Texnoloji inkişaf bizim üçün əsas prioritet olmalıdır

Bakı:

12 °C

76 %

5 m/s

Əlaqə

AZ RU EN

Ana səhifə / YAP xəbərləri / Texnoloji inkişaf bizim üçün əsas prioritet olmalıdır

Texnoloji inkişaf bizim üçün əsas prioritet olmalıdır

05.11.2025 [15:33]

3 noyabr 2025-ci il tarixi təkcə Azərbaycan Milli Elmlər Akademiyasının (AMEA) 80 illik yubileyi deyil, həm də ölkənin dövlət başçısı tərəfindən tarixi hədəflər ilə gələcək iqtisadi model arasında əlaqənin rəsmiləşdiyi gün kimi yadda qaldı.

Prezident İlham Əliyevin AMEA-nın yubiley tədbirindəki çıxışı rəsmi təbrikdən çox, Post-Zəfər Erasında Azərbaycanın inkişafının mərkəzində elmin və biliyin durduğunu bəyan edən fundamental siyasi sənəd oldu.
Dövlət başçısı çıxışının əvvəlində Azərbaycanın siyasi uğurunun zirvəsinə toxunaraq, "Əsas vəzifə - torpaqlarımızın azad edilməsi, ərazi bütövlüyümüzün bərpası, suverenliyimizin bərpası layiqincə təmin edilmişdir" fikrini qətiyyətlə vurğuladı. Bu, sadəcə tarixi fakta istinad deyil, həm də daxili və xarici auditoriyaya ünvanlanmış fundamental siyasi mesajdır: Azərbaycanın ərazi məsələsi birdəfəlik bağlanıb, indi bütün diqqət daxili inkişafa yönəldilməlidir.

Prezidentin Zəfər Günü və Bayraq Günü ərəfəsində çıxış etməsi təsadüfi deyil. Bu, elmin və intellektin də hərb meydanındakı uğurlar qədər dəyərli olduğunu göstərən simvolik bir əlaqə idi. Çıxışın ən samballı və iqtisadi perspektiv baxımından ən maraqlı məqamı isə, iqtisadi gələcəyə dair qoyulan prioritetlər idi:
"Hər kəs yaxşı bilir ki, təbii sərvətlər tükənən sərvətlərdir, gec-tez tükənəcək. Tükənməz sərvət isə intellektual potensialdır, amma o halda əgər buna sərmayə qoyularsa." Bu fikir, Azərbaycanın bilik iqtisadiyyatına keçid strategiyasının siyasi manifestidir. Bu, neft və qazdan əldə edilən gəlirlərin məqsədyönlü şəkildə insan kapitalına, təhsilə və elmə yönəldilməsi siyasətinin davamlılığını təsdiqləyir. Prezidentin qeyd etdiyi kimi, "O sərmayəni dövlət qoymalıdır". Bu, AMEA-nın və elm ictimaiyyətinin fəaliyyətinə dövlət büdcəsindən ayrılan vəsaitlərin gələcəkdə yalnız dəstək deyil, həm də prioritet maliyyələşmə kimi nəzərdə tutulduğunu göstərir.

Prezident eyni zamanda elm ictimaiyyətinin qarşısına mühüm vəzifələr qoydu: "Ölkənin elm ictimaiyyəti, alimlər bu istiqamətdə öz səylərini göstərməlidirlər." Bu, AMEA-nın sadəcə fundamental tədqiqat mərkəzi deyil, həm də ölkənin iqtisadiyyatına birbaşa töhfə verən, innovasiyaları kommersiyalaşdıran və dövlət proqramlarına elmi dəstək göstərən əsas institut kimi çıxış etməli olduğunu bildirir.

Çıxışda ayrıca yeni iqtisadi sahələr prioritet kimi qeyd olundu, xüsusilə də bərpaolunan enerji növlərinin yaradılması. Prezidentin Qarabağ və Şərqi Zəngəzurda son beş ildə 30-dan çox su elektrik stansiyasının inşasını, Günəş və külək elektrik stansiyaları layihələrini xüsusi vurğulaması təsadüfi deyil.
Bu, elmi-tədqiqat institutlarının, o cümlədən AMEA-nın Yaşıl Enerji Strategiyasına texnoloji və elmi dəstək vermək öhdəliyini aktuallaşdırır. Müasir elm infrastrukturunun və rəqəmsal transformasiyanın məhz bu yeni iqtisadi dalğalara xidmət etməsi tələb olunur.
Prezident İlham Əliyevin AMEA-nın 80 illik yubileyindəki çıxışı Azərbaycanın dövlət siyasətinin köklü transformasiyasını göstərir. Ərazi bütövlüyü təmin edildikdən sonra, dövlət başçısı "qara qızıl"dan "ağ qızıl"a – bilik və texnologiyalara keçidi rəsmiləşdirdi. Bu, AMEA üçün də yeni bir 80 illik mərhələnin başlanğıcıdır: Elmi potensial dövlət siyasətinin əsas hərəkətverici qüvvəsinə çevrilir.

İskəndərova Lalə

YAP Qusar rayon təşkilatının fəal üzvü

Paylaş:

Baxılıb: 392 dəfə