Ermənistanın Azərbaycana qarşı siyasəti və beynəlxalq reaksiyalar

Bakı:

10 °C

53 %

3 m/s

Əlaqə

AZ RU EN

Ana səhifə / YAP xəbərləri / Ermənistanın Azərbaycana qarşı siyasəti və beynəlxalq reaksiyalar

Ermənistanın Azərbaycana qarşı siyasəti və beynəlxalq reaksiyalar

14.03.2025 [17:22]

Rüstəm Nağıyev,

YAP Gədəbəy rayon təşkilatının sədri

Ermənistanın Azərbaycana qarşı apardığı işğalçı siyasət, təkcə regional deyil, həm də beynəlxalq səviyyədə geniş reaksiyalar doğurub. 1990-cı illərdən bəri davam edən münaqişə, beynəlxalq hüququn pozulmasına və minlərlə insanın həyatını itirməsinə səbəb olub. Prezident İlham Əliyev, Azərbaycanın haqq mübarizəsini və ərazilərini işğaldan azad etmək üçün apardığı siyasəti beynəlxalq aləmə bir daha təqdim edir. Ermənistanın işğalçı siyasəti təbii ki, beynəlxalq hüquqa ziddir. Ermənistanın işğalçı siyasəti, Azərbaycanın beynəlxalq səviyyədə hüquqi mübarizəsini şərtləndirdi. 1993-cü ildə BMT Təhlükəsizlik Şurası tərəfindən qəbul edilən qətnamələr, Ermənistana işğal etdiyi əraziləri tərk etməsini tələb etdi, lakin bu qətnamələr icra olunmadı. Prezident Əliyev, bu məsələnin beynəlxalq hüquqa əsaslanan həllini təklif edir və Ermənistanın bu pozuntulara görə məsuliyyət daşımalı olduğunu vurğulayır. Bu fikirlər daha geniş formada martın 13-də Bakıda, “Gülüstan” sarayında Azərbaycan Respublikasının Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə “Dünya düzəninin yenidən düşünülməsi: Çağırışların fürsətə çevrilməsi” mövzusunda XII Qlobal Bakı Forumda ölkə başçısını çıxışında əksini tapıb. “Bizə lazımdır ki, onların Konstitusiyasında Azərbaycana qarşı ərazi iddiaları olmasın. Orada Azərbaycana qarşı ərazi iddiaları hələ də qalır. Bizə lazımdır ki, ATƏT-in Minsk qrupu buraxılsın. Biz bu mesajı Ermənistana çatdırırıq və deyirik ki, Minsk qrupunun saxlanılmasında məntiq yoxdur. O, Qarabağ məsələsinin həlli üçün yaradılmışdı. İndi Qarabağ məsələsi həll olunub. Ermənistan Qarabağı Azərbaycanın ərazisi kimi tanıyır. ATƏT-in həmin qrupunun buraxılması üçün ümumi müraciətdə siz bizə niyə qoşulmursunuz? Onlar istəmirlər. Belə çıxır ki, onlar bir ayağını ərazimizdə yer saxlamaq üçün edir. Əlbəttə ki, virtual olaraq. Onların silahlanması – bu, nəyi göstərir? Bu göstərir ki, onlar yeni müharibəyə hazırlaşırlar. Kim onları yenidən müharibəyə sürükləyir? Fransa və onun Prezidenti. Onların Ermənistanı təchiz etdiyi məhvedici silahlar bizə qarşı yönəlir. Bu gün başqa yerdə lazım ola biləcək “Sezar” haubitsaları Ermənistana göndərilir. Əslində, Avropa İttifaqının kəşfiyyat missiyası olan dırnaqarası Avropa monitorinq missiyası gecə-gündüz casus kimi sərhədlərimizdə dayanır və baxırlar ki, bəlkə haradan, bir yerdən girə bilsinlər. Bizim də həmin dırnaqarası monitorinq missiyası barədə kifayət qədər kəşfiyyat məlumatımız var. Avropanın Sülh Fondu milyonlarla dolları Ermənistanı silahlandırmaq üçün ona verir. Bəli, onlar deyir ki, bu pul qeyri-məhvedici hərbi qurğular üçündür”. Cənab Prezident çıxışında məsələni daha aydın şərh edərək onu da deyib ki, “Birincisi, bunu kim yoxlaya bilər? İkincisi, siz onlara 10 milyon verirsiniz və sonra isə digər 10 milyon planlaşdırılır. Beləliklə, Ermənistana silah almaq üçün pula qənaət imkanı yaranır. Nəinki Fransa onlara məhvedici silahlar göndərir. Onda onlar bunu niyə edir? Onlar nəyə hazırlaşır? Əgər sülh istəyirlərsə, buna ehtiyac yoxdur. Dəfələrlə biz bu məsələni erməni nümayəndələrinin və onların Brüsseldəki yeni ağalarının qarşısında qaldırmışıq. Çünki onlar indi böyük qardaşını dəyişiblər. Bu gün bu, Brüsseldir. Prezident Trampın qələbəsinə qədər bu, Dövlət Departamenti, USAID idi. Məhz indi ciddi problemlərlə üzləşən Menendes kimi rüşvətxor Amerika siyasətçiləri idi. Menendes siyahıda hələ sonuncu deyil. Necə deyərlər, bir qaranquşla bahar olmur. Xeyli digərləri var ki, erməni pulunu ciblərinə qoyurlar. Mən onların adını çəkə bilərəm, adları məlumdur: cənab Adam Şif, cənab Frenk Pallone, xanım Nensi Pelosi və bir çox digərləri var. Onlar onilliklər ərzində Azərbaycana hücum çəkmək və onu gözdən salmaq üçün Birləşmiş Ştatlarda erməni diaspor təşkilatlarından pullar alıblar. Beləliklə, biz Prezident Trampa bataqlığın qurudulmasında uğurlar arzu edirik. Bu, asan deyil. Lakin edilməlidir. Həmçinin, biz USAID-in Azərbaycanda qeyri-qanuni fəaliyyəti ilə bağlı Amerikanın orqanları ilə məlumat mübadiləsinə hazırıq. Onlar insanlara necə rüşvət verirdilər?! Onlar qeyri-qanuni maliyyə kanallarından necə istifadə edirdilər?! Onlar Azərbaycanın qanunlarını və normalarını necə pozurdular?! İndi məsuliyyətli olmaq vaxtı yetişib. Biz əlimizdə olan bütün informasiyanı təqdim etməyə hazırıq”. Ermənistanın işğalçı siyasətinə qarşı beynəlxalq reaksiya, xüsusilə Avropa və ABŞ tərəfindən bəzən zəif olmuşdur. Lakin, 2020-ci il müharibəsi və onun nəticəsi, Azərbaycanın hüququ və haqq mübarizəsi qarşısında beynəlxalq aləmdə daha çox dəstək tapmağa başladı. Sonrakı illərdə, Azərbaycanın ərazilərini işğaldan azad etməsi, dünya ictimaiyyəti tərəfindən daha çox dəstəklənməyə başlandı. Azərbaycanın qələbəsi regional sabitliyi də təmin etdi. 2020-ci ildəki müharibədə əldə etdiyimiz qələbə, həm də beynəlxalq diplomatiya sahəsində bir zəfərdir. Ermənistanın işğalçı siyasətinə qarşı Azərbaycan, həm hüquqi, həm də hərbi baxımdan öz haqlı mövqeyini bütün dünyaya nümayiş etdirdi. Bu, yalnız regionda deyil, həm də beynəlxalq aləmdə Azərbaycanın nüfuzunu artırdı.

Paylaş:

Baxılıb: 233 dəfə