Atılan real addımlar

Bakı:

24 °C

83 %

0 m/s

Əlaqə

AZ RU EN

Ana səhifə / YAP xəbərləri / Atılan real addımlar

Atılan real addımlar

14.02.2025 [17:28]

Anar Nəbiyev,

YAP Qazax rayon təşkilatının sədri

Bu ilin 20-24 yanvar tarixlərində Davos şəhərində keçirilən Dünya İqtisadi Forumunun 55-ci toplantısı bu gün də mühüm məqamları ilə ölkə və dünya mətbuatında müzakirə olunmaqdadır. Həmin toplantı Azərbaycanın hazırda dünya birliyində yeri və rolunu təqdim etdi. Belə ki, toplantı çərçivəsində cənab İlham Əliyevin qarşı tərəflərin təşəbbüsü ilə çoxsaylı görüşlər keçirməsi, həmçinin Çinin CGTN (China Global Television Network) telekanalına müsahibəsi diqqətdən kənarda qalmadı. Dövlətimizin başçısı həmin müsahibəsində Azərbaycanın iqtisadi və siyasi mövqeyinin möhkəmləndirilməsi istiqamətində atdığı addımlardan, Ümumdünya Ticarət Təşkilatına üzv daxil olmaq üçün aparılan danışıqlardan, hər bir ölkənin inkişafında möhkəm təməlin rolundan, ölkəmizin ikitərəfli əməkdaşlıqda Cin ilə əlaqələrə böyük önəm verməsindən, Azərbaycan-Şanxay Əməkdaşlıq Təşkilatı əlaqələrindən və sair kimi məsələlərdən geniş bəhs etdi. “Azərbaycan hələ də Ümumdünya Ticarət Təşkilatının üzvü deyil, baxmayaraq, uzun illərdir, bir neçə onilliklərdir ki, danışıqların aktiv mərhələsindədir” bildirən Prezident İlham Əliyev onu da əlavə etdi ki, bu prosesin məntiqi yekunlaşmamasının səbəbi sırf proteksionizm, ikili standartlar, tariflərdir. Bütün bunlar Ümumdünya Ticarət Təşkilatının təməl dəyərlərinə ziddir. Bu ölkələr öz bazarlarını qorumaq üçün tarifləri tətbiq edir, proteksionizm üsullarından istifadə edirlər və bu da Ümumdünya Ticarət Təşkilatının prinsiplərinə tamamilə ziddir: “Buna görə də danışıqlar prosesindəyik. Lakin, eyni zamanda, üstünlükləri və zəif tərəfləri ciddi qiymətləndiririk. Narahat edən məqamlardan biri indi müzakirə etdiyimiz mövzudur. Digəri isə ondan ibarətdir ki, sənayemiz və ixrac potensialımız bunun üçün yaxşı hazır olmalıdır. Çünki bu vaxtadək ixracın əsas hissəsi qazıntı enerji növləridir. Bunun üçün Ümumdünya Ticarət Təşkilatına üzv olmaq lazım deyil. Ölkə əmtəələrini bazarda satır. Beləliklə, bazarlarını bütün dünyaya açmaqla Ümumdünya Ticarət Təşkilatına üzv ölkələr rəqabəti artıracaq. Lakin, eyni zamanda, onlar yerli istehsalçıların maraqlarına ziyan vura bilərlər. Beləliklə, bu prosesi balanslaşdırırıq və gələcək danışıqlar prosesində maksimum müsbət şərtləri əldə etməyə çalışırıq”.

O da bildirildi ki, artıq Azərbaycanın iqtisadiyyatı özünü təmin edir. ÜDM-ə münasibətdə ən aşağı səviyyəli xarici borcumuz var. Konvertasiya oluna bilən valyuta ehtiyatlarımız xarici borcu 14 dəfə üstələyir. Beləliklə, hər hansı əlavə bir imtiyaz lazım deyil. Malik olduqlarımızı itirmək istəmirik. Lakin, eyni zamanda, təşkilata qoşulma ilə bağlı bütün təkliflərimiz - istər ikitərəfli əlaqələr istiqamətində ölkələrlə danışıqlar prosesində, istərsə də ümumilikdə təşkilatla bağlı qəbul olunarsa, proses daha da rəvan gedər.

Azərbaycan-Şanxay Əməkdaşlıq Təşkilatı əlaqələrinə gəldikdə isə dövlətimizin başçısı İlham Əliyev bildirdi ki, Azərbaycanın Şanxay Əməkdaşlıq Təşkilatında statusu müşahidəçi deyil, dialoq üzrə tərəfdaşdır. Bu, həmin beynəlxalq təşkilatla daha da yaxın olmaq üçün güclü qarşılıqlı iradənin nümayişidir. Əlbəttə ki, beynəlxalq təşkilatlarla işləyəndə və ya onlarla daha yaxın olmaq istəyəndə təşkilatın tərkibinə, üzv ölkələrinə nəzər salınır. Şanxay Əməkdaşlıq Təşkilatının və BRICS-in bütün üzv dövlətlərinin Azərbaycanla çox yaxşı və dost münasibətləri var. Bundan başqa, coğrafi mövqeyimiz, Cənubi Qafqaz və Xəzər regionunda vahid məqsədlərə töhfəmiz nöqteyi-nəzərindən əhəmiyyətli olacaq. Əlbəttə ki, Çin və Mərkəzi Asiya ölkələri ilə üzərində fəal iş apardığımız məsələlər, həmçinin bağlılıq layihələridir. Çünki Azərbaycan artıq müasir nəqliyyat infrastrukturu ilə Şərqdən Qərbə gedən yol üzərində yerləşir. Beləliklə, praktiki nəticələr nöqteyi-nəzərindən çoxlu töhfə verə bilərik.

Cənab İlham Əliyev bu məqamı da xüsusi qeyd etdi ki, istənilən təşkilata qoşulmaq siyasi addımdır, lakin həmin iqtisadiyyat ölkələri daha da birləşdirən praktiki infrastruktur layihələri ilə dəstəklənməlidir. Qlobal Cənubun bir hissəsi olaraq Qlobal Cənubun maraqlarını müdafiə etmişik və COP29-da ideyalarımızdan biri Qlobal Cənubla Qlobal Şimal arasında daha möhkəm körpülər qurmaq idi.

Göründüyü kimi, Azərbaycan daim əməkdaşlığa, yeni körpülərin qurulmasına çağırışları və bu istiqamətdə atdığı real addımları ilə diqqətdədir. Qarşılıqlı etimada əsaslanan bu əlaqələr illər keçdikcə daha da möhkəmlənir, yeni prioritetlər üzrə inkişaf etdirilir. Azərbaycanın tarixi Zəfəri, suverenliyinin tam bərpası ilə yaratdığı reallıqlar yeni hədəflərə doğru inamla irəliləməsini şərtləndirir.

Paylaş:

Baxılıb: 504 dəfə