Milli dövlətçilik tariximizin mühüm mərhələsi

Bakı:

23 °C

76 %

15 m/s

Əlaqə

AZ RU EN

Ana səhifə / YAP xəbərləri / Milli dövlətçilik tariximizin mühüm mərhələsi

Milli dövlətçilik tariximizin mühüm mərhələsi

19.09.2025 [14:46]

Fidan Hüseynova,

YAP Quba rayon təşkilatının sədri

Azərbaycan Respublikasının dövlətçilik tarixi xalqımızın azadlıq, müstəqillik və milli kimlik uğrunda apardığı mübarizələrlə zəngindir. Bu mübarizənin məntiqi nəticəsi kimi Azərbaycan Respublikası Prezidentinin imzaladığı “Azərbaycan Respublikasında Dövlət Suverenliyi Gününün təsis edilməsi haqqında” Sərəncam milli dövlətçiliyimizin inkişafında mühüm addım kimi qiymətləndirilməlidir.

Yeni təsis edilən Dövlət Suverenliyi Günü xalqımızın dövlət müstəqilliyi uğrunda göstərdiyi qətiyyətin, azadlıq iradəsinin və tarixi yaddaşının simvolu olaraq əlamətdar günlər sırasına daxil edilmişdir. Bu qərar həm də Azərbaycanın dövlətçilik ideyalarının gücləndirilməsi, milli həmrəyliyin möhkəmləndirilməsi və gənc nəslin vətənpərvərlik ruhunda tərbiyəsi baxımından mühüm əhəmiyyət daşıyır.

Azərbaycan Respublikasının dövlətçilik tarixində 2023-cü ilin sentyabr hadisələri mühüm dönüm nöqtəsi kimi qiymətləndirilir. Həmin ilin sentyabrın 19-da Ermənistan silahlı qüvvələrinin qalıqları tərəfindən Qarabağ iqtisadi rayonunda törədilən genişmiqyaslı təxribatlara cavab olaraq Azərbaycan dövləti qətiyyətli addım atdı və qanun çərçivəsində antiterror əməliyyatına başladı.

Əməliyyatın məqsədi ölkəmizin konstitusiya quruluşunun bərpa olunması, ərazilərimizdə təhlükəsizlik və sabitliyin təmin edilməsi, qeyri-qanuni silahlı birləşmələrin tərksilah edilməsi idi. Cəmi 23 saat davam edən antiterror tədbirləri nəticəsində Azərbaycan Ordusu qarşısına qoyulmuş bütün vəzifələri yüksək peşəkarlıqla icra etdi. Sentyabrın 20-də başa çatan əməliyyat dövlətimizin suverenlik yolunda əldə etdiyi parlaq Qələbələr sırasına yazıldı.

Bu Zəfərlə Azərbaycan Respublikasının suverenliyi tam bərpa olundu. Ən önəmlisi, ölkəmizin üçrəngli Dövlət Bayrağı uzun illər həsrətində olduğumuz ərazilərdə əzəmətlə dalğalanmağa başladı. Bununla da Azərbaycanın beynəlxalq hüquqa, tarixi ədalətə və milli maraqlara əsaslanan mövqeyi bir daha təsdiqini tapdı.

Azərbaycan xalqı üçün əlamətdar bu hadisə sadəcə hərbi-siyasi qələbə deyil, həm də dövlətçiliyimizin möhkəmlənməsi baxımından strateji əhəmiyyət daşıyır. Xalqımız bütün dünyaya nümayiş etdirdi ki, müstəqilliyimizi və ərazi bütövlüyümüzü qorumaqda qətiyyətli və sarsılmaz iradəyə malikdir.

Məhz bu tarixi əhəmiyyətinə görə hər il sentyabrın 20-i ölkəmizdə Dövlət Suverenliyi Günü kimi təsis edildi. Bu günün qeyd olunması həm qəhrəman əsgərlərimizin şücaətinə, həm də xalqımızın əzmkarlığına verilən ən yüksək qiymətdir. Dövlət Suverenliyi Günü hər bir azərbaycanlı üçün qürur mənbəyi olmaqla yanaşı, gələcək nəsillərə də milli həmrəylik, dövlətçilik və vətənpərvərlik nümunəsi kimi ötürüləcəkdir.

Beləliklə, Azərbaycan Respublikasında Dövlət Suverenliyi Gününün təsis edilməsi müasir tariximizin şanlı səhifələrindən birini təşkil edir. Bu gün dövlətimizin qüdrətini, xalqımızın birlik və qətiyyətini təcəssüm etdirən simvolik hadisədir. Əminliklə demək olar ki, bundan sonra da Azərbaycan xalqı öz müstəqil dövlətini qorumaq, inkişaf etdirmək və daha da möhkəmləndirmək əzmindədir.

Paylaş:

Baxılıb: 507 dəfə