Ərazi bütövlüyümüz və suverenliyimiz xalqımızın milli sərvətidir

Bakı:

24 °C

68 %

7 m/s

Əlaqə

AZ RU EN

Ana səhifə / YAP xəbərləri / Ərazi bütövlüyümüz və suverenliyimiz xalqımızın milli sərvətidir

Ərazi bütövlüyümüz və suverenliyimiz xalqımızın milli sərvətidir

19.09.2025 [17:06]

Əli Paşayev,

YAP Tərtər rayon təşkilatının məsləhətçisi

Özünün siyasi, mədəni tarixinə, taleyinə sahib çıxmaq, müstəqil dövlətini yaradaraq inkişaf etdirmək hər xalqa nəsib olmur. Buna sahib olmaq xalqın ictimai-siyasi həyatında ən böyük nailiyyətidir. Tarix boyunca qarşılaşdığı iqtisadi, siyasi, hərbi çətinliklərə, işğala baxmayaraq, xalqımızın müstəqillik, dövlətçilik arzusu və mübarizəsi əsrlər boyu davam edib, heç bir qüvvə onun bu əzmini sındıra bilməyib.

Azərbaycan tarixində xüsusi bir yeri olan 20 Sentyabr – Dövlət Suverenliyi Günü xalqımızın azadlıq, müstəqillik və milli qürur yolunun simvoludur. Dövlət Suverenliyi Günü - Azərbaycanın mövcudluğunun və davamlılığının əsasıdır.

Azərbaycanın işğal altında olan Qarabağ bölgəsi bütün işğal dövründə Azərbaycanın suveren ərazisi olaraq qaldı. Suveren dövlətin ərazisi daxilində mövcudluğuna və davamlılığına əsaslanan bu prinsip əslində suveren dövlətlər sisteminin mahiyyətindən doğur. Onun inkar edilməsi beynəlxalq hüquqi suverenliyə ciddi zərbə olardı.

2023-cü il sentyabrın 19-da Azərbaycanın Qarabağ iqtisadi rayonunda törədilən genişmiqyaslı təxribatların qarşısının alınması və Ermənistan silahlı qüvvələrinin qalıqlarının tərk-silah edilərək torpaqlarımızdan çıxarılması, həmin ərazilərdə Azərbaycan Respublikası konstitusiya quruluşunun bərpa edilməsi məqsədilə antiterror tədbirlərinə başlaması və qondarma rejimin özünü buraxması Azərbaycanın beynəlxalq birlik tərəfindən tanınmış bütün əraziləri üzərində suverenliyini tam təmin etdi. Xalqımızın həyatında müstəsna əhəmiyyət kəsb edən bu möhtəşəm Zəfər sayəsində Azərbaycanın şanlı Dövlət Bayrağı suverenliyimizin bərqərar olduğu bütün ərazilərdə əzəmətlə dalğalanmaqdadır.

Müzəffər Ali Baş Komandan İlham Əliyevin uzaqgörən siyasəti və Azərbaycan Ordusunun misilsiz qəhrəmanlığı nəticəsində dövlətimizin suverenliyi tam bərpa olundu. Bu tarixi qələbə yalnız hərbi nailiyyət deyil, həm də xalqımızın birliyinin, dövlətimizə inamın və əzəli torpaqlarımıza sarsılmaz bağlılığın təntənəsidir.

Dövlət Suverenliyi Gününün təsis edilməsi, 2025-ci ilin Konstitusiya və Suverenlik İli elan olunması, dövlətçilik tariximizin təbliği və vətəndaşlarımızın, xüsusilə də gənclərin milli-mənəvi dəyərlərə bağlı böyüməsi üçün böyük əhəmiyyət daşıyır. Bu əlamətdar gün həm də bizə xatırladır ki, suverenliyin qorunması daim diqqət mərkəzində olmalı, hər bir Azərbaycan vətəndaşı dövlətimizin güclənməsi üçün öz töhfəsini verməlidir.

Bu gün Azərbaycan xalqı artıq tam suveren dövlətin vətəndaşı olaraq yeni inkişaf mərhələsinə qədəm qoyub. Ərazi bütövlüyümüzün təmin olunması, sərhədlərimizin toxunulmazlığı ölkədə sabitlik və iqtisadi yüksəlişin əsas təminatıdır. Dövlət suverenliyinin qorunması və möhkəmləndirilməsi hər birimizin ali vəzifəsidir.

Azərbaycan dövlətinin, xalqımızın tarixində ən parlaq səhifələrdən biri olan sentyabrın 20-si Sərəncama əsasən hər il ölkəmizdə Dövlət Suverenliyi Günü kimi qeyd ediləcək. Daima var olsun müstəqil və suveren Azərbaycanımız!

Bu günümüz və sabahımız naminə bütün qəhrəmanlarımızın ruhu qarşısında baş əyirik!

Bu zəfər xalqımızın iradəsinin və dövlətimizin qüdrətinin əbədi rəmzidir!

Yaşasın müstəqil Azərbaycan!

Yaşasın Azərbaycan xalqının suverenliyi!

Paylaş:

Baxılıb: 454 dəfə