Böyük Qayıdışın növbəti mərhələsi

Bakı:

23 °C

55 %

1 m/s

Əlaqə

AZ RU EN

Ana səhifə / YAP xəbərləri / Böyük Qayıdışın növbəti mərhələsi

Böyük Qayıdışın növbəti mərhələsi

15.01.2025 [17:49]

Sahib Şükürov,

YAP Göyçay rayon təşkilatının sədri

Azərbaycan Respublikasının Prezidenti İlham Əliyev yanvarın 7-də yerli televiziya kanallarına müsahibəsində bir çox məsələlərə aydınlıq gətirib, mühüm məqamlara toxunub, ciddi mesajlar verib. Dövlətimizin başçısı eyni zamanda ölkəmizin siyasi-iqtisadi gündəliyini, qarşıda duran hədəflərlə əlaqədar prioritet istiqamətləri də diqqətə çatdırıb, Qarabağın bərpası və digər aktual məsələləri şərh edib.

Prezident İlham Əliyev 2024-cü ilin sosial-iqtisadi yekunlarının göstəricilərindən bəhs edərək ötən ilin yenə də uğurlu il olduğunu, Azərbaycanın iqtisadiyyatının inkişaf etdiyini bildirib. Dövlət başçısı iqtisadi və sosial siyasətin biri-birini tamamladığını, islahatların davamlılığının ölkənin dayanıqlı inkişafının əsası olduğunu bildirib.

Müsahibəsində Ermənistana və onun havadarlarına ciddi xəbərdarlıq edən prezident İlham Əliyev qeyd edib ki, düşmən ölkə ilk növbədə, 2020-ci il noyabrın 10-da imzalanmış üçtərəfli Bəyanatın tələblərini yerinə yetirməli, bütün təxribat cəhdlərindən imtina edərək konstruktiv siyasət həyata keçirməlidir. Ancaq görünür ki, Ermənistan 2020-ci və ondan sonra 2023-cü illərdəki hərbi məğlubiyyətlərindən dərs çıxarmayıb. Azərbaycan tərəfi humanistlik göstərərək dəfələrlə beynəlxalq tribunalardan da bəyan edib ki, biz artıq müharibə səhifəsini bağlamaq istəyirik, sülh istəyirik. Ancaq görürük ki, Ermənistan və onun yeni havadarları bunu istəmirlər. Onlar revanşist fikirlərlə yaşayırlar və Ermənistan faktiki olaraq bölgə üçün bir təhdid mənbəyidir. Ermənistan rəhbərliyi ağlını başına yığmalı, Azərbaycan liderinin tələblərini təcili şəkildə yerinə yetirməlidir. Əks təqdirdə, məsuliyyəti Ermənistan tərəfi daşıyacaq.

Prezident İlham Əliyev Ermənistanda gedən silahlandırma prosesinin Cənubi Qafqaz üçün yeni təhdid amili olduğunu vurğulayıb. “Bu gün sanki Ermənistanın arxasında duran kimi görünən və onları Azərbaycana qarşı yeni provokasiyalara, təxribatlara təhrik edənlər çox güman ki, axıra qədər onların arxasında durmayacaqlar. Necə ki, 2020-ci ildə və ondan sonrakı dövrdə dura bilməmişlər. Ona görə yox ki, durmaq istəmirlər, Azərbaycan bu imkanları verməyəcək. Azərbaycanın dövlət büdcəsinin əhəmiyyətli hissəsi hərbi və təhlükəsizlik məsələlərinə xərclənəcək. Qeyd olundu ki, Qarabağın və Şərqi Zəngəzurun bərpasına 4 milyard, hərbi və təhlükəsizlik məsələlərinin həlli üçün 8,4 milyard manat vəsait xərclənəcək. Ermənistanın silahlanma yarışı maliyyə resurslarımızı hərbi məsələlərə cəlb etməyə məcbur edir. Ona görə də, Ermənistan silahlanma yarışında ölkəmizlə rəqabət apara bilməz” - deyən ölkə başçısı Ermənistan rəhbərliyinə və onları silahlandıran dairələrə ciddi mesaj göndərib.

Prezident İlham Əliyev müsahibəsində Zəngəzur dəhlizinin açılması məsələsinə də toxunub. Ölkə başçısı bu məsələ ilə əlaqədar bir daha konkret mövqe nümayiş etdirib və vurğulayıb ki, Zəngəzur dəhlizi açılmalıdır və açılacaqdır.

Müsahibəsində Qarabağda və Şərqi Zəngəzurda 2025-ci ildə həyata keçiriləcək layihələr, planlar barədə də ətraflı məlumat verən Prezident İlham Əliyev ötən illərdə olduğu kimi bu il də işğaldan azad edilmiş ərazilərdə tikinti-bərpa işlərinin sürətləndiriməsi prioritet vəzifə kimi dövlətimizin diqqət mərkəzində saxlanılacağını, bu məqsədlə cari ildə ən azı 4 milyard manat ayrılacağını diqqətə çatdırıb. Üç il ərzində 10 yaşayış məntəqəsinə keçmiş məcburi köçkünlərin qaytarıldığını və bu proses 2025-ci ildə də davam etdiriləcəyini bildirib. Ölkə başçısı cari ildə daha 20-yə yaxın yaşayış məntəqəsinə keçmiş köçkünlərin qaytarılmasının nəzərdə tutulduğunu, hazırda həmin şəhər və kəndlərdə inşaat işlərinin getdiyini, layihələrin icra olunduğunu, bu işlər yekunlaşdıqdan sonra isə ilin sonuna kimi 30-a yaxın yaşayış məntəqəsində keçmiş köçkünlərin məskunlaşacağını vurğulayıb. Cənab Prezidentin qeyd etdiyi kimi 2025 – ci ili Böyük Qayıdışın növbəti mərhələsi də adlandırmaq olar.

Prezident İlham Əliyev müsahibəsi zamanı “Bizim həm qeyri-hökumət təşkilatlarının, həm dövlətin fəaliyyəti ondan ibarət olacaq ki, Qərbi azərbaycanlılar öz dədə-baba torpaqlarına, orada yaşadıqları kəndlərə, şəhərlərə qayıda bilsinlər və orada yaşasınlar” söylədiyi fikilər diqqət çəkən məqamlardan biri idi. Bu bir reallıqdır ki, Qərbi Azərbaycan tarixi və əzəli Azərbaycan torpağımızdır və orada yaşayan azərbaycanlılar zaman-zaman etnik təmizləməyə məruz qalıblar, öz ata-baba torpaqlarından didərgin düşməyə məcbur ediliblər. Yürüdülən düşünülmüş siyasətin nəticəsində son dövrlərdə əldə edilən uğurlar, tarixi Zəfərlər əminliklə deməyə əsas verir ki, qısa zamanda Prezident İlham Əliyevin rəhbərliyi ilə xalqımız Qərbi Azərbaycana, dədə-baba ocaqlarına da qayıdacaq.

Paylaş:

Baxılıb: 508 dəfə