Zəfərə aparan güc

Bakı:

19 °C

77 %

3 m/s

Əlaqə

AZ RU EN

Ana səhifə / YAP xəbərləri / Zəfərə aparan güc

Zəfərə aparan güc

19.11.2025 [14:46]

21 noyabr 2025-ci il Yeni Azərbaycan Partiyasının təsis edilməsinin 33-cü ildönümüdür. Üç onilliyi aşan bu yol müasir Azərbaycanın dövlətçilik ənənələrinin formalaşması, milli ideologiyanın möhkəmlənməsi, ölkənin sabitlik və inkişaf xəttinə qədəm qoyması ilə səciyyələnir. YAP-ın yaranması təkcə siyasi partiyanın təsisi deyil, həm də müstəqilliyini yenicə bərpa etmiş Azərbaycanın qarşısında duran taleyüklü çağırışlara cavab idi.

1990-cı illərin əvvəllərində ölkədə yaşanan siyasi böhran, separatizm meylləri və hakimiyyət boşluğu Azərbaycanı təhlükəli uçuruma aparırdı. Məhz belə bir dövrdə xalqın tələbi ilə Ümummilli Lider Heydər Əliyev siyasi proseslərə qayıtdı və onun rəhbərliyi ilə 1992-ci il noyabrın 21-də Naxçıvanda Yeni Azərbaycan Partiyası təsis olundu. Partiya qısa müddətdə ölkə üzrə geniş təşkilatlanma prosesinə başladı və heç bir siyasi gücün uğur qazana bilmədiyi çətin dövrdə xalqın etimadını qazandı.

1993-cü ildən etibarən Ulu Öndərin rəhbərliyi ilə YAP ölkənin aparıcı siyasi qüvvəsinə çevrildi, dövlətçiliyin möhkəmləndirilməsi, iqtisadi islahatlar, hüquqi dövlət quruculuğu və beynəlxalq əlaqələrin genişlənməsi istiqamətində mühüm addımlar atıldı. Məhz bu illərdə Azərbaycanın geosiyasi mövqeyi gücləndi, ölkə regionun inkişaf edən lider dövlətinə çevrildi.

2003-cü ildən Prezident İlham Əliyev Heydər Əliyevin siyasi kursunu yeni dövrün tələblərinə uyğun şəkildə inkişaf etdirərək ölkəni modern transformasiya mərhələsinə çıxardı. YAP-ın dövlət siyasətindəki çəkisi daha da artdı, partiya cəmiyyətin bütün təbəqələrini əhatə edən geniş siyasi institut kimi formalaşdı.

Prezident İlham Əliyevin rəhbərliyi altında Azərbaycanın strateji inkişaf xətti, güclü ordu quruculuğu, iqtisadi yüksəliş və sosial rifah siyasəti ölkənin tarixi Qələbəyə aparan amillərdən biri oldu. 44 günlük Vətən müharibəsində əldə edilən Zəfər Prezident, Ali Baş Komandan İlham Əliyevin qətiyyətli liderliyi, milli həmrəyliyi və dövlətin gücünü səfərbər edən siyasətinin nəticəsi kimi tarixə düşdü.

Post-müharibə dövrü YAP üçün yeni mərhələ açdı. İşğaldan azad edilmiş ərazilərdə bərpa və quruculuq işləri, “Böyük Qayıdış” proqramının reallaşması, regionda sülhün təmin olunması istiqamətində aparılan siyasət partiyanın fəaliyyət istiqamətlərində önəmli yer tutur. İqtisadiyyatın şaxələndirilməsi, rəqəmsal islahatlar və sosial dövlət konsepsiyasının dərinləşdirilməsi YAP-ın gündəliyinin əsas istiqamətləridir.

33 illik fəaliyyəti boyunca YAP özünü təkcə iqtidar partiyası deyil, həm də cəmiyyətin intellektual və siyasi aparıcı qüvvəsi kimi təsdiq edib. Partiya Azərbaycanda siyasi sabitliyin, milli həmrəyliyin, dövlətçilik ideallarının daşıyıcısına çevrilib.

Yeni Azərbaycan Partiyasının 33 illik tarixi müstəqil Azərbaycanın siyasi salnaməsinin əsas tərkib hissəsidir. Ulu öndər Heydər Əliyevin yaratdığı, Prezident İlham Əliyevin isə uğurla inkişaf etdirdiyi YAP bu gün də ölkənin inkişaf strategiyasının ideoloji dayağı olaraq çıxış edir və dövlətimizin qarşıdakı hədəflərinə doğru aparan güclü siyasi platforma olaraq fəaliyyətini davam etdirir.

Sahib Şükürov

YAP Göyçay rayon təşkilatının sədr

Paylaş:

Baxılıb: 678 dəfə