“Muzeylərimiz, tarixi abidələrimiz – milli sərvətimizdir” mövzusunda tədbir keçirilib

Bakı:

25 °C

73 %

4 m/s

Əlaqə

AZ RU EN

Ana səhifə / YAP xəbərləri / “Muzeylərimiz, tarixi abidələrimiz – milli sərvətimizdir” mövzusunda tədbir keçirilib

“Muzeylərimiz, tarixi abidələrimiz – milli sərvətimizdir” mövzusunda tədbir keçirilib

17.05.2025 [12:37]

Yeni Azərbaycan Partiyası Laçın rayon təşkilatı “Konstitusiya və Suverenlik İli” çərçivəsində “Muzeylərimiz, tarixi abidələrimiz – milli sərvətimizdir” mövzusunda tədbir keçirib.

Tədbiri giriş sözü ilə açan Yeni Azərbaycan Partiyası Laçın rayon təşkilatının sədri İlqar İlyasov qeyd edib ki, muzeylər zamanın müəyyən məqamlarını özündə yaşadan, müxtəlif dövrlərin hadisələri barədə məlumat verən eksponatları toplayan, qoruyan, öyrənən və nümayiş etdirən maddi-mənəvi irs xəzinəsidir.

Onun sözlərinə görə, muzeylər eyni zamanda tarixin canlı şahidi, keçmişimizi və bu günümüzü gələcək nəsillərə çatdıran ən dəyərli vasitədir. Muzeylərin əsas vəzifəsi yalnız eksponatların qorunması və öyrənilməsi ilə məhdudlaşmır, həm də bu irsin təbliğini əhatə edir.

İlqar İlyasov diqqətə çatdırıb ki, Azərbaycanda milli-mənəvi dəyərlərimizə, o cümlədən muzey işinə hər zaman dövlət səviyyəsində yüksək diqqət və qayğı göstərilib. Bu sahənin inkişafı, muzeylər şəbəkəsinin formalaşması bilavasitə Ulu Öndər Heydər Əliyevin adı ilə bağlıdır. Prezident İlham Əliyevin 2007-ci il 6 mart tarixli “Azərbaycanda muzey işinin yaxşılaşdırılması haqqında” Sərəncamı və 2009-cu il 22 may tarixli sərəncamla təsdiq edilmiş “Azərbaycanın regionlarında fəaliyyət göstərən muzeylərin müasir standartlara uyğun təmirinə, yeni avadanlıq və zəruri eksponatlarla təchizatına dair xüsusi tədbirlər planı” bu istiqamətdə hüquqi və institusional bazanın formalaşdırılmasına xidmət edir.

Tədbirdə Ermənistanın Azərbaycan torpaqlarına təcavüzü nəticəsində mədəniyyət obyektlərinə, muzeylərimizə dəyən ziyan da xüsusi vurğulanıb. Bildirilib ki, işğal dövründə bir çox muzeylər dağıdılıb, eksponatları Ermənistan muzeylərinə daşınaraq saxtakarlıqla “erməni mədəniyyəti” nümunələri kimi təqdim edilib.

44 günlük Vətən müharibəsindən sonra Azərbaycan dövləti dərhal Böyük Qayıdış Proqramını həyata keçirməyə başlayıb. Azad olunmuş ərazilərdə yollar çəkilir, məktəblər, xəstəxanalar tikilir, infrastruktur bərpa olunur. Bununla yanaşı, dini və tarixi abidələrin, muzeylərin yenidən bərpası və qorunması istiqamətində də ciddi addımlar atılır. Artıq minlərlə keçmiş məcburi köçkün doğma yurdlarına ləyaqətlə qayıdır.

Laçın rayon Tarix-Diyarşünaslıq Muzeyinin direktoru Türkanə Nuruyeva və Laçın Dövlət Rəsm Qalereyasının direktoru Xaliq Dünyamalıyev çıxışlarında qeyd ediblər ki, ölkə rəhbərliyinin diqqət və qayğısı sayəsində muzeylərin qorunması və milli irsimizin təbliği istiqamətində məqsədyönlü siyasət həyata keçirilir. Bu gün Azərbaycan muzeyləri milli dəyərlərimizin mühafizəsinə və azərbaycançılıq məfkurəsinin təbliğinə xidmət edən mühüm ideoloji məkanlara çevrilib.

Vurğulanıb ki, Prezident İlham Əliyevin və Birinci vitse-prezident Mehriban xanım Əliyevanın davamlı diqqət və qayğısı nəticəsində son 20 ildə ölkəmizdə yeni muzeylərin yaradılması mədəni quruculuğun inkişafına əhəmiyyətli töhfə verib.

Paylaş:

Baxılıb: 578 dəfə