İkitərəfli əlaqələrin geniş gündəliyi

Bakı:

22 °C

83 %

6 m/s

Əlaqə

AZ RU EN

Ana səhifə / YAP xəbərləri / İkitərəfli əlaqələrin geniş gündəliyi

İkitərəfli əlaqələrin geniş gündəliyi

30.04.2025 [18:34]

Əlişah Rəcəbov,

YAP Ağdaş rayon təşkilatının sədri

Prezident İlham Əliyevin Çin Xalq Respublikasına dövlət səfəri zamanı bir çox sahəni əhatə edən 20-dən artıq sənəd imzalandı. Bu sənədlərdən Hərtərəfli Strateji Tərəfdaşlıq Əlaqələrinin Qurulması Haqqında Birgə Bəyanatı xüsusilə vurğulamaq lazımdır. Məhz bu Birgə Bəyanat Azərbaycan-Çin münasibətlərini daha yüksək səviyyəyə qaldıracaq. Hərtərəfli Strateji Tərəfdaşlıq Əlaqələrinin Qurulması Haqqında Birgə Bəyanatda ikitərəfli əlaqələrin geniş gündəliyi öz əksini tapır.

Pekində Çinin CGTN (China Global Television Network) telekanalına müsahibəsində Prezident İlham Əliyev Birgə Bəyanatın imzalanmasını iki ölkə arasında mövcud olan həmrəylik və dostluq əlaqələrinin nəticəsi kimi qiymətləndirdi. Ölkə başçısı bildirdi ki, Azərbaycan və Çin bir-birinin suverenliyini və ərazi bütövlüyünü qətiyyətlə dəstəkləyir. Azərbaycan “Vahid Çin” siyasətini qətiyyətlə dəstəkləyir. Belə ki, Azərbaycan Tayvanda qeyri-qanuni seçkiləri ictimaiyyət qarşısında açıq şəkildə pisləyən ilk ölkələr sırasında olub.

Prezident İlham Əliyev müsahibəsində vurğuladı ki, Çinin nümunəsi, modernləşməsi və apardığı islahatlar bir çox ölkələri ilhamlandırır. Bu, ölkələrin həmin təcrübədən necə istifadə etməsindən, müxtəlif ölkə liderlərinin digər ölkələrin müsbət təcrübələrindən necə öyrənməsindən asılıdır. Çinin keçdiyi tərəqqi yolu Azərbaycan üçün ilham mənbəyi olmuşdur. Bu gün Azərbaycanda güclü iqtisadiyyat qurulub. Ölkəmizin xarici borcu ÜDM-in 7 faizindən azdır. Azərbaycanın mübadilə olunan valyuta ehtiyatları xarici borcundan 14 dəfə çoxdur. İşsizlik, yoxsulluq səviyyəsi 5 faizə endirilib, ölkə iqtisadiyyatı şaxələndirilib. Yaşıl gündəlik ölkəmiz üçün əsas prioritetlərdəndir. Çin burada çox mühüm rol oynayır. Çünki Azərbaycanda quraşdırılmış Günəş panelləri Çində istehsal olunub.

Çinin CGTN (China Global Television Network) telekanalına müsahibəsində Prezident İlham Əliyev onu da bildirdi ki, bu vaxtadək Çin şirkətləri investorlarla, Azərbaycanın yaşıl enerjisinə sərmayə yatıran şirkətlərlə podratçı qismində çalışırdılar. İmzalanan və icra fazasında olan müqavilələr ölkəmizə 2030-cu ilə qədər 6500 meqavat bərpaolunan enerji verəcək. Azərbaycanın ümumi quraşdırılmış gücü 8 min meqavat təşkil edir. Beş ildən sonra elektrik enerjisinin bugünkü tutumu iki dəfə artmış olacaq - 6 min meqavat Günəş və külək elektrik enerjisindən əldə olunacaq, 500 meqavat hidroelektrik stansiyalarından gələcək. Nəticədə ölkəmiz elektrik enerjisini istehsal etmək üçün əsasən təbii qazdan istifadə etməyi dayandıracaq. Azərbaycanda elektrik enerjisi bərpaolunan enerji resurslarından əldə ediləcək və təbii qaz beynəlxalq bazarlara ixrac ediləcək.

Çinin CGTN (China Global Television Network) telekanalına müsahibəsində Azərbaycanın yaşıl gündəliyi haqqında danışarkən Prezident İlham Əliyev onu da qeyd etdi ki, dövlətimizin planı Bakının ictimai nəqliyyat sistemini, sonra isə ölkənin bütün digər şəhərlərini tamamilə yaşıl nəqliyyata çevirməkdir.

Paylaş:

Baxılıb: 655 dəfə