Regional əməkdaşlığın yeni mərhələsi

Bakı:

21 °C

64 %

3 m/s

Əlaqə

AZ RU EN

Ana səhifə / YAP xəbərləri / Regional əməkdaşlığın yeni mərhələsi

Regional əməkdaşlığın yeni mərhələsi

23.10.2025 [15:03]

Prezident İlham Əliyev 2025-ci il oktyabrın 20–21-də Qazaxıstana dövlət səfəri etmişdir. Bu səfər iki ölkə arasında strateji münasibətlərin yeni mərhələyə qədəm qoyduğunu göstərdi. Səfər zamanı keçirilən yüksək səviyyəli görüşlər, imzalanan sənədlər və Prezidentlərin mətbuata verdiyi bəyanatlar regionda siyasi, iqtisadi və nəqliyyat əməkdaşlığının gələcək istiqamətlərini müəyyənləşdirdi.

Prezident İlham Əliyev çıxışında qeyd edib ki, Azərbaycan və Qazaxıstan təkcə strateji tərəfdaş deyil, həm də qardaş ölkələrdir. Xalqlarımızı ortaq tarix, dil, mədəniyyət və dəyərlər birləşdirir. Dövlət başçısının “Bizim münasibətlərimiz qardaşlıq, dostluq və qarşılıqlı etimad prinsiplərinə əsaslanır. Bu, sadəcə siyasi deyil, xalqlarımızın təbiətindən gələn bağlılıqdır.” – sözləri iki ölkə əlaqələrinin yalnız rəsmi səviyyədə deyil, həm də mənəvi dəyərlər üzərində qurulduğunu göstərir. Bu, diplomatik münasibətlərin dayanıqlı və uzunmüddətli olmasının əsas təminatıdır.

Prezident İlham Əliyev bəyanatında iqtisadi əlaqələrin möhkəmləndirilməsinin əsas prioritetlərdən biri olduğunu vurğulayıb. Cənab Prezident bildirib ki, iki ölkə arasında ticarət dövriyyəsi son illər artmaqdadır və yaxın gələcəkdə bu göstərici 1 milyard ABŞ dollarına çatdırılmalıdır.

Dövlət başçısı həmçinin qeyd edib ki, Azərbaycan və Qazaxıstan “Orta Dəhliz” nəqliyyat marşrutu çərçivəsində bir-birini tamamlayan strateji mövqeyə malikdir. Bu istiqamətdə əməkdaşlıq yalnız iki ölkə üçün deyil, bütün region üçün iqtisadi inteqrasiyanın dərinləşməsi deməkdir.

“Biz ‘Orta Dəhliz’in səmərəli işləməsinə, bu dəhlizin beynəlxalq əhəmiyyətinin artmasına böyük önəm veririk. Qazaxıstan və Azərbaycan bu layihənin iki əsas dayağıdır.” Bu fikir həm Azərbaycanın, həm də Qazaxıstanın regionda tranzit-logistika mərkəzinə çevrilməsi siyasətini dəstəkləyir. Bu, Cənubi Qafqaz və Mərkəzi Asiyanın geoiqtisadi inteqrasiyasının əsas xəttini müəyyənləşdirir.

Prezident İlham Əliyev çıxışında Ermənistanla münasibətlərin normallaşması və regionda sülhün bərqərar olması məsələsinə də toxunub. O qeyd edib ki, artıq bu istiqamətdə real addımlar atılır və proses kağız üzərində deyil, praktik səviyyədə özünü göstərir.

“Sülh prosesi artıq praktik səviyyədə özünü göstərir. Ermənistanla sərhədlərin müəyyənləşməsi və tranzit əlaqələrinin açılması istiqamətində konkret nəticələr var.” Bu bəyanat regionda uzun illər davam edən qarşıdurma dövrünün sona çatması və əməkdaşlıq mühitinin yaranması baxımından mühüm mesajdır. Bu, Azərbaycanın regional diplomatiyasının yeni mərhələyə keçdiyini, iqtisadi inteqrasiyanın siyasi sabitliklə birgə inkişaf etdiyini göstərir.

Səfər zamanı tərəflər süni intellekt, innovasiya və rəqəmsal iqtisadiyyat sahəsində əməkdaşlıq məsələlərinə də toxundular. Prezident İlham Əliyev bildirib ki, bu istiqamət gələcək inkişafın əsas dayağı olacaq: “Biz rəqəmsal texnologiyalar və süni intellekt sahəsində əməkdaşlığı strateji prioritet hesab edirik. Bu sahədə birgə layihələr gələcək nəsillər üçün yeni imkanlar yaradacaq.”

Prezident İlham Əliyevin çıxışında Türk Dövlətləri Təşkilatına xüsusi yer ayrıldı. Dövlət başçısı vurğuladı ki, Azərbaycan və Qazaxıstan bu təşkilatın birliyinin və həmrəyliyinin möhkəmlənməsi üçün fəal çalışırlar.

“Türk Dövlətləri Təşkilatı çərçivəsində əməkdaşlığımız qardaşlığımızın təbii davamıdır. Türk dünyasının birliyi və gücü regionda sülh və sabitlik üçün vacibdir,” – deyə Dövlətimizin başçısı əlavə edib.

Prezident İlham Əliyevin Qazaxıstan səfəri və mətbuata verdiyi bəyanatlar Azərbaycan–Qazaxıstan münasibətlərinin təkcə bugünkü deyil, gələcək strateji xəttini də müəyyənləşdirdi. Bu səfər həm siyasi, həm iqtisadi, həm də mədəni baxımdan yeni mərhələnin başlanğıcı kimi dəyərləndirilir. Qardaş ölkələr arasında formalaşan qarşılıqlı etimad və əməkdaşlıq regionun sabitliyinə, inkişafına və Türk dünyasının birliyinə töhfə verir.

Sahib Şükürov

YAP Göyçay rayon təşkilatının sədri

Paylaş:

Baxılıb: 572 dəfə