Mühüm ictimai-siyasi addım

Bakı:

7 °C

87 %

4 m/s

Əlaqə

AZ RU EN

Ana səhifə / YAP xəbərləri / Mühüm ictimai-siyasi addım

Mühüm ictimai-siyasi addım

22.12.2025 [15:06]

Azərbaycan Respublikasının Prezidenti cənab İlham Əliyevin “Konstitusiya və Suverenlik İli” münasibətilə amnistiyanın elan edilməsi təşəbbüsü Azərbaycan Respublikasında hüquqi dövlət quruculuğunun, insan hüquqlarının təminatının və humanizm prinsiplərinin ardıcıl şəkildə həyata keçirilməsinin mühüm göstəricilərindən biri kimi dəyərləndirilir. Bu təşəbbüs müasir Azərbaycan dövlətçiliyinin əsas sütunları olan Konstitusiyaya hörmət, milli suverenliyin qorunması və vətəndaş–dövlət münasibətlərində qarşılıqlı etimadın möhkəmləndirilməsi baxımından xüsusi əhəmiyyət kəsb edir.

Konstitusiyamızda insan hüquq və azadlıqlarının prioritetliyi, qanun qarşısında bərabərlik, ədalətli məhkəmə araşdırması və dövlət hakimiyyətinin məsuliyyəti kimi fundamental prinsiplər öz əksini tapmışdır. “Konstitusiya və Suverenlik İli”nin elan edilməsi bu prinsiplərin yalnız normativ-hüquqi müstəvidə deyil, praktik fəaliyyət səviyyəsində də möhkəmləndirilməsinə yönəlmiş siyasi iradənin ifadəsidir.

Amnistiya aktları Azərbaycan dövlətinin hüquq siyasətində xüsusi yer tutur və cəza siyasətinin humanistləşdirilməsinə xidmət edir. Belə aktlar, bir tərəfdən, az ağır və böyük ictimai təhlükə törətməyən cinayətlərə görə məhkum olunmuş şəxslərin cəmiyyətə yenidən inteqrasiyasına şərait yaradır, digər tərəfdən isə penitensiar sistemdə yüngülləşməni təmin edir.Ölkə Prezidentinin təşəbbüsü ilə irəli sürülən amnistiyalar, bir qayda olaraq, sosial baxımdan həssas kateqoriyalara aid olan şəxsləri – qadınları, yaşlıları, sağlamlıq imkanları məhdud olanları və ilk dəfə cinayət törətmiş şəxsləri əhatə etməklə cəmiyyətin humanizm prinsiplərinə sadiqliyini nümayiş etdirir.

Güclü dövlət yalnız hüquq-mühafizə mexanizmləri ilə deyil, eyni zamanda bağışlamaq, islahata imkan yaratmaq və vətəndaşa ikinci şans vermək bacarığı ilə səciyyələnir. Bu yanaşma həm milli dövlətçilik ənənələrinə, həm də beynəlxalq hüququn və müasir demokratik cəmiyyətlərin qəbul etdiyi humanist dəyərlərə tam uyğundur.

Cəzadan azad edilən və ya cəzası yüngülləşdirilən şəxslərin ailələrinin sosial rifahına müsbət təsir göstərilməsi, onların normal həyata qayıdışının təşviq edilməsi dövlətin sosial məsuliyyətinin real ifadəsidir. Bu addım vətəndaşların dövlətə olan inamını daha da artırır və hüquqi dövlət anlayışının cəmiyyət tərəfindən daha dərindən mənimsənilməsinə şərait yaradır.

Nəticə olaraq, ölkə Prezidenti İlham Əliyevin “Konstitusiya və Suverenlik İli” münasibətilə amnistiyanın elan edilməsi təşəbbüsü Azərbaycan Respublikasında hüquqi islahatların dərinləşdirilməsi, insan hüquq və azadlıqlarının qorunması, milli suverenliyin möhkəmləndirilməsi və humanist dəyərlərin təşviqi baxımından mühüm əhəmiyyət daşıyır. Bu təşəbbüs müstəqil Azərbaycan dövlətinin güclü, ədalətli və vətəndaş yönümlü siyasətinin məntiqi davamı kimi çıxış edir və ölkənin dayanıqlı inkişaf strategiyasına xidmət edən mühüm ictimai-siyasi addım kimi tarixə düşür.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 218 dəfə