Azərbaycan-Gürcüstan dostluğu tarixin sınaqlarından çıxıb

Bakı:

22 °C

94 %

5 m/s

Əlaqə

AZ RU EN

Ana səhifə / YAP xəbərləri / Azərbaycan-Gürcüstan dostluğu tarixin sınaqlarından çıxıb

Azərbaycan-Gürcüstan dostluğu tarixin sınaqlarından çıxıb

19.04.2025 [15:58]

Qafar Əliyev,

YAP Qaradağ rayon təşkilatının sədri, Siyasi elmlər üzrə fəlsəfə doktoru

Gürcüstanın dövlət başçısının- Gürcüstan Prezidenti Mixeil Kavelaşvilinin Azərbaycana 2025-ci il aprelin 16-da baş tutan ilk səfəri Azərbaycan və Gürcüstan dostluq münasibətlərini daha da inkişaf etdirərək strateji tərəfdaşlıq səviyyəsinə qaldırmağı bacaran qardaş ölkələr olduğunu bir daha sübut etdi. Müstəqilliyin bərpasından sonra Ümummilider lider Heydər Əliyevin uzaqgörən siyasəti sayəsində tamamilə yeni mərhələyə qədəm qoyan Azərbaycan-Gürcüstan münasibətləri Prezident İlham Əliyevin ölkəmizə rəhbərliyi dövründə daha irəliyə aparılaraq yüksək tərəfdaşlıq səviyyəsinədək yüksəldilib.

Təsadüfi deyil ki, son illər iki ölkə arasında yüksək səviyyəli səfərlər, eləcə də hökumət başçıları, parlament sədrləri, xarici işlər nazirləri səviyyəsində səfərlər münasibətlərimizin daha da möhkəmlənməsinə, qarşılıqlı etimad və inamın artmasına mühüm təsir göstərib. Bu səfərlər və görüşlər, aparılan faydalı müzakirələr dialoq mühitini möhkəmləndirərək region üçün nümunəvi platformaya çevrilib.

Artıq uzun müddətdir ki, Azərbaycan-Gürcüstan əlaqələri həm ikitərəfli, həm də çoxtərəfli, beynəlxalq formatlarda uğurla inkişaf edir. Prezident İlham Əliyevin Gürcüstanın dövlət başçısının Azərbaycana aprelin 16-da baş tutan səfəri zamanı mətbuata bəyan etdiyi kimi, iki dost və qardaş ölkə kimi bir-birinə çox bağlıdır və beynəlxalq təşkilatlarda da daim bir-birini dəstəkləyir.

Eyni zamanda, dövlət başçısı postuna seçilməsindən sonra ilk rəsmi səfərini Azərbaycana həyata keçirən Gürcüstan Prezidenti Mixeil Kavelaşvilinin bu addımı çox mühüm siyasi məna kəsb edir və dövlətimizə, Prezident İlham Əliyevə olan böyük ehtiramı əks etdirir. Prezident İlham Əliyevin də vurğuladığı kimi bu, bir daha Gürcüstan-Azərbaycan əlaqələrinin mahiyyətini, xalqlarımızın dostluğunu, qardaşlığını göstərir.

Qeyd edək ki, dost və qonşu ölkə olaraq Gürcüstan daim Azərbaycanın ərazi bütövlüyünü dəstəkləyərək keçmiş Qarabağ münaqişəsinin həllində Azərbaycanın haqlı mövqeyinin müdafiəsində sabit mövqe nümayiş etdirib. Həmçinin beynəlxalq təşkilatlarda öz qətiyyətli iradəsini ifadə etdirərək, 44 günlük Vətən müharibəsində Azərbaycanın haqq səsini dəstəkləyib. Eyni zamanda, Azərbaycan da Gürcüstanın suverenliyini və ərazi bütövlüyünü həmişə dəstəkləyib.

Bu gün Azərbaycan-Gürcüstan əlaqələrində fəal işbirliyi demək olar ki, bütün sahələri əhatə edir. İki ölkə arasında ali səviyyədə mövcud olan fəal siyasi dialoq həm təhlükəsizlik və müdafiə, həm iqtisadi, həm enerji, həm nəqliyyat- ogistika, həm də mədəni-humanitar və turizm sahələrində ciddi uğurlara əsas yaradıb.

Məlumdur ki, bu iki dost ölkə strateji əhəmiyyətli regionda yerləşməklə, qlobal əhəmiyyətli enerji, nəqliyyat, kommunikasiya layihələrində birgə iştirak etməklə bölgədə sabitliyin təmin olunmasına töhfə verməkdədir. Azərbaycan Prezidentinin xatırlatdığı kimi, böyük əhəmiyyət daşıyan bu layihələr Cənubi Qafqazın, Avrasiya regionunun nəqliyyat və enerji xəritəsini yenidən tərtib edir: “Əgər biz bu gün Avropanın enerji təhlükəsizliyi haqqında danışırıqsa, bunu Azərbaycansız, Gürcüstansız təsəvvür etmək mümkün deyil”.

Hazırda iki ölkənin birlikdə müəllifi olduğu böyük nəqliyyat-kommunikasiya layihələri böyük sinergiya konsepsiyası kimi çıxış edərək Cənubi Qafqazı Orta Dəhlizin ayrılmaz hissəsinə çevirir. Azərbaycan Prezidenti İlham Əliyevin vurğuladığı kimi sülhün, əmin-amanlığın bərqərar etdirilməsinə öz töhfəsini verən Gürcüstan və Azərbaycanın liderliyi ilə ümid etmək olar ki, Cənubi Qafqazın qara səhifələri bundan sonra bağlanacaq və tarixdə qalacaq.

Qətiyyətlə demək olar ki, qardaş ölkələrimiz əməkdaşlığın formatını daha da genişləndirmək, yeni istiqamətlər üzrə möhkəm əlaqələr qurmaq üçün sarsılmaz iradə nümayiş etdirir. İndiyə qədər iki ölkə arasında imzalanmış çoxsaylı sənəd geniş əməkdaşlıq üçün möhkəm hüquq baza yaradıb və yeni layihələrin həyata keçirilməsinə yol açıb.

Bu baxımdan Gürcüstan Prezidenti Mixeil Kavelaşvilinin qeyd etdiyi bu fikir tamamilə yerinə düşür: "Düzgün və ardıcıl siyasətlə biz regionun potensialından tam istifadə etməli, dünyanın geosiyasi xəritəsində güclü, etibarlı, birləşdirici körpü funksiyasını yerinə yetirməliyik. Əminəm ki, ölkələrimizin və xalqlarımızın mənafeyi naminə bir-birimizin maraqlarını nəzərə alaraq əlaqələrimiz daha da sürətlə inkişaf edəcək".

Beləliklə, Gürcüstan Prezidenti Mixeil Kavelaşvilinin Azərbaycana ilk səfərini ikitərəfli münasibətlərin inkişaf etdirilməsi istiqamətində növbəti uğurlu addım və yeni layihələrin icrasına möhkəm təməl kimi xarakterizə oluna bilər.

Paylaş:

Baxılıb: 635 dəfə

Xəbər lenti

Hamısına bax