Sumqayıt seçiciləri inkişafa, sabitliyə səs verəcək

Bakı:

26 °C

50 %

3 m/s

Əlaqə

AZ RU EN

Ana səhifə / YAP xəbərləri / Sumqayıt seçiciləri inkişafa, sabitliyə səs verəcək

Sumqayıt seçiciləri inkişafa, sabitliyə səs verəcək

21.09.2013 [10:08]

YAP Sumqayıt şəhər təşkilatı seçicilərlə növbəti görüşünü keçirib
Oktyabrın 9-da keçiriləcək prezident seçkilərində Yeni Azərbaycan Partiyası (YAP) tərəfindən namizədliyi irəli sürülmüş Azərbaycan Respublikasının Prezidenti cənab İlham Əliyevin Sumqayıt şəhəri üzrə Seçki Qərargahı təbliğat-təşviqat kampaniyasını uğurla davam etdirir.
Dünən bu istiqamətdə keçirilən görüşdə çıxış edən YAP Sumqayıt şəhər təşkilatının sədri Asif İmaməliyev cənab İlham Əliyevin həyata keçirdiyi layihələrdən və ölkədə aparılan abadlıq quruculuq işlərindən ətraflı danışıb. O, 9 oktyabrda keçiriləcək prezident seçkilərinin əhəmiyyətini vurğulayaraq söyləyib ki, Prezident İlham Əliyev təkcə Yeni Azərbaycan Partiyasının deyil, bütün Azərbaycan xalqının seçimidir: “Bu özlüyündə tutarlı bir arqumentdir. Yəni, Prezident İlham Əliyevin 10 illik fəaliyyəti dövründə ölkədə elə bir sahə yoxdur ki, orada dövlət başçısının diqqətinin və qayğısının izləri görünməsin. Bu səbəbdən Prezident İlham Əliyev Azərbaycan xalqının alternativsiz lideridir”.
Çıxış edən millət vəkili Leyla Abdullayeva müstəqil Azərbaycan dövlətinin qurulmasında və inkişaf etməsində Ulu öndər Heydər Əliyevin əvəzsiz xidmətlərindən danışıb. Eyni zamanda, Ulu öndərin siyasətini uğurla davam etdirən, cənab İlham Əliyevin xidmətlərindən bəhs edən millət vəkili hamını seçkilərə və Yeni Azərbaycan Partiyasının namizədinə səs verməyə çağırıb.
Çıxış edən Sumqayıt Dövlət Universitetinin rektoru Nadir Qəhrəmanov da Azərbaycanda gedən sürətli inkişafdan danışıb. Bildirilib ki, bu inkişaf Prezident İlham Əliyevin yorulmaz fəaliyyətinin nəticəsidir: “Prezident İlham Əliyev Azərbaycanı firavan gələcəyə doğru aparan namizəddir. Gəlin inkişafa, gələcəyimizə - İlham Əliyevə səs verək”.
Eldar İsmayılov isə bildirib ki, Azərbaycan gənc bir dövlət olmasına baxmayaraq, qısa müddətdə çox böyük uğurlara imza atıb. Bu isə, heç şübhəsiz ki, ölkəmizdə həyata keçirilən uğurlu daxili və xarici siyasətin nəticəsidir. “Prezident İlham Əliyevin çoxşaxəli fəaliyyətinin nəticəsidir ki, bütün sahələrin paralel inkişafı təmin olunub. Həyata keçirilən sosial-iqtisadi kurs vətəndaşlarının rifah halının daha da yaxşılaşmasına xidmət edib” - deyə, E.İsmayılov vurğulayıb.
Tədbirdə çıxış edən təğliğat-təşviqat qrupunun üzvləri Sabir Məlikov, Mustafa Salahov və Hümbət Quliyev bildiriblər ki, Azərbaycan bayrağını yüksəklərə qaldıran, haqq səsimizi beynəlxalq kürsülərdən səsləndirən, xalqın güzəranını yaxşılaşdıran, dövlətimizi abadlaşdıran, gözəlləşdirən məhz Heydər Əliyev siyasi kursunun və məktəbinin layiqli davamçısı Prezident İlham Əliyevdir. Qeyd edilib ki, Azərbaycanı işıqlı sabaha, yeni uğurlara aparan namizədə - Prezident İlham Əliyevə səs verməsi hər bir azərbaycanlının öz gələcəyini firavan şəkildə təminat altına almasıdır.
Daha sonra çıxış edən seçicilər Süleyman Babayev, Rüstəm Sadıqzadə, gənclərin nümayəndəsi Elmar Məmmədov öz növbələrində dövlət başçısının xarici və daxili siyasətini dəstəklədiklərini bildiriblər və qeyd ediblər ki, bu seçkilərdə də öz səslərini Ulu öndər Heydər Əliyev siyasətinə və bu siyasəti uğurla həyata keçirən cənab İlham Əliyevə verəcəklər.
PƏRVİZ

Paylaş:

Baxılıb: 1383 dəfə