Biz dost əlini sıxmağa hazırıq

Bakı:

27 °C

43 %

4 m/s

Əlaqə

AZ RU EN

Ana səhifə / YAP xəbərləri / Biz dost əlini sıxmağa hazırıq

Biz dost əlini sıxmağa hazırıq

15.07.2024 [14:19]

İyulun 11-də İslamabadda rəsmi səfərdə olan Azərbaycan Respublikasının Prezidenti İlham Əliyevin Pakistan İslam Respublikasının Baş naziri Məhəmməd Şahbaz Şərif ilə geniş tərkibdə görüşü keçirilib. Görüşdə iki ölkə arasında qarşılıqlı münasibətləri, o cümlədən iqtisadi-ticari, mədəni əlaqələri özündə ehtiva edən 15 sənəd imzalanıb.

Qeyd edək ki, Azərbaycanla Pakistanın əlaqələrinin dərin tarixi kökləri var. Hər iki ölkənin xalqları bir-birinə qarşılıqlı hörməti bəsləyir. Hər iki xalqın eyni dəyərlərə malik olması onlar arasında birlik və həmrəyliyi daha da möhkəmləndirir. Hələ 2020-ci il sentyabrın 27-dən - müharibə başlandığı dövrdən Pakistan dost və qardaş Türkiyə Respublikasından sonra Azərbaycana ən çox siyasi və mənəvi dəstəyini ifadə edən dövlətlərdən olub. 2020-ci il dekabrın 30-da Pakistanın Prezidenti və birinci xanımı Heydər Əliyev Fondunun dəstəyi ilə İslamabadda fiziki qüsurlu şəxslər üçün əlil arabalarının təqdim olunması mərasimində iştirakı zamanı Azərbaycanın öz torpaqlarını işğaldan azad etməsi və təcavüzkar Ermənistan üzərində Qələbə qazanması münasibətilə Azərbaycan hökumətini və xalqını təbrik edib, xüsusi təbriklərinin Azərbaycan Prezidentinə də çatdırılmasını xahiş edib. Göründüyü kimi Vətən müharibəsinin ilk günlərindən Pakistan dövləti Azərbaycana ardıcıl olaraq öz siyasi, mənəvi dəstəyini ifadə edib. Azərbaycanın dost Pakistan dövləti ilə münasibətləri daha böyük diqqətə və xüsusi əhəmiyyətə malikdir. Cənubi Asiya dövlətləri sırasında Azərbaycanın ən sıx əlaqələri yaranmış və qarşılıqlı münasibətləri strateji tərəfdaşlıq səviyyəsinə yüksəlmiş ölkə Pakistandır. Pakistan İslam Respublikası Cənubi Asiyanın, İslam Şərqinin və İslam Əməkdaşlıq Təşkilatının ən fəal, nüfuzlu və hərbi-siyasi baxımdan güclü dövlətlərindən biridir. ABŞ ilə strateji tərəfdaşlıq münasibətlərinə malik olan bu ölkə həm də dünya siyasətində önəmli rol oynamaqdadır.

Pakistan dünyada kütləvi qırğın silahına və raket texnologiyasına malik olan yeganə müsəlman dövlətidir. Bu gün Pakistanı tam əminliklə Azərbaycanın Türkiyədən sonra dünyadakı ikinci əsas strateji müttəfiqi hesab etmək olar. Ulu öndərimiz Heydər Əliyevin əsasını qoyduğu dostluq əlaqələrini strateji tərəfdaşlıq səviyyəsinə qədər yüksəldən, mahir və müdrik siyasəti ilə Azərbaycanın beynəlxalq aləmdə tanınmasında çox böyük işlər görən cənab İlham Əliyevin hakimiyyəti dövründə Azərbaycan-pakistan əlaqələri kifayət qədər inkişaf edib. Nəyi, nə zaman, necə edəcəyini bilən bir rəhbər kimi cənab Prezident qardaş ölkədə çox böyük nüfuza malikdir. Dost üçün, qardaş üçün bir tikə çörəyimizi bölməyə hazır olduğumuzu işdə, əmldə sübut edən rəhbərimizin siyasəti nəticəsində bu gün Azərbaycan-Pakistan münasibətləri “unikal əlaqələr” kimi xarakterizə edilir və alqışlanır. Pakistanın Baş naziri Məhəmməd Şahbaz Şərifin geniştərkibli görüşdə bu münasibətdən mütəəsir olması diqqəti cəlb etmişdir.

Cənab İlham Əliyevin Cəmmu və Kəşmir məsələsində Pakistanın haqlı mövqeyini qətiyyətlə müdafiə etməsi, bunun Haqq işi olduğunu və problemin həllinin beynəlxalq hüquq normaları əsasında vacibliyini qeyd etməsi bir daha göstərdi ki, Azərbaycan xalqı və onun Lideri öz əhdinə sadiqdir, bizə dost əli uzadan hər kəsin əlini sıxmağa hazırdır.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 603 dəfə