Ecazkar Şuşa yeni həyata qədəm qoydu

Bakı:

22 °C

65 %

9 m/s

Əlaqə

AZ RU EN

Ana səhifə / YAP xəbərləri / Ecazkar Şuşa yeni həyata qədəm qoydu

Ecazkar Şuşa yeni həyata qədəm qoydu

14.05.2024 [11:31]

Şuşanın işğaldan azad edilməsi təkcə strateji və hərbi baxımdan deyil, mədəni, mənəvi və tarixi baxımdan da böyük əhəmiyyət daşıyır. Şuşa hər bir azərbaycanlının gen yaddaşının silinməz səhifəsi, ecazkar mədəniyyətimizin parlaq rəmzidir.

Mayın 10-da bu gözəl şəhərimiz daha bir tarixi gün yaşadı. 32 ildən sonra doğma sakinlərini qoynuna alan Şuşa iki bayramı qeyd edirdi. Həm Ulu öndərimiz Heydər Əliyevin 101-doğum günü, həm də Şuşa sakinlərinin öz doğma ocaqlarına qayıdışı əsil bayram ovqatı yaratmışdı. Bu gözəl gündə Azərbaycan Respublikasının Prezidenti cənab İlham Əliyev və birinci xanım Mehriban Əliyeva Şuşada birinci yaşayış kompleksinin açılışında iştirak edir, şuşalıların bayram sevincinə şərik olaraq onlara yeni evlərinin açarlarını təqdim edirdilər. İnsanların gözlərindəki sevinc hissləri dolub daşırdı.

Ölkəmizin başçısı Müzəffər Ali Baş Komandan İlham Əliyev sakinləri təbrik edərək geniş nitq söylədi. Öz nitqini təbriklərlə başlayan cənab İlham Əliyev qeyd etdi ki, “Otuz iki ildən sonra siz doğma Şuşaya qayıdırsınız. Bu gözəl tarixi hadisə münasibətilə sizi ürəkdən təbrik edirəm. Siz otuz iki il vətən həsrəti ilə yaşamısınız, amma bilirəm ki, bir an da Şuşanı unutmamısınız, bilirdiniz və inanırdınız ki, siz buraya qayıdacaqsınız. Mən də bilirdim, mən də inanırdım və Prezident kimi 2003-cü ildən başlayaraq sizi və bütün keçmiş köçkünləri öz doğma vətəninə qaytarmaq üçün əlimdən gələni əsirgəmirdim.”

Bu inamın, bu mübarizənin hədər getmədiyini, 44 günlük müharibədə qazanılan qələbənin tarixi bir Zəfər olduğunu qeyd edən ölkə başçısı qeyd etdi ki, Azərbaycan xalqı elə bir qəhrəmanlıq, elə bir fədakarlıq göstərmişdir ki, bu gün bütün dünyada Azərbaycan oğulları haqqında danışırlar və bizim xalqımıza hörmət edirlər. Çünki biz öz haqqımızı danışıqlar yolu ilə yox, kiminsə güzəşti hesabına yox, döyüş meydanında bərpa etdik, şəhərlərimizi, kəndlərimizi azad etdik, qan tökdük, şəhidlər verdik. Bütün Azərbaycan xalqı 44 gün ərzində bir yumruq kimi birləşmişdi.

Bu gün isə Şuşanın yeni tarixinin başladığını bildirən cənab İlham Əliyev hələ 8 noyabrda Şuşanı dirçəltmək planının mövcud olduğunu qeyd edərək bildirdi ki, “ Bax, bu gün biz dirçəldilən Şuşanı görürük. Təkcə bu gözəl binalar deyil, Şuşada çox genişmiqyaslı quruculuq işləri gedir. Bu gün Ulu Öndərin doğum günündə üçüncü yaşayış kompleksinin təməli qoyuldu.” “Şərait çox gözəldir və əminəm ki, uzun fasilədən sonra şuşalılar burada rahat yaşayacaqlar, yaradacaqlar, quracaqlar, öz doğma şəhərinin tarixi simasını qoruyacaqlar.”

Qarabağda və Şərqi Zəngəzurda aparılan quruculuq işlərinin geniş vüsət almasından qürur hissi ilə danışan ölkə başçısı bütün gücün bu istiqamətə yönəldildiyini və əsas məqsədin bu torpaqların yenidən öz qaynar həyatına qovuşması olduğunu bildirdi.

Təəssüf ki hələ də qələbəmizi həzm edə bilməyən qüvvələrin olduğunu bildirən ölkə başçısı bildirdi ki, “Bu gün də baxın bizə qarşı, kimlər, necə deyərlər əsas rol oynayırlar - Fransa və Amerika. Bunu açıq demək lazımdır, daha çox Fransa. Onlar da bilməlidirlər ki, bizim iradəmizdən kənar bu bölgədə heç bir məsələ həll olunası deyil.”

Bəli. Ölkəmizin rəhbərinin qəti mövqeyi, Azərbaycan xalqının əzmi, iradəsi sarsılmazdır. Cənab İlham Əliyevin də qeyd etdiyi kimi xalqla dövlətin birliyinin təcəssümü olan Zəfərimiz bundan sonra da öz mahiyyətini qoruyacaq, bu torpaqların əsil sahibi olan xalqımız öz tarixi torpaqlarında yeni qələbə dastanları yazacaqdır.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 554 dəfə