Azərbaycan və Qazaxıstan qardaşlıq, strateji tərəfdaşlıq və ortaq inkişaf yolunda

Bakı:

24 °C

49 %

1 m/s

Əlaqə

AZ RU EN

Ana səhifə / YAP xəbərləri / Azərbaycan və Qazaxıstan qardaşlıq, strateji tərəfdaşlıq və ortaq inkişaf yolunda

Azərbaycan və Qazaxıstan qardaşlıq, strateji tərəfdaşlıq və ortaq inkişaf yolunda

23.10.2025 [22:38]

2025-ci il oktyabrın 21-də Astanada keçirilən Azərbaycan–Qazaxıstan Ali Dövlətlərarası Şurasının ikinci iclası iki ölkə arasında strateji tərəfdaşlıq və qardaşlıq münasibətlərinin yüksək səviyyəsini bir daha nümayiş etdirdi. Azərbaycan Respublikasının Prezidenti İlham Əliyev çıxışında qeyd etdi ki, Qazaxıstan Respublikasının Prezidenti Kasım-Jomart Tokayevin rəhbərliyi ilə ölkə regionda sabitliyin, iqtisadi tərəqqinin və əməkdaşlığın aparıcı mərkəzinə çevrilib.

Prezident İlham Əliyev vurğuladı ki, Qazaxıstanın beynəlxalq arenadakı nüfuzu onun çoxvektorlu xarici siyasətinin, habelə regional və qlobal təşəbbüslərdə fəal iştirakının nəticəsidir. Qazaxıstanın siyasi, iqtisadi və mədəni sahələrdə əldə etdiyi nailiyyətlər Türk dünyasının inkişafına da mühüm töhfə verir. Azərbaycanın bu uğurları dost və qardaş Qazaxıstanın uğurları kimi qəbul etməsi iki xalq arasında sarsılmaz qardaşlıq bağlarının göstəricisidir. Azərbaycan və Qazaxıstan beynəlxalq təşkilatlar çərçivəsində qarşılıqlı dəstək prinsipinə sadiqdirlər. Hər iki dövlət Birləşmiş Millətlər Təşkilatı, İslam Əməkdaşlıq Təşkilatı, Türk Dövlətləri Təşkilatı və digər beynəlxalq qurumlarda bir-birinin mövqelərini ardıcıl olaraq dəstəkləyir. Prezident İlham Əliyev bəyanatında qeyd etdi ki, bu əməkdaşlıq yalnız diplomatik əlaqələrlə məhdudlaşmır, həm də ortaq tarixi və mənəvi dəyərlərdən qaynaqlanır. Xüsusilə Türk Dövlətləri Təşkilatının çərçivəsində Azərbaycan–Qazaxıstan əməkdaşlığı regional inteqrasiyanın dərinləşməsinə mühüm töhfə verir. Hər iki ölkə türkdilli dövlətlərin iqtisadi, nəqliyyat, enerji və humanitar sahələrdə əməkdaşlığının inkişafına yönəlmiş strateji təşəbbüslər irəli sürür. Astanada keçirilən görüş çərçivəsində Azərbaycan Respublikası ilə Qazaxıstan Respublikası arasında bir sıra mühüm sənədlər imzalanıb. Bu sənədlər əməkdaşlığın yeni mərhələsini müəyyənləşdirir və çoxşaxəli əlaqələrin inkişafını təmin edir. Sazişlər iqtisadiyyat, nəqliyyat-logistika, enerji, mədəniyyət və təhsil sahələrini əhatə edir. Ən mühüm istiqamətlərdən biri Xəzər dənizi üzərindən keçən nəqliyyat dəhlizlərinin genişləndirilməsi və Orta Dəhlizin potensialının artırılmasıdır. Bu əməkdaşlıq həm ikitərəfli, həm də regional səviyyədə strateji əhəmiyyət daşıyır. Mədəniyyət və təhsil sahələrində imzalanmış razılaşmalar xalqlar arasında qarşılıqlı anlaşma və dostluğun daha da möhkəmlənməsinə xidmət edir. Azərbaycan və Qazaxıstan arasında münasibətlər strateji tərəfdaşlıqdan daha yüksək səviyyəyə — qardaşlıq müstəvisinə yüksəlib. Astanada keçirilmiş Ali Dövlətlərarası Şuranın ikinci iclası bu əlaqələrin gələcək inkişafına güclü təkan verdi. Prezident İlham Əliyevin çıxışında səsləndirdiyi fikirlər iki ölkənin ortaq tarixə, mədəniyyətə və siyasi dəyərlərə söykənən birgə gələcəyə inamını bir daha təsdiqlədi. Azərbaycan–Qazaxıstan əməkdaşlığı Türk dünyasının birliyinin güclənməsinə, regionda sabitlik və rifahın möhkəmlənməsinə xidmət edir. Hər iki ölkə arasındakı qardaşlıq münasibətləri gələcəkdə də çoxşaxəli əməkdaşlığın daha da dərinləşməsi üçün etibarlı zəmin yaradır.

Kənan Quliyev

YAP Laçın rayon təşkilatının məsləhətçisi

Paylaş:

Baxılıb: 450 dəfə