Qara şəhəri ağ şəhərə çevirdik

Bakı:

25 °C

55 %

1 m/s

Əlaqə

AZ RU EN

Ana səhifə / YAP xəbərləri / Qara şəhəri ağ şəhərə çevirdik

Qara şəhəri ağ şəhərə çevirdik

15.11.2025 [14:52]

İlqar İlyasov

YAP Laçın rayon təşkilatının sədri

12 noyabr 2025-ci il tarixində Prezident İlham Əliyevin Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsini və bir sıra rayonların icra hakimiyyəti başçılarını qəbul edərək çıxış etməsi həm idarəetmə sahəsində yeni mərhələnin başlanğıcı, həm də ölkədə gedən genişmiqyaslı dəyişikliklərin davamlı xarakter daşıdığının növbəti təsdiqi kimi qiymətləndirilir. Prezident bu görüşdə dövlət idarəçiliyinin mahiyyəti, yerli icra strukturlarının məsuliyyəti, xalqla birbaşa təmas, şəffaflıq, korrupsiyaya yer verilməməsi kimi məsələləri qabartmaqla yanaşı, Azərbaycanın illər ərzində həyata keçirdiyi böyük yenidənqurma layihələrinin ən simvolik nümunələrindən biri olan “Qara şəhərdən Ağ şəhərə” keçidi xatırladaraq qeyd edib ki, bu model ölkənin bütün bölgələrinin inkişaf fəlsəfəsini özündə əks etdirir. İlham Əliyevin çıxışında səsləndirdiyi fikirlər göstərdi ki, ölkənin hər bir bölgəsi üçün nəzərdə tutulan dövlət siyasətinin mahiyyəti təkcə iqtisadi və sosial yüksəliş deyil, həm də müasir şəhərsalma, ekoloji tarazlıq, səliqəli inzibati idarəçilik və insan həyatının keyfiyyətinin yüksəldilməsidir. Prezident vurğuladı ki, yeni təyinat alan məmurlar xalqın etimadını doğrultmaq üçün ilk növbədə öz işlərini şəffaflıq, nizam-intizam və məsuliyyətlə qurmalıdırlar. O, bildirdi ki, hər bir məmurun başlıca vəzifəsi xalqa xidmət etməkdir və bu xidmət yalnız sözlə deyil, konkret işlərlə özünü göstərməlidir. O, həmçinin qeyd etdi ki, ölkənin bütün regionlarında yaşanan dəyişikliklər və aparılan quruculuq işləri təsadüfi deyil, ardıcıl və sistemli dövlət siyasətinin nəticəsidir. Prezident bu görüş zamanı urbanizasiya, ekoloji mühitin mühafizəsi, yeni infrastruktur layihələri və insan həyatının keyfiyyətinin yaxşılaşdırılması kimi məqamları ön plana çəkərək, xüsusilə Bakı şəhərinin keçmiş “Qara şəhər” adlanan sənaye zonası nümunəsini xatırlatdı. O bildirib ki, vaxtilə ağır sənaye tullantıları ilə çirklənmiş, yaşayış üçün yararsız bir məkan olan həmin ərazi bu gün tamamilə yenidən qurulmuş, dünyanın ən müasir şəhərsalma standartlarına uyğun “Ağ şəhər” kimi formalaşdırılmışdır. “Qara şəhəri Ağ şəhərə çevirdik” ifadəsi Prezidentin dilində təkcə memarlıq uğurunun ifadəsi deyil, həm də dövlətin ümumi inkişaf strategiyasının parlaq simvolu kimi səslənir. Bu ifadə Prezidentin, Azərbaycan dövləti istənilən köhnə, çirkli, yararsız və insan yaşamına uyğun olmayan mühiti müasir, ekoloji təmiz, funksional və abad bir məkana çevirməyə qadirdir, - mesajı kimi dəyərləndirilməlidir. Bu, sadəcə şəhərsalma nailiyyəti deyil, həm də idarəçilik fəlsəfəsidir.

Prezidentin çıxışında vurğuladığı digər mühüm məqam ondan ibarət oldu ki, icra hakimiyyəti başçıları öz fəaliyyətlərini yalnız mərkəzdən gələn tapşırıqlar əsasında deyil, həm də yerli əhalinin ehtiyac və problemlərini dərindən öyrənməklə qurmalıdırlar. Onun sözlərinə görə, bölgələrdə insanların gündəlik həyatı ilə bağlı məsələlər – yol, su, enerji təminatı, sosial xidmətlər, təmiz və sağlam mühit, təhlükəsizlik və ictimai nizam – hər bir məmurun diqqət mərkəzində olmalıdır. Prezident qeyd etdi ki, ölkənin regional inkişaf modeli uzun illər ərzində sistemli şəkildə qurulub və bu modeldə əsas məqsəd paytaxtla bölgələr arasında inkişaf fərqini minimuma endirmək, hər bir rayonda insanların eyni standartlarda xidmət almasını təmin etməkdir. İlham Əliyev həmçinin bildirdi ki, dövlətin indiyədək həyata keçirdiyi layihələrin hər biri strateji məna daşıyır. Məsələn, “Ağ şəhər” layihəsi yalnız paytaxtda yeni yaşayış məkanları yaratmaq deyil, həm də ekoloji tarazlığı bərpa etmək, şəhər mühitində təbiət-insan münasibətini yenidən qurmaq məqsədi daşıyırdı. O qeyd etdi ki, bu təcrübə Azərbaycanda bütün şəhər və rayonların yenidən qurulması üçün örnək ola bilər və bu gün ölkənin hər bir bölgəsində “Ağ şəhər” fəlsəfəsinin tətbiqinə ehtiyac var. Prezidentin nitqindən aydın göründü ki, yeni təyin edilən rəhbərlərə verilən tapşırıqlar sadəcə vəzifə öhdəlikləri deyil, həm də genişmiqyaslı dövlət siyasətinin tərkib hissəsidir. Bu tapşırıqlar insanların dövlətə olan inamını gücləndirməyə, xidmətin keyfiyyətini artırmağa, korrupsiyaya qarşı ciddi mübarizə aparmağa yönəlib. O vurğuladı ki, xalqın gözləntisi yüksəkdir və icra başçıları bu etimadı doğrultmaq üçün səylərini maksimum artırmalıdırlar. Prezident İlham Əliyevin sözügedən çıxışı bir daha sübut etdi ki, Azərbaycan rəhbərliyi ölkədə gedən inkişaf prosesinə yalnız iqtisadi və sosial sahələrdən deyil, həm də ekoloji, şəhərsalma, idarəetmə və insan amili baxımından yanaşır. “Qara şəhəri Ağ şəhərə çevirdik” ifadəsi bu baxışın mahiyyətini, yəni çirkin olanı gözəlləşdirmək, köhnəni yeniləmək, yararsızı yararlı etmək, qaranı işığa çıxarmaq fəlsəfəsini simvolizə edir. Bu görüş, həm yeni təyinat alan rəhbərlərə mesaj, həm də ölkə üçün növbəti strateji istiqamətin elan edilməsi kimi qiymətləndirilə bilər.

Paylaş:

Baxılıb: 618 dəfə