Tərəfdaşlıq daha da gücləndiriləcək

Bakı:

28 °C

45 %

2 m/s

Əlaqə

AZ RU EN

Ana səhifə / YAP xəbərləri / Tərəfdaşlıq daha da gücləndiriləcək

Tərəfdaşlıq daha da gücləndiriləcək

27.02.2025 [13:38]

Natiq Quluzadə,

YAP Zəngilan rayon təşkilatının sədri

Məlumdur ki, Pakistan Azərbaycanın müstəqilliyini tanıyan ilk dövlətlərdən biridir. Ölkələrimiz və xalqlarımız arasında artıq uzun müddətdir ki, dərin tarixi, mədəni və dini köklər əsasında qurulmuş möhkəm dostluq əlaqələri, çoxşaxəli münasibətlər mövcuddur. Ölkələrimiz arasında münasibətləri formalaşdıran çox vacib məqamlardan biri budur ki, Pakistan istər işğal dövründə, istərsə də Azərbaycanın 2020-ci ildə apardığı Vətən müharibəsi zamanı hər zaman ölkəmizə güclü siyasi dəstək göstərib. Həmçinin Pakistan Azərbaycana dəstək vermək və həmrəylik nümayiş etdirməklə bu günə kimi Ermənistanla diplomatik əlaqələr qurmayıb, onu bir dövlət kimi tanımayıb. Bu gün Azərbaycan ilə Pakistan arasında əməkdaşlıq siyasi, iqtisadi, təhlükəsizlik, mədəniyyət, müdafiə və digər sahələrdə uğurla davam etdirilir və hər iki ölkə bir-birinə sıx dostluq əlaqələri ilə bağlıdır. Fevral ayının 24-də Pakistan İslam Respublikasının Baş naziri Məhəmməd Şahbaz Şərifin Azərbaycana etdiyi rəsmi səfəri isə bu əlaqələrin daha da dərinləşməsinə və möhkəmlənməsinə yeni təkan verəcək.

Səfər çərçivəsində Azərbaycan və Pakistan rəhbərlərinin keçirdikləri həm təkbətək, həm də geniş tərkibli görüşlər zamanı ikitərəfli münasibətlərin gündəliyi o cümlədən ticarət və iqtisadi əməkdaşlıq, enerji, daşımalar, müdafiə sənayesinə aid mühüm məsələlər ətraflı müzakirə olunub. Ölkə Prezidenti cənab İlham Əliyev bu səfərin nəticələri ilə bağlı mətbuata bəyanatla etdiyi çıxışında bir daha xüsusi olaraq vurğuladı ki, imzalanmış sənədlər və əldə olunmuş razılaşmalar ölkələrimiz arasında tərəfdaşlığı daha da gücləndirəcək. Həmçinin qeyd olunub ki, görüşlərin gedişində regional təhlükəsizlik məsələləri də ətraflı təhlil olunub. Bu gün bütün dünyada məhz güc amili getdikcə daha qabarıq formada ön plana çıxmaqdadır. Məhz bu səbəbdən də Azərbaycan və Pakistan rəhbərləri arasında aparılan müzakirələrdə müdafiə sənayesi sahəsində əməkdaşlıq xüsusi yer alıb.

Öz bəyanatında cənab Prezident İlham Əliyev həmçinin bildirdi ki, Azərbaycan ilə Pakistan arasında ticarət və sərmayə sahəsi, enerji sahəsi və müdafiə sənayesi sahəsində əməkdaşlığın genişləndirilməsi ölkələrimiz və xalqlarımız üçün mühüm olduğu qədər də regional sabitliyin təminatı baxımından böyük strateji əhəmiyyət kəsb edir. Buna görə də qərara alınıb ki, iki ölkə arasında ticarət həcminin artırılması üçün daha ciddi səylər göstərilsin. Əlbəttə ki, əməkdaşlığın xüsusilə enerji sahəsində böyük perspektivləri vardır. Həm də bu perspektivlər istər ənənəvi enerji, istərsə də bərpaolunan enerji sahəsində kifayət qədər cəlbedicidir. Eyni zamanda da Azərbaycan və Pakistan şəhərləri arasında, xüsusilə də paytaxtlar arasında uçuşların sayının artırılması barədə əldə olunmuş razılıq xalqlarımızın daha da yaxınlaşmasına mühüm töhfə olacaq.

Paylaş:

Baxılıb: 333 dəfə