Şuşa Qlobal Media Forumu müasir media çağırışlarına cavab verən mühüm platformaya çevrilib

Bakı:

26 °C

65 %

9 m/s

Əlaqə

AZ RU EN

Ana səhifə / YAP xəbərləri / Şuşa Qlobal Media Forumu müasir media çağırışlarına cavab verən mühüm platformaya çevrilib

Şuşa Qlobal Media Forumu müasir media çağırışlarına cavab verən mühüm platformaya çevrilib

23.07.2025 [17:28]

2025-ci il iyulun 19-21-i tarixlərində Şuşa şəhərində “Rəqəmsal Yollar: Süni İntellekt Dövründə Məlumat və Media Dayanıqlığının Gücləndirilməsi” mövzusunda III Şuşa Qlobal Media Forumu keçirilib. Artıq üçüncü ildir ki, 52 ölkədən 140 qonağı, 30-a yaxın informasiya agentliyinin və 80 media qurumunun nümayəndələrinin iştirakı ilə Şuşa şəhərində Qlobal Media Forumu təşkil olunur. Bu forum beynəlxalq səviyyəli tədbir kimi formalaşmaqla, müasir medianın qlobal çağırışlarına cavab axtarılan, açıq müzakirələrin aparıldığı mühüm bir platformaya çevrilmişdir. Şuşa Qlobal Media Forumu təkcə Azərbaycanın deyil, bütövlükdə regionun media məkanında mühüm hadisəyə çevrilmişdir. 2023-cü ildən Azərbaycanın mədəniyyət paytaxtı Şuşada təşkil olunan bu forum, qısa müddət ərzində beynəlxalq jurnalistika və media siyasəti sahəsində nüfuzlu bir platforma statusu qazanmışdır.

Prezident İlham Əliyev forumun açılışında çıxış edərək, bu tədbirin artıq bir ənənəyə çevrildiyini və gələcəkdə də davam etdirilməsinin vacibliyini vurğuladı. Prezident çıxışında Azərbaycanın iqtisadi inkişafından, xarici borcun ÜDM-in 6.9%-nə endirilməsindən və yoxsulluğun 49%-dən 5%-ə qədər azaldılmasından bəhs etdi. Forumda süni intellektin media sahəsində yaratdığı imkanlar və risklər müzakirə olundu. Prezident Əliyev, saxta xəbərlərin yayılmasının cəmiyyətə və fərdlərə ciddi təhlükə yaratdığını qeyd edərək, bu məsələnin beynəlxalq səviyyədə tənzimlənməsinin vacibliyini vurğuladı.

III Şuşa Qlobal Media Forumu bir çox baxımdan böyük tarixi və siyasi əhəmiyyətə malikdir. Həmin Forum hər şeydən öncə dövlətimizin, onun başçısının timsalında ədalətin təntənəsi, haqqın yenilməzliyinin isbatıdır. Prezident İlham Əliyevin Forum çərçivəsində müxtəlif məsələlərlə bağlı jurnalistlərin suallarına verdiyi cavablar Azərbaycanın yalnız milli maraqlarının deyil, həm də beynəlxalq hüququn, əzilən, işğala məruz qalan bütün xalqların yanında yer aldığını, dövlətimizin hər zaman haqqa, ədalətə sadiqliyini qoruyub saxladığını bir daha sübut etdi. Təkcə bir faktı qeyd edək ki, dövlətimizin başçısı Ukrayna xalqına işğalla barışmamağı, öz azadlığı, haqqı uğrunda mübarizəni sona qədər davam etdirməyi tövsiyə etdi, fikirlərini əsaslandırmaq üçün Azərbaycan xalqının keçdiyi yolu, Vətən müharibəsini xatırlatdı. Dövlətimizin başçısı qeyd etdi ki, Azərbaycan 30 ilə yaxın müddətdə erməni işğalına məruz qalsa da, heç bir böyük dövlət, beynəlxalq təşkilat ona praktiki olaraq yardım etmədi. Lakin bütün bunlar Azərbaycanı ruhdan salmadı, əksinə, xalq öz mübarizəsini davam etdirdi. Nəticədə, erməni faşizmini darmadağın edərək ərazi bütövlüyünü təmin etdi. Bu baxımdan, Prezident İlham Əliyev Ukrayna xalqına da ruhdan düşməməyi və işğala qarşı mübarizəni davam etdirməyi tövsiyə etdi.

Forumda müzakirə olunan məsələlərdən biri də Zəngəzur dəhlizi ilə bağlıdır. Bu dəhliz yalnız Azərbaycanın əsas ərazisini Naxçıvanla birləşdirmək deyil, həm də Çindən Avropaya uzanan Orta Dəhlizin vacib halqasına çevrilmək potensialına malikdir. Lakin qonşu dövlətin həmin layihəyə açıq müqaviməti fonunda Prezident İlham Əliyev diqqətə çatdırıb ki, son beş ildə Ermənistan tərəfində heç bir iş aparılmayıb, bu məsələ qəsdən gündəmdən çıxarılıb. Azərbaycanın isə artıq multimilyardlıq nəqliyyat-logistika infrastrukturu hazırdır. Bakı-Tbilisi-Qars dəmir yolu, Xəzər Beynəlxalq Ticarət Limanı, sadələşdirilmiş gömrük inzibatçılığı və rəqəmsallaşdırılmış keçid prosedurları bu prosesin dayanıqlığını təmin edir.

Prezident İlham Əliyev Forumdakı çıxışında medianın önəminə diqqət çəkməklə yanaşı, Azərbaycan mediasının, jurnalistlərin əməyini də yüksək qiymətləndirdi. Dövlətimizin başçısı qeyd etdi ki, Azərbaycan həqiqətlərinin dünyada təbliğində, dezinformasiyaların qarşısının alınmasında Azərbaycan mediası yaxından iştirak edib və böyük uğurlar əldə edib. Mediamızın lazım gələndə həm də hücum strategiyası sərgilədiyini bildirərək bundan sonra da beynəlxalq ictimai rəyin düzgün informasiya ilə təminində jurnalistlərin üzərinə böyük öhdəliklər düşdüyünü vurğuladı.

Beləliklə, III Şuşa Qlobal Media Forumu sadəcə media hadisəsi deyil, həm də Azərbaycanın qlobal informasiya gündəmində daha fəal iştirakına, Qarabağın dirçəlişini dünyaya göstərməyə, jurnalistlər üçün yeni əməkdaşlıq və tərəfdaşlıq imkanları yaratmağa yönələn tarixi hadisədir.

Rövlan Heydərov,

YAP Naftalan şəhər təşkilatının sədri

Paylaş:

Baxılıb: 408 dəfə