Milli birliyin və bərabərliyin simvolu

Bakı:

22 °C

76 %

14 m/s

Əlaqə

AZ RU EN

Ana səhifə / YAP xəbərləri / Milli birliyin və bərabərliyin simvolu

Milli birliyin və bərabərliyin simvolu

29.12.2025 [17:29]

31 Dekabr –Dünya Azərbaycanlılarının Həmrəyliyi Günü Azərbaycan xalqının milli yaddaşında birlik, vətənpərvərlik və milli kimlik ideyalarının təntənəsi kimi xüsusi yer tutur. Bu əlamətdar tarix dünyanın müxtəlif ölkələrində yaşayan milyonlarla azərbaycanlını vahid amal – Azərbaycan naminə birləşdirən müqəddəs gündür. Həmrəylik ideyasının dövlətçilik səviyyəsinə yüksəldilməsi isə bilavasitə Ulu Öndər Heydər Əliyevin adı və müdrik siyasi baxışları ilə bağlıdır.

Ulu Öndər Heydər Əliyev hələ sovet dövründə azərbaycançılıq ideologiyasının əsaslarını formalaşdıraraq milli-mənəvi dəyərlərin qorunmasını prioritet vəzifə kimi irəli sürmüşdür. Onun rəhbərliyi dövründə Azərbaycan xalqının milli özünüdərki güclənmiş, ana dilimiz, mədəniyyətimiz və tariximiz dövlət səviyyəsində müdafiə olunmuşdur. Məhz bu ideoloji zəmin sonradan dünya azərbaycanlılarının vahid milli platformada birləşməsinə imkan yaratmışdır.

1991-ci ildə Naxçıvan Muxtar Respublikasında Ulu Öndərin təşəbbüsü ilə 31 Dekabr tarixinin Dünya Azərbaycanlılarının Həmrəyliyi Günü kimi qeyd edilməsi milli birlik tariximizdə mühüm dönüş nöqtəsi oldu. Bu qərar azərbaycanlıların harada yaşamasından asılı olmayaraq bir xalq, bir millət olduğunu bütün dünyaya bəyan etdi. Ulu Öndər deyirdi: “Harada yaşamasından asılı olmayaraq, hər bir azərbaycanlı bilməlidir ki, onun Vətəni Azərbaycandır.” Bu fikir bu gün də həmrəyliyimizin ideoloji əsasını təşkil edir. Ümummilli lider Heydər Əliyevin müəyyən etdiyi diaspor siyasəti sonradan müstəqil Azərbaycan dövlətinin xarici siyasətinin mühüm tərkib hissəsinə çevrildi. Dünya azərbaycanlılarının təşkilatlanması, milli maraqlarımızın beynəlxalq aləmdə müdafiəsi və Azərbaycanın haqq səsinin çatdırılması bu siyasətin əsas məqsədləridir. Ulu Öndərin əsasını qoyduğu bu strateji xətt bu gün Prezident İlham Əliyev tərəfindən uğurla davam etdirilir.

Xüsusilə 44 günlük Vətən müharibəsi zamanı dünya azərbaycanlılarının nümayiş etdirdiyi birlik və həmrəylik Heydər Əliyev ideyalarının canlı təzahürü oldu. Müxtəlif ölkələrdə yaşayan soydaşlarımız Azərbaycan həqiqətlərinin təbliği istiqamətində vahid mövqedən çıxış edərək milli birliyimizin sarsılmaz olduğunu sübut etdilər.

Bu gün Dünya Azərbaycanlılarının Həmrəyliyi Günü yalnız təqvim bayramı deyil, həm də milli məsuliyyət günüdür. Bu gün bizi birliyə, dövlətçiliyimizi möhkəmləndirməyə, Ulu Öndərin azərbaycançılıq ideyalarına sadiq qalmağa çağırır. Heydər Əliyevin miras qoyduğu milli birlik fəlsəfəsi müasir Azərbaycanın güc mənbəyidir və bu ideyalar əsrlər boyu xalqımıza yol göstərəcəkdir.

Dünya azərbaycanlılarının həmrəyliyi – Ulu Öndərin ideyalarında formalaşmış, müasir Azərbaycan dövlətinin dayağına çevrilmiş müqəddəs bir dəyərdir.

Gündüz Alıkişiyev

YAP Tərtər rayon təşkilatının məsləhətçisi

Paylaş:

Baxılıb: 418 dəfə