcıl və məqsədyönlü şəkildə həyata keçirilən dövlət gənclər siyasətinin real nəticəsidir.

Prezident Cənab İlham Əliyevin rəhbərliyi ilə ölkəmizdə gənclərlə bağlı aparılan siyasət gəncləri həm gələcəyin ümidləri, həm də bu günün fəal qüvvəsi kimi təqdim edir. Gənclərə olan etimad sözlə yox, konkret addımlarla özünü göstərir. Təhsil sahəsində aparılan islahatlar, gənclərin xarici ölkələrdə təhsil almalarına yaradılan imkanlar, gənc mütəxəssislərin məsul vəzifələrə irəli çəkilməsi, könüllülük hərəkatının genişlənməsi, gənclərin ictimai proseslərdə fəal iştirakı üçün yaradılan platformalar bu siyasətin əsas sütunlarıdır. Bu gün Azərbaycan gənci özünü kənarda qalmış hiss etmir. O bilir ki, ideyası varsa, onu reallaşdırmaq üçün mexanizmlər mövcuddur. Bacarığı varsa, qarşısında qapılar açıqdır. Zəhməti varsa, dəyəri veriləcək. Məhz bu inam gənclərin cəmiyyətin həyatında daha fəal mövqe tutmasına, sosial məsuliyyət hissinin güclənməsinə, dövlətlə vətəndaş arasında etibarlı körpünün formalaşmasına səbəb olur. Gənclər bu gün qərarların müzakirəsində, təşəbbüslərin həyata keçirilməsində, yeniliklərin tətbiqində aktiv tərəf kimi çıxış edirlər. Müasir çağırışlara uyğun düşünən, qlobal prosesləri izləyən, milli dəyərlərə sadiq olan Azərbaycan gənci ölkənin inkişaf dinamikasına yeni nəfəs gətirir. Bizim üçün gənclər sadəcə gələcək deyil, artıq bu günün özüdür. Onların düşüncə tərzi cəmiyyətin ritmini müəyyənləşdirir, enerjisi ölkənin inkişaf tempini artırır. Bu baxımdan əsas vəzifəmiz gənclərin yanında olmaq, onları dinləmək, problemlərinə biganə qalmamaq və ən əsası, onlara inanmaqdır. Çünki gəncə verilən inam, əslində, dövlətin sabahına verilən sərmayədir. Əminliklə deyə bilərik ki, Prezident İlham Əliyevin müəyyən etdiyi strateji xətt gənclərin öz potensialını ölkənin inkişafı naminə reallaşdırmasına geniş imkanlar yaradır. Bu siyasət nəticəsində formalaşan gənclik təkcə savadlı deyil, həm də vətənpərvər, təşəbbüskar və məsuliyyətlidir. Bu əlamətdar gün münasibətilə bütün gənclərimizi səmimi-qəlbdən təbrik edir, hər birinə sağlamlıq, uğur, özünə inam və daim irəli getmək əzmi arzulayıram. İnanıram ki, Azərbaycan gənci bundan sonra da ölkəmizin adını həm regionda, həm də beynəlxalq miqyasda qürurla təmsil edəcək, dövlətimizin gücünə güc qatacaq.
Gənclər Gününüz mübarək!

Səfa Ağayev
YAP İmişli rayon təşkilatının sədri

Paylaş:

Baxılıb: 645 dəfə