“8 Noyabr” elektrik stansiyasının açılışı enerji siyasətinin yeni mərhələsidir

Bakı:

25 °C

61 %

13 m/s

Əlaqə

AZ RU EN

Ana səhifə / YAP xəbərləri / “8 Noyabr” elektrik stansiyasının açılışı enerji siyasətinin yeni mərhələsidir

“8 Noyabr” elektrik stansiyasının açılışı enerji siyasətinin yeni mərhələsidir

30.06.2025 [19:46]

Azərbaycanın müasir enerji siyasəti son illər ölkəmizin iqtisadi dayanıqlığını təmin etməklə yanaşı, onu beynəlxalq enerji bazarlarında etibarlı və güclü tərəfdaş kimi tanıtdırıb. Mingəçevirdə istifadəyə verilən "8 Noyabr" Elektrik Stansiyası isə bu siyasətin təntənəli təcəssümüdür. Cənab Prezident İlham Əliyevin vurğuladığı kimi, "Bu stansiya Azərbaycanın enerji potensialını əhəmiyyətli dərəcədə artırır, enerji sistemimizin səmərəliliyini yüksəldir və Mingəçevirin Cənubi Qafqazdakı energetika mərkəzi mövqeyini daha da möhkəmləndirir." Azərbaycanın enerji strategiyası təkcə daxili tələbatı qarşılamır. Bu strategiya qlobal enerji təhlükəsizliyinə real töhfələr verir, yeni beynəlxalq əməkdaşlıqlara yol açır və yaşıl enerji bazarında Azərbaycanı qabaqcıl mövqelərə çıxarır. Hazırda ölkəmiz Avropanın enerji təhlükəsizliyində əsas təminatçılardan biri kimi tanınır. Cənab Prezident İlham Əliyevin qeyd etdiyi kimi, "Bu gün Azərbaycan qazı 12 ölkəyə, o cümlədən 10 Avropa ölkəsinə ixrac olunur." Avropa İttifaqı isə Azərbaycanı "etibarlı tərəfdaş və Pan-Avropa qaz təchizatçısı" adlandırır. "8 Noyabr" Elektrik Stansiyasının rekord müddətdə - cəmi iki il ərzində inşa edilməsi ölkəmizin enerji sektorunda idarəetmə çevikliyini, yerli mütəxəssislərin yüksək peşəkarlığını və beynəlxalq əməkdaşlığın səmərəsini bir daha nümayiş etdirdi. Cənab Prezident İlham Əliyev xüsusi olaraq bildirib: "Həm İtaliya, həm Çin Azərbaycanın strateji tərəfdaşlarıdır. Bu stansiyanın inşasında bu ölkələrin şirkətlərinin mühüm payı var." Azərbaycanın gələcəyə baxan enerji siyasətində yaşıl enerji xüsusi yer tutur. Dövlətimizin başçısı bu istiqamətdə qarşıya böyük hədəflər qoyub: "2030-cu ilə qədər Azərbaycanda bərpaolunan enerji gücü 6500 meqavata çatdırılacaq." Çin şirkətləri bu prosesdə əsas tərəfdaş kimi çıxış edir və Azərbaycanda yeni Günəş elektrik stansiyalarının təchizatını təmin edirlər. Enerji siyasəti iqtisadi amil olmaqla yanaşı, milli təhlükəsizlik məsələsidir. İkinci Qarabağ müharibəsi zamanı Ermənistanın Mingəçevir su anbarı və elektrik stansiyasına qarşı raket hücumları bu obyektlərin ölkəmiz üçün nə qədər həyati əhəmiyyət kəsb etdiyini bir daha göstərdi. Prezident İlham Əliyev bu hadisələri belə xatırladır: "Ermənistan bizi hədələmək üçün Mingəçevir su anbarını və elektrik stansiyasını bombalamaq təhdidini açıq şəkildə səsləndirirdi. Bu, mülki infrastruktura qarşı törədilən hərbi cinayət idi." Azərbaycanın beynəlxalq enerji siyasətində qazandığı uğurların əsasında düşünülmüş, balanslaşdırılmış və çoxtərəfli diplomatiya dayanır. İtaliya ilə neft və qaz sahəsində dərin iqtisadi tərəfdaşlıq qurulub, Çinlə isə yaşıl enerji layihələri uğurla icra edilir. Ölkəmiz bu gün TAP və TANAP layihələri vasitəsilə Avropaya etibarlı enerji mənbəyi kimi xidmət edir. Eyni zamanda, Avropa İttifaqı ilə 2022-ci ildə imzalanmış enerji əməkdaşlığı memorandumu bu əlaqələrin perspektivini daha da möhkəmləndirib. Mingəçevirdə istifadəyə verilən "8 Noyabr" Elektrik Stansiyası Azərbaycanın daxili enerji dayanıqlığını artırmaqla yanaşı, ölkəmizin qlobal enerji bazarındakı rolunu daha da gücləndirir. Bu layihə Azərbaycanın iqtisadi müstəqilliyinin, siyasi sabitliyinin və regional liderliyinin mühüm dayağına çevrilib. Cənab Prezident İlham Əliyevin dediyi kimi: "Zəfər xalqımıza, dövlətimizə yaraşır." Bu stansiyanın adı da təsadüfi seçilməyib. 8 Noyabr Azərbaycanın şanlı Zəfər günüdür və bu stansiya da ölkəmizin gücünü, əzmini və qələbəyə aparan yolunu əbədiləşdirən rəmzlərdən biridir. Dövlətimizin başçısı çıxışında onu da bildirib ki, “8 Noyabr” Stansiyasının istismara verilməsi bir çox məqsədləri təmin edəcək. Qeyd etdiyim kimi, enerji sistemimizin səmərəliliyi artırılacaq, potensial, generasiya gücümüz artacaq, eyni zamanda, şərti yanacaq sərfiyyatı kəskin aşağı düşəcək və beləliklə, bu, bizə təbii qaza qənaət etmək üçün imkan yaradacaq. Çünki hər kəs yaxşı bilir ki, Azərbaycan qazına bu gün dünya bazarlarında böyük tələbat var və nə qədər biz daxildə təbii qaza qənaət etsək, ixrac imkanlarımız da bir o qədər artacaq. Beləliklə, burada şərti yanacağın sərfiyyatının az olması bizə əlavə qazanc gətirəcək. Təbii olaraq, biz təbii qazın qənaətini, eyni zamanda, bərpaolunan layihələrdə görürük və görəcəyik. Azərbaycan bu istiqamətdə də qabaqcıl ölkələr sırasındadır. İmzalanmış, icra edilən və icra ediləcək bərpaolunan enerji layihələri 2030-cu ilə qədər bizə 6500 meqavat yaşıl enerji verəcəkdir və əgər bu gün bizim ümumi generasiya gücümüz 9000 meqavatdırsa, bu, nə deməkdir, bunu hər kəs başa düşə bilər. Eyni zamanda, bizə təbii qaza qənaət etmək üçün imkanlar yaradılacaq və belə olan halda təbii qazımızın ixracı daha da artacaq. Yəni, bir neçə məqsəd burada təmin edilir və əlbəttə ki, bütün bu işlərin təməlində bizim düşünülmüş siyasət dayanır. Çünki biz hər istiqamət üzrə düşünülmüş siyasət və proqramlar əsasında çalışırıq.

David İbramxəlilov,
YAP Qusar rayon təşkilatının sədri

Paylaş:

Baxılıb: 420 dəfə