Vətən müharibəsində qazanılan möhtəşəm qələbə

Bakı:

24 °C

69 %

10 m/s

Əlaqə

AZ RU EN

Ana səhifə / YAP xəbərləri / Vətən müharibəsində qazanılan möhtəşəm qələbə

Vətən müharibəsində qazanılan möhtəşəm qələbə

15.10.2025 [22:47]

Toğrul Zeynalov

YAP Ağdam rayon təşkilatının əməkdaşı

Azərbaycanın ərazi bütövlüyünün bərpası uğrunda 2020-ci il Vətən müharibəsində qazanılan möhtəşəm qələbə ölkəmizin yeni inkişaf mərhələsinin əsasını qoydu. Bu zəfər nəticəsində işğaldan azad olunan ərazilərimizdə, o cümlədən Füzuli rayonunda genişmiqyaslı bərpa-quruculuq işləri həyata keçirilməyə başlandı. Lakin bu prosesin qarşısında duran ən ciddi problemlərdən biri düşmən tərəfindən həmin ərazilərdə, xüsusilə Füzuli rayonunda həyata keçirilmiş genişmiqyaslı minalama siyasətidir. Faktlar göstərir ki, Füzuli rayonu azad edilmiş ərazilər arasında mina ilə ən çox çirkləndirilmiş bölgədir.İşğal dövründə Ermənistan Füzuli ərazisində yalnız hərbi bölgələri deyil, yaşayış məntəqələrini, qəbiristanlıqları, məktəbləri, kənd yollarını, əkin sahələrini, su mənbələrini belə minalamışdır. Bu isə təkcə müharibə dövründə deyil, ondan sonrakı bərpa və dinc həyatın bərpası mərhələsində də insanların həyatına, iqtisadi fəaliyyətə, geri dönüş prosesinə təhlükə yaratmaqdadır. Azərbaycan Respublikasının Minatəmizləmə Agentliyinin (ANAMA) hesabatlarına əsasən, Füzuli rayonu ərazisində aşkar edilən mina və partlamamış hərbi sursatların sayı digər rayonlarla müqayisədə daha çoxdur. Bu faktlar onu göstərir ki, Ermənistan tərəfindən burada məqsədli şəkildə genişmiqyaslı mina terroru həyata keçirilmişdir.Füzulidə mina problemi təkcə təhlükəsizlik məsələsi deyil, həm də humanitar, sosial və iqtisadi problemdir. Torpaq bərpa olunmadan, mina təhlükəsi aradan qaldırılmadan, əhalinin geri dönüşü və normal həyatın qurulması mümkünsüzdür. Çox təəssüf ki, mina partlayışları nəticəsində müharibədən sonra da bir çox hərbi qulluqçular və mülki şəxslər həyatını itirmiş və ya ağır yaralanmışdır. Bu isə işğalın qoyub getdiyi faciəvi irsin davam etdiyini göstərir.

Bu sahədə görülən işlərin başında isə Prezident İlham Əliyevin birbaşa rəhbərliyi və nəzarəti dayanır. Dövlət başçısı azad edilmiş ərazilərdə yenidənqurma işlərinin bütün istiqamətlərində olduğu kimi, mina təmizləmə sahəsində də ciddi siyasi iradə və təşkilati mexanizm formalaşdırmışdır. Prezident İlham Əliyevin tapşırığı ilə müasir texnika və texnologiyalarla təchiz olunmuş ANAMA agentliyi bu ərazilərdə sistemli şəkildə fəaliyyət göstərir. Eyni zamanda, dövlət səviyyəsində beynəlxalq təşkilatlarla və tərəfdaş ölkələrlə mina təmizləmə sahəsində əməkdaşlıqlar genişləndirilib. Prezident İlham Əliyev dəfələrlə çıxışlarında mina təhlükəsini beynəlxalq tribunalarda gündəmə gətirmiş, Ermənistanın bu sahədəki hərbi cinayətlərini dünya ictimaiyyətinin diqqətinə çatdırmışdır.

Bununla yanaşı, dövlət başçısı şəxsən azad olunmuş ərazilərə, o cümlədən Füzuli rayonuna dəfələrlə səfər etmiş, bu səfərlər zamanı mina təhlükəsinə baxmayaraq regionda aparılan işlərə rəhbərlik etmişdir. Füzuli şəhərində təməli qoyulan ilk infrastruktur layihələri – hava limanı, yollar, elektrik xətləri və digər obyektlər Cənab Prezidentin bilavasitə iştirakı və təşəbbüsü ilə həyata keçirilmişdir. Bu faktlar bir daha göstərir ki, mina problemi nə qədər böyük olsa da, Azərbaycan dövləti və onun Lideri bu problemi mərhələli və ardıcıl şəkildə həll etməyə qərarlıdır.

17 oktyabr – Füzuli şəhəri günü qeyd edilərkən, bu torpağın qəhrəmanlıq salnaməsi ilə yanaşı, üzləşdiyi mina terroru da unudulmamalıdır. Bu gün Füzuli dirçəlir, yenidən doğulur, lakin bu yol asan deyil. Hər qarış torpaq həm minalardan təmizlənir, həm də xalqımıza layiq həyatın bərpası üçün hazırlanır. Bu prosesin uğurla irəliləməsi isə Prezident İlham Əliyevin uzaqgörən siyasəti, dövlət qurumlarının fədakar fəaliyyəti və xalqımızın əzmi sayəsində mümkün olur.

Füzuli yalnız işğaldan deyil, minalardan da tam azad olmalıdır – bu, həm şəhidlərimizə borcumuz, həm də gələcək nəsillərə mirasımızdır.

Paylaş:

Baxılıb: 602 dəfə