Vətəndaşların cənab İlham Əliyevi dəstəkləməsi ölkəmizi yeni nailiyyətlərə və möhtəşəm qələbələrə aparır

Bakı:

24 °C

54 %

1 m/s

AZ RU EN

Ana səhifə / YAP xəbərləri / Vətəndaşların cənab İlham Əliyevi dəstəkləməsi ölkəmizi yeni nailiyyətlərə və möhtəşəm qələbələrə aparır

Vətəndaşların cənab İlham Əliyevi dəstəkləməsi ölkəmizi yeni nailiyyətlərə və möhtəşəm qələbələrə aparır

24.09.2013 [10:37]

Goranboy rayonunun Hazırəhmədli, Kələk, Qaramusalı və Xınalı kəndlərində seçicilərlə növbəti görüşlər keçirilib
Dünən Yeni Azərbaycan Partiyası (YAP) Goranboy rayon təşkilatı partiyamızın prezidentliyə namizədi cənab İlham Əliyevin təbliğat-təşviqat kampaniyası çərçivəsində rayonun Hazırəhmədli, Kələk, Qaramusalı, Xınalı kəndlərində seçicilərlə növbəti görüşlərini keçirib.
Tədbiri giriş sözü ilə YAP Goranboy rayon təşkilatının sədri Elçin İsmayilov açaraq qeyd edib ki, cənab Prezident İlham Əliyevin Sədri olduğu Yeni Azərbaycan Partiyası bu gün Azərbaycanın ən böyük siyasi təşkilatı olmaqla bərabər, xalqımızın ali mənafeyini ifadə edən avanqard gücdür. Onun sözlərinə görə, YAP bu gün təkcə Azərbaycanda deyil, ölkəmizin hüdudlarından kənarda tanınan nüfuzlu siyasi güc mərkəzidir: “Bu gün Yeni Azərbaycanın Partiyasının Sədri cənab İlham Əliyev xalqımızın alternativsiz seçimidir. Azərbaycan ictimaiyyəti, o cümlədən, Goranboy seçiciləri cənab Prezident İlham Əliyevi birmənalı şəkildə dəstəkləyir”.
Qarşıdan gələn prezident seçkilərində seçiciləri Yeni Azərbaycan Partiyasının namizədinə səs verməyə çağıran rayon təşkilatının sədri əlavə edib ki, Azərbaycan xalqının Ümummilli lideri Heydər Əliyev ideyalarına sadiq olan və bu ideyalar əsasında fəaliyyət göstərən Yeni Azərbaycan Partiyası Prezident İlham Əliyevin Sədrliyi ilə ötən müddət ərzində böyük inkişaf yolu keçib. Sıralarını daim kəmiyyət və keyfiyyət etibarilə genişləndirən YAP, sözün əsl mənasında, ümumxalq partiyası kimi çıxış etməkdədir: “Partiyamız ötən 10 ildə Azərbaycanın inkişafına böyük töhfələr verib. Azərbaycan ötən 10 ildə böyük inkişaf yolu keçib. Görülən bütün tədbirlər insanların rifah halını daha da yaxşılaşdırıb. Məhz buna görə də, əminliklə söyləyə bilərəm ki, Yeni Azərbaycan Partiyasının Sədri cənab İlham Əliyev 9 oktyabrda keçiriləcək seçkilərdə qələbə qazanacaq”.
Qərargah üzvü Ziya Şükürov isə əmin olduğunu bildirib ki, prezident seçkilərində Azərbaycan seçicilərinin böyük əksəriyyəti seçki məntəqələrinə gələrək Prezident İlham Əliyevə səs verəcəklər. Beləliklə, Yeni Azərbaycan Partiyasının Sədri, ölkə başçısı İlham Əliyev növbəti 5 ildə də Prezident kimi fəaliyyətini davam etdirəcək.
Z.Şükürov əlavə edib ki, Azərbaycan son 10 ildə Prezident İlham Əliyevin rəhbərliyi ilə dünyanın nüfuzlu ölkələrindən birinə çevrilib: “Hazırda Azərbaycan böyük dövlətlərin tərəfdaşıdır. Ölkəmiz beynəlxalq təşkilatlarda uğurla təmsil olunur. Azərbaycan mədəniyyəti dünyada layiqincə təbliğ edilir. Bununla yanaşı, insanların həyat şəraiti olduqca yaxşılaşıb”.
Ölkəmizdə həyata keçirilən siyasətin müsbət nəticələrinin hər bir vətəndaşın, o cümlədən, Goranboy sakinlərinin həyatında hiss edildiyini bildirən qərargah üzvü oktyabrın 9-da seçiciləri cənab İlham Əliyevə səs verməyə çağırıb.
Daha sonra çıxış edən seçicilər Adil Qasımov, Ziya Şükürov, Töhfə Əhmədova, Səbinə Hacıyeva, Əsgər Tağıyev, Tural Məmmədov, Nəsirəddin Məmmədov, Aygün Cabbarova qeyd ediblər ki, Azərbaycanın sürətli inkişafı, insanların sosial rifah halının daha da yaxşılaşması, yeni iş yerlərinin açılması, yoxsulluğun minimum həddə salınması vətəndaşlarda böyük məmnunluq hissi yaradıb. Nəzərə çatdırılıb ki, Prezident İlham Əliyevin rəhbərliyi ilə həyata keçirilən siyasətin mərkəzində Azərbaycan vətəndaşı dayanır. O da xüsusi olaraq qeyd edilib ki, vətəndaşların böyük əksəriyyətinin cənab İlham Əliyevi dəstəkləməsi ölkəmizi yeni nailiyyətlərə və möhtəşəm qələbələrə aparır. Seçicilər 9 oktyabr tarixində keçiriləcək seçkilərdə Yeni Azərbaycan partiyasının namizədi cənab İlham Əliyevə səs verəcəklərini yekdilliklə bəyan ediblər.
NURLAN

Paylaş:

Baxılıb: 1233 dəfə