Qubadlıda bərpa və yenidənqurma işləri böyük vüsət alıb

Bakı:

21 °C

68 %

3 m/s

Əlaqə

AZ RU EN

Ana səhifə / YAP xəbərləri / Qubadlıda bərpa və yenidənqurma işləri böyük vüsət alıb

Qubadlıda bərpa və yenidənqurma işləri böyük vüsət alıb

25.10.2025 [16:43]

Oktyabrın 25-i Qubadlı şəhərinin işğaldan azad edilməsi ilə 44 günlük müharibənin gedişatında əhəmiyyətli dönüş nöqtəsi oldu. Qubadlının işğaldan azad edilməsi müharibə dövründə mühüm nailiyyətə və ərazi bütövlüyünün bərpa olunmasının simvollarından birinə çevrildi.

Bu gün digər işğaldan azad edilmiş bölgələrdə olduğu kimi, Qubadlı rayonunun da inkişafı ilə bağlı genişmiqyaslı işlər aparılır.

Cənab Prezident İlham Əliyevin Qubadlıya səfərləri zamanı həyata keçirilən bir çox önəmli təməlqoyma və açılış tədbirləri rayonun bərpa və yenidənqurma işlərinin böyük vüsət aldığından xəbər verir.

Azərbaycan Respublikasının Prezidenti cənab İlham Əliyevin 2021-ci il oktyabrın 25-də Qubadlıya səfəri də bir sıra mühüm strateji əhəmiyyətli layihələrin təməlqoyma və açılış mərasimləri ilə yadda qaldı.

Səfər zamanı ölkə başçısı işğaldan azad edilmiş ərazilərin yenidən qurulması və bərpası layihəsi çərçivəsində Xudafərin-Qubadlı-Laçın avtomobil yolunun 10-cu kilometrliyindən Qubadlı şəhər mərkəzinə gedən Xanlıq-Qubadlı yolunun təməlini qoymuşdur.

Qarabağın inkişaf planı nəzərə alınmaqla Xudafərin-Laçın və Xanlıq-Qubadlı avtomobil yolları dörd hərəkət zolaqlı olmaqla işğaldan azad edilmiş Zəngilan, Qubadlı və Laçın rayonlarının ərazisindən keçir. Avtomobil yolu Qubadlı və Laçın şəhərləri də daxil olmaqla, bu rayonların 30-dan çox yaşayış məntəqəsini əhatə edir.

Azərbaycan Respublikasının Prezidenti cənab İlham Əliyev həmin gün sistem əhəmiyyətli 110/35/10 kV-luq “Qubadlı” yarımstansiyasını işə saldı.

Bununla Qubadlıda Dördüncü Sənaye İnqilabına uyğun olaraq intellektual enerjisistem şəbəkəsi konsepsiyası həyata keçirilərək müasir, dayanıqlı, tam rəqəmsallaşdırılmış yarımstansiya yaradılmış oldu.

İşğaldan azad olunmuş ərazilərdə zəruri sərhəd müdafiə və mühafizə infrastrukturunun yaradılması üzrə fəaliyyətlər də davam etdirilir. Ölkə başçısı Qubadlıya səfəri zamanı Ermənistanla dövlət sərhədinin Qubadlı və Laçın rayonları ərazisindən keçən hissəsinin mühafizəsini təmin edən Dövlət Sərhəd Xidmətinin yeni hərbi hissə kompleksinin açılışında iştirak etmişdir.

Hərbi hissədə xidmətin yüksək səviyyədə aparılması, şəxsi heyətin döyüş qabiliyyətinin təkmilləşdirilməsi, peşəkar vərdişlərinin daha da inkişaf etdirilməsi üçün hərtərəfli şərait yaradılmışdır.

Qubadlının azad edilməsi kimi tarixi bir günü birlikdə qeyd etmək üçün dəvət edilmiş rayon ictimaiyyəti ilə görüşən Azərbaycan Respublikasının Prezidenti cənab İlham Əliyev qubadlıları təbrik edərək qeyd etdi ki, “Bu, doğrudan da Azərbaycanın tarixində əbədi yaşayacaq bir gündür”.

Akif Əliyev

YAP Ağcabədi rayon təşkilatının əməkdaşı

Paylaş:

Baxılıb: 612 dəfə